Una tavola raffigurante il pifferaio di Hammelin
Milano, 8 marzo 2017 - Mettemes d'accord: ratt o morigioeu o pantegana? El ratt, gross, l’è quel che fa paura. El ven foeura di fogn, el gira in di discaric, el se infila in di ruer, el va in di canal, in di ronsgi, sulla riva di fiumm, insomma l’infetta el mond inter e te spantega la leptospirosi e alter robb che te fan vegnì la malafin. El rattin el fa teneressa. Le dis la parola. A se dis anca de on fiulin simpatic e morbid. “Te set on rattin” e te le baset, te le stringet, fin che el te bauscia tutt e te imbesuiss de teneress. El rattin l’è istess del morigioeu. A l’è piscinin. El ven da la campagna. Le ciamen “topolino”. A gh’he el topolino de Walt Disney, la topolino della Fiat, che chissà perché l’è diventada femminil, senza per quest avegh el fà de dona, quel le lassèm a la topa senza capì perché la ciamen inscì.
E la pantegana? El vacabolari el dis “ratto di campagna o di fogna”. Ma per mi la gh’ha on altra configurazion. La pantegana la vedi longa e furba, cattiva e sorniona, melliflua, falsona, morgnina e pronta a mettetel in del…lisca. La favola de ona volta, la metteva a post ’sta categoria de rosegon, con l’ingagg del piferer de Hammelin. Quest chi, oè, cont ona sonada portàva ratt, morigioeu, pantegan, rattin, sui riv d’on fiumm e ie obligava a fass on bagn. Intant che se lavaven, lù a forza de sonà el piffer melodios, ie faseva foeura col sorris e cont la mazza da Base Ball. In guerra se mangiaven ròsti de morigioeu insemma ai gatt. Disen che la carna del ratt la sia bonna. Mi l’hoo saggiada e a momenti foo el bis. Bona, dolza. La sembrava carna de caval, se fudess minga per la dimension. Adess fan nass el rattin 100% artificial. I ricercador de Cambridge, ona università senza ratt, hann pensàa de crea’ on embrion foeura dell’utero, cont la placenta costruida a man. Han fàa on panteganin ch’el sembra propri on disegn. Bastaven no quej che giamò impesten i cà, i cantinn, i pràa, ratt che gh’han in ment domà de riproduss, ghe voreven anca i “topolini artificiali” che con le “topoline artificiali” ò ben le “rattine” trovaran el moed, la manera, de uniss artificialment e de riproduss minga voeuna ma do, tri, quatter, cinq volt all’ann. Disen che el sistema el sarà no applicàa all’omm. Mi ghe credi no. Con la mania che gh’hann i mas’c de sognà la caccia a la topa, finaran per incrementà la vendita de quella artificial (giamò in offerta nei sexi shop nella misura che te va ben), se non altro per vess minga accusà de stolking. Stolking su on ratt artificial? Ma no. Artificial voeur dì “minga natural”. Quindi, alè, saltemegh adoss. Hoo fàa di ricerch.
El rimedi quand saran tropp el gh’è: mandà a scola de flauto tutti i vostrifioeu. Drizz o Traverso el gh’ha minga de importanza. Basta ch’el sia on Flauto o on piffer. Alla faccia de la Protezion di animal che spetta domà l’ufficializzazion dell’esperiment per tirà foeurai cartej e inventà on veganismo anca sui ratt.Vai col Viagra anca se l’è minga bon.
Leggiuda su Il Giorno del 3 Mars pag. dudes. “Pillole proibite nel sexi shop” e poeu ancamò “Al bar dei pensionati va in scena Boccaccio” “ Falso Viagra, Maxi sequestri, Undici arresti in tutta Italia” “Serve la prescrizione medica. Attenti agli acquisti sul web “ “ Anche i giovani abusano di stimolanti”… insomma ona letteratura in du pagin sull’argoment. Me fa vegni in ment ona storia che cunti in di me spettacol. La basta lè per commentà i notizi. La basta lè per capì la situazion. La basta lè per trasformà la tragedia in farsa. Ghe dent la condiscendenza, la comprension, l’aiutass in on quai manera, cercà de capì ona situazion, el barattà ona sostituzion e gh’è anca l’ingann o el menefreghismo, senza cuntà la risoluzion all’italiana de on problema. Donca, la storia l’è quella del veggett che va in farmacia, attent de minga superà la riga gialda. Per via della privacy, disen. On dì hoo sentì ona sciora che sottvos la diseva all’inserviente in vestaglia blu “on profilatic per piasè”. E l’inservient a vos alta “come lo vuole il preservativo, ch’el se slonga, morbid, con serbatoio o senza, ch’el dura, a misura per l’eiaculazion temporiv, anticipaa” E la sciora rossa come on peveron ma piena de humor “ Ch’el dura. In ca’ l’ adoperen almen in des!”.
Ma tornemm al veggett per cuntà in pocch paroll quella patafiada istruttiva de do pagin. Sto veggett el dis a bassa vos al farmacista. “Gh’avaria besogn d’ona pinoletta che la tira su quel che voeur sta giò. La gh’ha el nom d’ona via. Via…via… Grà. Via Grà.” El farmacista cont on sorris e a vos on po’ pussè alta. “Podi minga daghela. Ghe voeur la rezipe (ricetta). E poeu num vendum la confezion intera. Ghe n’è minga in gir de Pinolette sparse.” “ Ghe le diga al so’ capp. Magari lu quaicoss el gh’ha. El ved… mi stasera compissi 85 ann. Hoo trovà ona sgarzolina de 80 ann. Voraria giogà cont lèe ma voeuri fa’ ona bella figura. Cont ona pinoletta aumentano le probabilità di riuscita. Ghe le domanda al so capp”. La fila intant l’aumenta. L’è tutt on borbottio. El farmacista cor dal capp. “Hoo sentì. Gh’è ona pillola in bàgn de Formitrol. Te ghe det ona spruzzada de blu di Mitilene, te la impacchettet in d’ona carta de memella e via andare. Ste voeuret ch’el faga el Viagra a quell’età?!”
La fila comincia a scompaginass. “Ecco, el me capp el ghe dà sta pinoletta. Ma cito, eh?” “ Ch’el signor le benedissa. Che serada ! Che figuron! Che forza! La foo morì da la gioia! Me senti giamò foeura de rigol. Doman torni chi e ghe cunti i prodess, la bravada.” El dì dopo el ve ggett l’è in fond a la fila ch’el fa’ i salt per fass vedè dal farmacista. El moeuv i man sul co’ a indicà ona roba mai vista. L’espression de la bocca l’è quella che se fa per esprim l’esagerazion. El farmacista l’è meravigliàa. “Come l’è possibil. Gh’hoo dàa el Formitrol che fa nanca tirà i madonn”. Quand el riva, finalment al bancon de vendita el ghe domanda curios. “E allora, come l’è andada?” El veggett el moeuv i man sura el co’ per esprimm la grandezza de on moment…“Ona figura de palta!”
brivio.roberto@yahoo.it