Ai temp de Dick Fulmine

Milano, 6 ottobre 2019 - La storia l’è lunga  comincialla dal princippi, ma ne var la pena. Abitavi in ona ca’ che la tegniva i me 10.000 liber (circa) e i me 3000 VHS cont i film catalogà e divis per gener e personagg. Ona raccòlta total da fagh invidia al Patruno (Gufo come mi) che l’è on raccoglitor di primm. Quand vegniven i amis o on quai forest restaven de stucch nel trovass in ona bibliocineteca che la occupava i pared e el centro de trii stanz. Sont vegnù via de lì perchè i me fioeu s’eren sistemà per cunt lor e mi e mia miè s’erum in tropp per ona ca’ insci “piccola”. Ho cambià e sont andà nel classich trii local. Ma bona part de la mia roba l’ho missa in deposit a la sanfasan: liber, flm, dischi, faldon cont i document de la mia attività, copion, manifest, locandinn, el classich trovarobato di spettacol che hoo faa; insomma tanta roba. In doa? El passaa President del Monza, m’ha dà per el moment la possibilità de mett tutt sotta i scalinad del Stadio Brianteo. Gh’eren stanzon inutilizzaa, a fianc di spogliatoi, e mi g’hoo occupà on canton (l’era tant grand che ghe stavi comod e vanzava spazi per derbì ona scola de teater, ona palestra, e mettegh on palchscenich per fa’ i proev minga domà de la mia Compagnia, anca di alter che sann no in doa andà a provà prima de la general fada in del teater fissaa per la prima rappresentazion. Sont minga reussi. Gh’eren problemm de agibilità, el permess de usà el stadio ghe l’aveven ann per ann, ghe voeureven tropp danèe per qualificall. Poeu l’è rivà Berlusconi cont Galliani originari de Monza. Hann comprà la squadra, cambià la Presidenza (magari ghe scrivi on articol come per Colombo), miss sottsora el Stadio perché voeuren portà la compagine sportiva in serie B e poeu in A. E in quatter e quattr’ott foeura tutt. Furgonad de roba portà provvisoriament da on amis a Trezzano S.N.(sul Navili) e adess, depoeu squas duu ann, via anca de lì. Hoo regalaa 2000 liber a ona scola de Rho, alter gh’hann avù ona sana collocazion: al Primm Archivio Storico del Cabaret italiano, organizzà sotta la Presidenza, la Direzion e l’azion diretta de Flavio Oreglio ( dit El Katartico) a Peschiera Borromeo. Document, foto, articol, liber, copion, quell che interessava al noster campion che l’ha appena pubblicà on liber intitolà “L’arte Ribelle”, storia del cabaret da Parigi a Milano – dallo Chat Noir degli Idropatici al Derby del Gruppo Motore – Sagoma Editore. Ne parlaremm in on altra occasion. Tutt ‘sto discors l’è per tirà a man i stranezz che hoo trovà in la mia raccolta, ‘storica’ anca quella se considerom che l’è stada fada in 60 ann de militanza sui scènn. Nel passà  i liber vun per vun hoo trovà anca la mia famosa raccolta de fumetti: Mandrake, L’Uomo Mascherato, Gordon, Cino e Franco (riedizion de la veggia Nerbini). I original gh’eran ma hinn andà perdù in almen ses traslòcch. E poeu la collezion di primm numer de l’Illustrazione Italiana, quella di liber che custaven “1000 lire”, i giornalett dell’Intrepido, il Monello, Lancio story, l’intera biblioteca de la Bur, liber de barzellett e on faldon de quand i e scrivevi per la “Mezzora, Il quarto d’Ora”, Cinq numer del trimestral Il Delatore “belle lettere e storia “ diretto da Bernardino Zapponi che l’ha impostà on numer tutt sui travestii (1965)e ch’el precisa “ In Italia è proibito travestirsi in pubblico, eccetto che per carnevale. Gli spettacoli di travestis sono tollerati nei locali notturni, osteggiati nei teatri, pero’ consentiti senza difficoltà quando rivestono un carattere burlesco, come nel caso della compagnia dei legnanesi. T’è capì? I me amis Legnanesi già protagonist in la letteratura dal 1965. Compliments. Ghe ne sarìa  de dì per on ann de fila, ma voeuri tirà in ball ona serie de librett ciamà I Miti Poesia ediz. Mondadori (1996). Me ne manca on quaivun (che trovaroo). La mia collezion la partiss dal n° quatter dedicaa a Saffo. L’hoo sfojà e m’hinn capità sott’oeucc di vers, unich: “ Tu mi cuoci”, datosi che Saffo l’era minga cannibale, l’è on vers scritt per quand se fa’ la dichiarazion a ona donna o a on omm. “Eros ha scosso la mia mente/come vento che giù dal monte/si abbatte sulle querce” l’è minga Ramazzotti anca se i so’ donn, che aumenten ogni ann, podarissen dighel. “Non spero mai di sfiorare il cielo con un dito “ In la poesia de Attilio Carosso “Dio che donna dio che tosa” gh’è on vers ch’el dis “Poeu de colp sul pussè bell, quand me senti in Paradis e me par de toccà i stell, la se ferma e all’improvvis la se mett a caragnà”. Beh, lì el ciel le tocca! E concludi cont Dick Fulmine. Nell’immediaa dopoguerra ricompariven in di edicol giornalett che podeven minga vess stampà nel periodo precedent. DicK Fulmine, Ciclone, Tanks l’Uomo d’acciaio, La Vipera Bionda, Gim Toro.

Ho travaa ona rarità. Ve passi la copertina (Milano -1938 tip. Tomasina). Forsi l’ultima stampa anteguerra. Avventura completa. Cont final pien de allegria: Lui- Ho detto che sono in vacanza e la ragione la vedi anche tu. Lei- Vi presento il mio fidanzato. L’altro- Complimenti! Ne sono lieto e comprendo! … L’è quel “vi “ e quel ‘comprendo’ che rivela l’età del giornal. 50 centesimi. 1938 e la scritta “Il Grande poliziotto Italo-Americano. Dick Fulmine”. La faccia de Carnera. Ona rarità.