Vigili in immagini d’epoca
Milano, 21 maggio 2017 - Quanti volt v’è capitàa de andà in macchina o anca a pè a la ricerca de ona via? Minga domà a Milan ma squasi in tutt i città? L’è on problema. Minga semper gh’è la targa de marmo cont el nomm. De solit la dovaria vess sui canton di ca’ all’inizi e a la fin de la strada e minga sbiadìda come capita. Se la targa la gh’è no, per savè in doe te set, te fermet la macchina bloccand de brutt quella che la te stà de drèe, per domandà: “scusi l’è questa la via Piripacchi?” El 99 per cent rispond “Non so, non sono di queste parti” oppur “veramente la cerco anch’io” oppur ancamò “ io abito qui vicino ma non ho mai sentito questo nome” o (e adess pussè de prima)“I don’t understand” detto in maniera ridicola e con accento ispanoarabeggiancinesindiano. Te vet via vosand al Comun: gh’è pu religion. On dì serom in tri a domandà se la via Piripinzi l’era quella lì. Sul canton gh’era ona ca’ senza canton. Nel sens che sul canton gh’era no on canton de ca’ ma on canton de giardin. Nissun saveva che via l’era. Ma mettegh on pal cont in cima el nomm scritt su on cartell! Mi voraria che l’assessor preposto el se moeuvess e el vegniss cont mi per tutta ’na giornada a vedè ’sto mal servizi. L’alter dì m’è capità de incontrà on Ghisa (che bell quand se ciamaven anmo’ inscì e minga “poliziotto locale”). Gh’hoo dit. “Vede? Non c’è la targa della via. A chi mi devo rivolgere per farla mettere?”. El m’ha rispondu: “ Non sono di Milano. Faccio parte di un programma scambio operatori del traffico. Se la vole le diho (c aspirada toscana) chi le pone a Livorno.
L’altra sera sont andà in on circol di via Bazzini alla presentazion de on liber de Roberto Carusi intitolàa “Cattolico di ventre ebreo”. El Carusi, amis da squasi 50 ann, el m’aveva invidàa a legg ona quaj pagina. Ghe sont andàa volentera perché legg l’è semper stada la mia passion. Bell liber, bravo Roberto a scrivel. Gh’era ona giornalista, ma hoo minga capii in doe la scriveva, che la parlava dell’argoment trattàa. Mi che sont on baloss e che sont minga bon de sta seri pussè de des minutt de fila, me sont trovà a fa’ di comment ai qual la gent la sorrideva. Ventre ebreo el voreva dì che la mader l’era de quella religion e che nella vita la s’era convertida al Cristianesim. Quand parli de ebrei pensi semper a Moni Ovadia e a la demitizzazion che el fa di so’ correligionari.
E allora intant che la dona la parlava me vegniven in ment stori e barzellet. Quella per esempi e l’hoo menzionada, citada dal Pronzato quand el cunta dell’ebreo che davanti al mur del piant el prega segutand a piccà la testa vers i quadrèll intonacàa. On ingles che l’era lì a fotografà e a osservà, dopo on para d’or de preghier el ghe domanda: “Ch’el me scusa” (foo la traduzion simultanea) “ma lu ch’el prega con sto fervor, el ghe capita mai de piccà la testa verament?” Quell’alter el desmett de pregà e el ghe respond: “Beh, m’è capitàa” (anca per lu foo la traduzion) “on para de volt.” E l’ingles: “El se fàa mal?” Risposta: “Ona gnola, ma de pocch cunt.” Domanda: “Ma cossa el dis?” Risposta: “Ghe domandi grazi per mi, per i me, per el mond.” Domanda: “E ghe rispond?” Risposta: “L’ha mai provà, lu, a parlà cont on mur?” La conduttora l’ha smorfià la bocca. Carusi l’ha faà ‘na risada schietta. El pubblic l’ha ridu fina all’applauso. Mi l’hoo minga fàa per quell, ma per romp l’atmosfera che la podeva diventà pesanta. Infatti, nel liber, l’autor el parlava della soa vita intant ch’el conversava coi so’ genitor stampà sui foto della lapide. On idea giusta per ricordà i moment passàa insema.
A la fin vorevi cuntà la preghiera dell’ebreo. Ona storia pubblicada nel me liber dal titol “Attenti al Gufo”. Me sont trattegnu. Ma chi ve la disi de filada. L’ebreo, cont la soa fama de sparagnin, el va in Sinagoga a pregà. E tutti i dì con vos accorada el dis: “Signor famm vinc al superenalotto”. Minga ona, ma do, tri, quatter volt. A vos bassa se gh’è gent, alta se l’è de per lu. “Signor famm vinc al superenalotto”. E inscì per on mes de fila. Dopo trenta dì el Signor el fa sentì la soa vos. “Va ben, hoo capii”. (el Signor el cognoss tutti i dialett se no che Signor el sarìa). “Te faroo vinc al Superenalotto. Ma ti, però… giuga!” Sont sicur che se l’avessi cuntada avaria segnà la mia gloria a nel stess temp rovinà la presentazion. Ma Roberto Carusi che quella sera su trenta personn l’ha vendu 28 liber el sarìa ancamo lì a firmà.
brivio.roberto@yahoo.it