Ona compagnia coraggiosa

e Fabio WolfA duu pass del Lorett g’ha la sed voeuna de i realtaa pussé stravagant e interessant del teater contemporani d’avanguardia, la se ciama “Phoebe Zeitgeist” e l’è stada fondada in del lontan 2008 del dissacrant regista Giuseppe Isgrò insema a l’attris Francesca Frigoli, la dramaturg Francesca Marianna Consonni e la performer Giulia Dalle Rive. La lor ricerca, che la brascia tutt i camp de l’art d’incoeu, l’è dedicada a l’esistenza, a la persistenza e a la trasformazion de ogni forma de sopraffazion. La compagnia la mett in scena ona vision de quej che a hinn i ossession del noster temp e la va a legg cont ona noeuva prospettiva i scritt de i grand autor de la letteratura contemporanea. L’occasion per vedej a l’opera l’è propi adess al Teater Elfo Puccini in la Sala Fassbinder cont el spettacol “Love-Lies-Bleeding”, traa foeura del famos scrittor american Don De Lillo cont la sorprendent regia de l’Isgrò. Ona commedia crudel che la tratta el tema de la mort volontaria: on tema attual, scottant e dibattuu. Cossa l’è la qualità minima de la vitta? Come se fa a capì la volontà de on corp che el respond minga al noster intellett e che ne par quasi on nemis? La recitazion de i personaggi, interpretaa de i brav attor Francesca Frigoli, Daniele Fedeli, Liliana Benini, l’è scabrosa e provocatoria, indove la parola a travers de la ripetizion, la marca la soa fonzion politega. L’è ona compagnia coraggiosa che la dà on respir europeo al nost Milan!