Fabio Wolf
Marta Marangoni
El sedes de luj hinn trent’ann che el s’è assentaa el pussè grand mimo de Milan e vun di pader fondator del cabaret milanes: Gianni Magni, portaa via tropp prest de on infart a 51 ann. El passeggiava in Piazza del Domm e l’era adrée naturalment a parlà del sò prossim spettacol. A 12 ann l’era giammò sora a on palcoscenic e anca in television. Poeu el frequenta la scola de recitazion del Piccol Teater del Strehler (giusta per regordà ai rapper el nòmm del Maestro). In del 1964 el troeuva el Brivio, lo Svampa e el Patruno e inscì nassen ”I Gufi”: el primm grupp de cabaret italiano, come el regorda l’istrionich Flavio Oreglio in del sò fondamental liber su la storia del cabaret "L’arte ribelle". Gianni l’era la punta de diamant! I sò capacità espressiv empieniven la scena: basta vedè "Il neonato" o "Va’ longobardo". Ona grand ispirazion per nialter Duperdu, ve le raccomandom davvera, se l’avii mai vist! E dopo i Gufi, television, teater, cinema. Se pò no scordà cont el Celentano in de la part del Sicari. Con la soa vos inconfondibil l’ha incis tutt i canzon pussè bell del D’Anzi e, in del 1989, quand l’è burlà giò el mur de Berlin, el Magni l’ha scrivuu anca on liber sora l’amor: "No (virgola) tu fai il rospo". Insomma, cara i noster milanes, semm dinnanz a on monument de la nostra cultura, e Milan la se regorderà de luu insema a la miée Vera Rettore con una serata in sò onor al Palazz de la Region el prossim settember. L’era innamorà del dialett meneghin, che per luu l’era pussè “sonoro” de l’italian e num semm d’accord. E vialter?
Per ricevere le notizie selezionate dalla redazione in modo semplice e sicuro