Rimedi agostani d’antan
Milano, 10 agosto 2017 - Inutil sta chi a parlà del cald, del sol, de la siccità, degl’incendi, di pompier, dell’afa, della mancanza dell’arietta remondina, tant i metropoli, i cittadell, i paes, ghe l’hann pu. Te devet andà a pussè de 2000 meter de altezza per sentinn la frescura, per gustaà la purezza, la cristallinità, e anca lì attenzion perché gh’è semper ona coa de fa per on incident, on semafor rott, on camion foeura de misura che come trasport eccezional te blocca ona strada con tant de polizia stradal a spartì el traffic sia davanti che de drè. E allora te sentet i miasmi di tubi de scappament, alter che aria remondina: remondona. Te aspiret l’ossido de carbonio remondasc, i fumm di oli brusà e tirà allo spasim prima de cambiai, ogni tant ona zaffada de carna in cottura al barbecue, che quand te passet visin a on cimiteri e te la sentet, te vegn on dubbi.
Parlemm invece dell’estàa spettacolistic. Di spettacol che hinn in gir. Quest’ann la part del leon la fan i dilettant. Vista e provada la delizia di rappresentazion all’avert hinn sbarcàa in ogni dove per portà quel che presenten i professionist e magari on quajcoss pussèe. Riven in quartett o in sestett, canten i canzon popolar, fan i tributi ai grand che gh’hinn pu, ramazzen public de tutti i qualitàa, se presenten polito, anca coi scenn e i costumm, e fan spettacol quasi per nient (rimborso spese a lista), bej, seguibil, decoros. El me amis autor Gigi Lunari el dis che el Teater de doman l’è quel di amator. Laoren e gh’han minga la fissa della paga, proeven con gust tutt el temp che ghe voeur per fa rappresentazion dignitose, e hinn anch bravi. Del rest i musicist del Jazz della prima e della seconda ora gh’aveven on mestèe (bancari, dottor, insegnant, negoziant, contadin…) che permetteva lor de viv cont ona certa tranquillità e intant se trovaven la sera, in gioventù, a fa di proeuv e a mett su on repertori. Scommetti che han comincià inscì anca i capostitpit di orchestre de ball, i cantant, i prestigiator, insomma la gent che la voeur fa divertì altra gent, senza trop pretend e cont on gran de fa che la dà da intend.
E i professionist? Che se daghen ona mossa se voeuren laorà! Tant per lor, per quei che hann fàa radio, television, cinema, fiction, teater, gh’hin semper i premi. L’ultim che hoo vist l’è stàa i “naster d’argent”. La solita menada televisiva che la dis nient, che premia attor e artist cont pocch spirit, che quasi semper san no parlà e ciappen i premi da alter colleghi o dai presentator che cerchen de vess spiritos senza vessel. Naster d’argent, Cordon d’or, Bindei de crema, Ligasc de bronz, Medai de alpacca, Coppe de alluminio, Nos de avorio e ancamò Leon, Pardi, Gatt, Puresin, Scimbi, Formigh, Elefant, Zebre, Dinosaor, animai che han toeu via dai circhi per mettii in di premi. Roba che la se impienis del polver e che dopo la terza nettada la finis in cantina. Senza parlà dei ringraziament. Se ringrazien l’un cont l’alter, el premià el ringrazia i collaborator e la zia che l’ha sostegnù, la premiada chi l’è che la leggiù la menzion, el papà, la mamà e el moros che gh’è sta’ visin per l’ultima volta, destinàa a vess mollàa. El premiador el ringrazia chi l’ha ciamà a premià dopo che l’ha dit che ciappàa in man el premi e daghel a on alter senza dì ona parola l’è stada l’esperienza pussè sconvolgenta de la soa vida. Eh, ghe credi!
M'han dit che sont invidios. De cos’è? Alla mia età on “naster d’argento” come attor protagonist le ciapparòo mai, come giovin attor, nanca. Come regista esordient figuremess. Come regista esperto no. Come premi alla carriera, figurass. Né come soggettista, sceneggiator, produttor, fotograf, sarta, segretaria de azienda. Podaroo ringrazia’ nissun, tantomen la giuria de giornalist, citata almen trenta volt dalla presentatrice e dai premiaa, e se le minga piaggeria questa, su no. Certo i presentazion dovarissen vess spiritos, ma minga tucc gh’han el dono de la comicità, E allora el bastaria fàa di ricerch per trovà “moeud de dì’” in dialett.
Mi adess i e scrivi in milanes, ma chi el legg podarà trovaj nel dialet, pardon lengua usada in dove l’abita. “Gh’è chi cunta su ball e n’abusa/acqua pader ch’el convent el brusa” dedicada a chi el pensa de fà concion moralistich. “L’attor ignorant ch’el da’ d’intend de savenn de pù/ el fa brutt figur, el fa rid anca el cuu:” per chi sul palcoscenic el parla cont supponenza sconduda da atteggiament e parol umil. “Per dì pan al pan e vin al vin/ l’è inutel fa tanti ricamin” per chi l’è abituà a fa’ gir de paroll quand ona roba l’è minga piasuda. “S’te voeuret diventà vecc/mangia al cald e dorma al frecc” le dirann i vecc ciappàa de mira cont domand stupid come “qual è il segreto di sembrare così giovane?” “ Ai lazzaron per destin ghe tocca/speccià che ghe borla el figh in bocca” tropp artist aspetten che succeda quajcoss mentre lor fanigotten. Cossa fàa? Romp i ball a dirigent, regist, produttor per ottegnì la prima scrittura. Da quella arriva’ a fass ciamà regolarment l’è minga a volt on fatto de bravura ma dalla forza d’urto e dall’insistenza a domandà. E per conclud on proverbi tipicament estiv. “Vardà el so’ al mes de Agost mett allegria/ Basta che te siet settàa giò qujett a l’ombria. Sentì no el cald l’è ‘na fortuna/ basta ‘sta in de l’acqua dall’alba a la luna”.
brivio.roberto@yahoo.it