Fabio Wolf
Marta Marangoni
El nost Milan el g’ha tutt quel che podem desiderà. Anzi no, on quajcoss el gh’è minga. Come el dis on quaj milanes del tacch: “Se Milano avesse lu mare, sarebbe una piccola Bari”.
Milan on mar piscinin ghe l’ha de bon: l’Idroscalo, nassuu come “aereoporto per idrovolanti” in del 1930. El g’ha anca el Mare Culturale Urbano, on progett prezios ch’el fa musica e teater in periferia, ma questa l’è on’altra storia. Gianmò all’inizi del ‘900 la nostra cittaa la gh’aveva “velleità marittime”.
In del 1907 el Comun de Cervia, appena a 300 chilometri de distanza, l’ha faa on contratt cont la ditta di imprenditor milanes Maffei, per tirà su in del mezz de la pineda ona noeuva zona balnear che han ciamaa propi Milano Marittima.
E inscì in del 1911 on grupp de architett, avvocat e artist fan su la società omonima, in fra de lor el grand pittor milanes Giuseppe Palanti che el progetta ona cittaa-giardin in de la qual el turism el se mesc’iava cont la natura intorna.
L’era la moderna cittaa de villeggiatura per la borghesia meneghina:
villin in stile liberty stravaccaa in de la pineda.
On sit quiet financa al 1927 quand el Comun de Cervia, ruzaa de Milano Marittima, el comincia ona esplosion turistica cont albergh, coloni, ristorant e perfina grattaciel! Ma el pussè grand grattaciel l’è quel de la vesina Cesenatico, sotta el qual l’era facil trovà duu alter grand milanes: Dario Fo e Franca Rame.
E sotta el qual se trovomm nialter Duperdu propri adess in sto precis moment!