Un manovratore di tram (manetta)
Milano, 21 gennaio 2018 - Ona semper noeuva canzon del Valter Valdi la dis “Mi voraria vess vun de quej del texsas”… Se me dissedi cont el motiv in del co’ le sifoli tutta la giornada. I paroll peu a hinn el pretest per toeu in gir quij che desideren rob irragiongibil. “Me piasarìa derbì on teater dedicaa ai Operett!” “si, e mi voraria vess vun de quej del texas”…” se vinci i centmilion al superenalotto, compri on appartament per tutti i me fioeu, cont i spes condominial pagà per almen vint ann…” “mi voaria vess vun de quej del texas” “Peu foo mett in garage voeuna macchina per marca” “Mi voraria vess…” “sbatti via 50milion de euro e me butti in politica per fa l’onorevol” “ mi voraria vess vun…” La se presta a dà del matt a qualsiasi interlocutor che el te presenta ona proposta balossa.
Quanti mestèe avaressi vorsù faa: el pilota di aerei, el manetta del tramvaj, el guidatori de la MM, el brumista, e invece sont diventà on conduttor di programm senza i programm. Perché al dì d’incoeu per avegh on programm Rai, Mediaset o Sky te devet vess vun de quej ch’el disen tant per dì nient: del texsas! appunto. Adeguass a chi el ragiona in termin de audience, de ascolt. Quej che se sbaglien seguten a mantegnì el post, anzi, avanzen de grado. L’èmm semper criticada, sia la radio che la television, ma mai come in questi temp. “Fann di trasmission, come i canzonett che disen nient e se fann nanca ricordà el motiv e in gir gh’è tanta gent che la se dà de fa e te scolta nanca. Peu parlen de la prosopopea. Uei, tucc a sann tutt de tutt e quand disen on quajcoss sembra che parla el Papa, ex cattedra. Tucc intenditor che sann tutt senza nanca dà l’impression de savè nient. E se divertissen de quel che disen, riden per quell che fann, se bauscen, goden. L’è on mond come el diseva el Leo (adess se ciama inscì) a l’inversa, a la rovèrsa.
Fra pocch tucc tappasciaran (cammineranno) all’indrè, staran cont el co’ in terra e i gamb all’aria. Senza fra pocch. Basta sentì quii che comanda! a hinn giamò in quella posizion. Comincen tucc cont i grand proposit e peu man man che passa el temp a cambien, diventen prepotent, fasso tutto mi, gh’hann semper reson lor, e te la metten giò come se la gh’avessen. La luna? L’è mia! “Mi voraria vess vun de quej del texas..” L’è vera che gh’hinn semper quei che disen cossa m’importa de la luna se gh’hoo difficoltà de orgasmo! Verament l’hoo dit mi in d’ona canzon. Popri a significà che… “mi voraria vess vun…” Eh, sì. El Valdi l’è staa anca filosofo. E el Franco Visentin ch’el seguta a tegnì viv el so’ règord el ghe va a drè perché quand el spettàcola (spettacolare, da, fare spettacolo) el dis i calambour valdian (del Valdi…uei incoeu inventi anca la lengua in barba all’accademia de la crusca) che fann semper ridd perché a hinn profondament comic come quell tirà a man, citandone le fonte, quand l’intona la canzon Occhi grandi, che come la canta Franco Visentin, el cantastori de la rive gauche del Navili, gh’è n’è minga. Come el fa’ a girà i oeucc intant che el dis “grandi” le sa domà lu.
Franco el cunta: “Valdi prendeva le mosse dalla famosa canzone di Celentano “Chi non lavora non fa’ l’amore” (che nel scrivela el gh’ha miss i man anca Luciano Beretta n.d.r). Concetto sbagliato. Sarebbe molto più giusto dire che “Chi non lavora fa l’amore con le mogli di quelli che lavorano”. E anca el Visentin, el me diseva che quand l’incontra on quaivun ch’el millanta de faa spettacol cont el cachet spropositaa, el ghe dis “Mi voraria vess vun de quei del texas”. ‘Sto nanca a scrivela, la canzon. Andìi a guardà su you tube e la trovarii tutta.
Certo che songà l’è semper on bell’affare. Chi l’è ch’el sogna no. Hoo fa in gir la solita intervista a la gent de la strada per capì quaj eren i sogn per Milàn, intesa come città Metropolitana. Ecco ona filera de rispost:
- Mi voraria che la fudess semper pussè granda, cont 26 milion de abitant.
- Mi voraria che la tornass piscinina, a misura d’homm.
- Mi voraria che la fudess pussè verda.
- Che la quatass i bus in la strada.
- Che la sbattess all’Amsa tucc quii che lassen in terra i cartasc e e me limiti a dì i cartasc.
- Obbligà i gelatèe e i pastizzèe a tegni prodòtt senza succher per chi l’è che el gh’ha el diabete. Gh’è tutt per i vegan, per i ciliaci, e se te domandet on gelato s.z. te guarden come on animal al zoo. “ Senza succher? Mai sentì.”
- Che ligassen i man a i imbrattamur che ciamen pomposament writters e che fann el bell e cattiv temp cont i bombolett. Perché seguten a vendej peu su no dal moment che el bus dell’ozono el se slarga semper pussèe…a proposit… ne parlen pù. Sont preoccupaa.
- Sont spaventaa per quand derbaran i Navili. Se troeuven adess de tutt sul fond compres ona cinquantina de biciclett figuremes de peu. - Sont d’accord con quii che voeuren sbatt giò i quarter che van in ruvina per fan di noeuv. Ma ghe voraria on calmier fort per i prezzi. Hoo sentì quei de Milano City. Creden che i milanes sien nababbi? L’è on quarter ch’el costa domà a guardall. - El gh’ha reson quel scior lì. Questa a l’è ‘na società che la nass domà per favori quej che gh’han i danèe. E i alter?
Cari ner sciori senza portafaoeui, i alter viven di sogn. “Voeuri la cusina propagandada in tv” “ Voeuri ‘na ca’ in zona stazion Garibaldi” “Voeuri on prestit da ona di quij banck ch’em salvàa” “ voeri ona pension decente, magari de giugann on quint per on finanziament e fa sparì quei che fann vedè i anzian col sorris fals come giuda soddisfatt per avell ottegnù”…Sii “Mi voraria vess vun de quej del texsas…”
brivio.roberto@yahoo.it