Enrico Intra
Milano, 15 giugno 2017 - Me telefona Enrico Intra per domandamm se vorevi fa el testimonial in ona manifestazion programmada al Pavilion de Piazza Gae Aulenti. Lì per lì hoo capì nagota. Hoo dit de si perché Enrico Intra l’è on amis , l’è quell che el m’ha scritturàa nell’allora Intra’s Derby Club de via Monterosa, cont i me canzon macabro-cimiterial: “Vorrei tanto suicidarmi” e “Va Longobardo” che tutti ciamaven “Bevi Rosmunda…” per via del ritornell che cantaven in coro . El faseva cult in di ann ’60 cantà el seguit “… bevi nel cranio vuoto del tuo papà, non esitare sciocca ti mostro io come si fa” On para de dì dopo sont andà a trovall in de la scola de Jazz, pareggiada all’Universitàa, che lu el dirig, per famm s’ciarì la faccenda del Testimonial. “L’è ona mansion gratuita che te fa’ testimoni de on avveniment. Ne la prima edizion, l’ann Passàa, l’è vegnu Dario Fo. Quest’ann ti e alter in trattativ. Presenza a fiàa d’oca, naturalment (gratuita).” La giornada l’era dedicata a ona manifestazion che avevi giamò inventà cont Aleardo Caliari, direttor e proprietari del Teatro della Memoria ( mi gh’avevi l’Ariberto) per reunì tutti i teater piccol de Milan. Hinn passàa dodes ann ed ecco che Renato Lombardo, ideator e direttor, l’ha trada in pè. Ciuska el gh’haveva tri Festival Partner, quatter collaborator in grado de iuttal, vott partner tecnici e artistici, sett Media Partner, col contributo del Comun de Milan, il patrocinio della Regione Lombardia, e l’ospitalità del Pavilion. I alter testimonial eren Enrico Bertolino, el regista Massimo Navone, e Raoul Cremona che l’è minga domà on bravo prestidigitator ma l’è tutt on prestigio. Uei, s’eri on poo preoccupà. Con 50 compagnii teatral, nazional e internazional, che presentaven el repertori, gh’era pocch de scherzà. Ghe n’era anca voeuna che la faseva ona commedia del me amis Luigi Lunari, la famosa Tre sull’altalena, rappresentada in tutt el mond, e in Italia, da on para de formazion professional, dal teater amatorial, e ‘sta volta girada tutta al femminil. Sì, i tri omen protagonist, el Lunari, che con i so’ test (Non so non ho visto se c’ero dormivo e Non spingete scappiamo anche noi) l’è stàa l’artefice del success de I Gufi in di ann ’60, i a trasformàa in trii donn. L’è on genialon.
L’ann che ven ghe mettaroo in scena, giust per recordà la fin de la Prima Guerra Mondial, Oh che bella Guerra, ona sparada contra la bellingeranza e gli alt Comand che manden a morì milion de soldà in nomm de se sa no cusè, dell’egoismo di nazion e de on Dio che el voeur no savè di guerr e chel tiren semper in ball. Podi minga tiravi a man tutti. Ma l’ideator e direttor Renato Lombardo, che se me sbagli no l’è anca el noeuv gestor del teater Libero de via Savona, iuttà da la direttrice artistica Francesca Vitale e dall’Ufficio Stampa Ippolita Aprile, e dall’intèr staff (gh’hoo de div i nomm perché han fàa ona manifestazion bella, importanta e svelta), l’ ha presentàa 4 spettacol per 12 teater, dicasi 48 pièces (pronuncia come se scriv). Hinn passàa ’me l’oli, colorid, viscor, spettacolar. Roba da insegnà a la television come se presenten i premi dal Donatello a quei letterari che parten ben e dopo des minutt fann cress la barba. Donca: Marta Zanoli, a la comunicazion, Anna Merlo a la direzion tecnica cont l’assistent Nicola Ciaffoni, Elisabetta Carmignani, sviluppo risorse, e la segretaria Marta Erica Arosio, i segretari gh’han semper trii nomm. Sett donn e on homme, a la faccia delle quote rosa del Parlament che riven no al 50% e seguten a parlann come fudess on vanto la percentual doe ’hinn rivàa. Beh, insomma, a la fin de la fera nunc cos’emm fàa?! Bertolino l’ha fa’ ridd con tri o quatter moment di so’, insèma a on panegirico per i partecipant al festival (gh’avevom 30 minut in quatter. Raoul col so bravo pianista l’ha fàa la part del leon con pussè de mezzora a disposizion), poeu l’è passàa Massimo Navone, regista che in quel moment l’era no in veste de metteur en scen ma de intrattenitor bravo, stringà e cont tutti i temp al so’ post, e peu han ciamà mi che hoo parlà dei prim temp del cabaret inventà dall’Enrico Intra e portà in gir da I Gufi. Des minutt, triì battud, do canzon cont la Porta Romana cantada a vos spiegada da tutta la platea in doe in prima fila gh’era Grazia Maria Raimondi applaudida quand l’ho nominada, Fiorenza la miè del Jazzman che l’ha improvvisà a Jazz, magistralment, I scarp de tennis de Jannacci, e quell’attor che oltre a vess vun dei bravi in Italia, l’è quell ch’el legg i motivazion a la consegna di Ambrogini d’Oro a Sant Ambroeus, da vint ann e de pu: Umberto Ceriani. Ueilla me sont sgravàa.
Hoo Fàa tanti nom che magari ai lettor fann indifferenza. Ma invece mi troeuvi important che la gent i e senta menzionàa. Semm inflazionà tutt el dì cont i nomm di calciator, di allenator, italian e stranier, in di trasmission tivu giren semper quei che fann de mestèe gli ospiti, el mond l’è pien de opinionist che de opinion ghe n’hann pocca, i giornai se venden pussè se gh’è on quaj scandol dai titol e nominativ che occupen tutta la prima pagina, ogni settimana se vota e quand votom minga numm, se parla di elezion stranier, cont i nomm di candidati, e peu ghe el ritorno dei terremott cont i nomm de quei che paghen no– hann minga mis a post quel de Messina, dell’Irpinia, figuremes se sistemen quei pussè recent, ì migrant , el terrorismo coi so mort, i so paur, i so nomm. Lassii che me sfoghi almen quand parli de Teater che i argoment citàa i e tratta tucc. L’è per quest che se dis che el Teater l’è maester de vita. Almen insegna on quaicoss a num ignorant che leggium poch. Recordemes el detto milanes: Gent ignorant che non capiss on’acca/ gh’han dàa i liber de mangià a la vacca.