Fabio Wolf
Marta Marangoni
El 18 de november del 1886 l’è nassuu in d’ona cà de ringhera de via Fieno, quel che l’è consideraa el pussé grand poetta de lengua dialettal milanes del Noeuvcent: Delio Tessa.
Fioeu de on bancari, el studia al Beccaria e, in del 1911, el diventa avvocat cont el studi de via Beatrice d’Este, indove el passarà la soa breve vitta.
La toga la ghe pias minga e inscì el Delio, che l’è ‘passionaa de filosofia, musica e poesia, el comincia a scriv: articol, sceneggiatur de film, critich de cinema e, soratutt… poesie! Cont on gust personal che el par di volt decadent, di volt espressionista.
Semper attent a la musicalità del vers, ironich e taglient quant el basta.
Carlo Linati el dis de luu: “Ricordo che egli portava timidamente al giornale certi suoi articoletti buttati giù alla brava pieni di un suo malinconico umorismo in punta di pennino, di una sensibilità come fatta d’aria e di nulla, ma saporiti, sconcertanti”. El sò capodopera, el magnifich poema “L’è el dì di mort, alegher!” del 1932, el passa inosservaa perchè i fascista voeureven minga el dialett. Dopo la soa mort per on dolor de dent mal curaa, in del 1939, el nost Milan le gh’ha dedicaa ona strada e on post al Famedio.
Podemm ascoltà el Tessa de la vos de la grand attris Giulia Lazzarini, cont la soa unica e straordinaria espressività, in del spettacol “Diario di un poeta in prosa” el 20 novembre 2022 ai 19 or al Teater al Teater
“LabArca”.