Ciapà ’l treno? Ghe voeur fortuna

Milano, 18 marzo 2018 -

Ogni settimana lo sguardo di Roberto Brivio affilato in decenni di satira, esercitata come attore, scrittore e chansonnier, illuminerà angoli della Grande Milano di oggi: i suoi vizi, le sue virtù e soprattutto la sua gente, da raccontare con irriverenza e tenerezza, come sa fare lui. E in lingua madre: il dialetto milanese.

Semm semper in ritard. Gh’emm semper de ‘spettà. E i alter aspetten nunc. Ma perché, me domandi? Te set in stazion, treno Saronno Albairate-Vermezzo ògni mezzora. Te guardet el cartell cont i display e giamò prima de partì da Saronn el gh’ha cinq minut de ritard. El podaria recuperà aumentand la velocità! No. El va pussè adasi. El riva a la stazion de Lambrà con des minut de ritard. Te penset ch’l faran apposta per minga intasà la linea. Ma perché fann i orari? La movimentazion l’è complicada? E allora mett on treno ògni ora! No, seguten a tegnì la mezzora. Peu, se el ritard l’è foeura de la grazia de Dio, sopprimen el treno. Ma te le disen minga. E ti te spettat quell che doveva ‘rivà mezzora prima e te ciappet quell ch’el riva mezzora dopo, o anca trii quart d’ora e te fann cambià binari. Me ricordi la ripresa del film “Le vacanze de Messieur Hulot”. A la gare (stazion) annoncen che el treno che doveva rivà al binari 3 el riva all’1. Dall’alt te fan vedè el spostament di viaggiator. Ma contemporaneament se sent la vos dell’altoparlante che annoncia on alter cambiament. El treno che doveva rivà al binari 12 el riva al 8. Alter spostament de la gent. Alter cor affannà con valis, pacch, bors, cest. Quei del des riven al 12, el dodes, al vott, el vott al 2. Gent che la cor. che la se affanna, che la se scontra.

Mi l'hoo provada e minga in Francia, in Italia, e minga cinquant’ann fa, la settimana passada. Ad ogni cambiament ona corsa, ona sudada, ona scarligada, on inciamp in d’on gradin, on scentro cont on alter. Adess hoo capì perché i e ciamen passegger. Perché seguten a passeggià sui marciapè de la stazion, come i dannà del Gustavo Dorè che popolen l’Inferno de Dante Alilghieri. Mi disi che el Signor, dall’alt, quand el ved ‘sto trambust el decid de bonificà i peccà di viaggiator perché in a drèe a patì pèn che el foeugh l’è ‘na roba da dilettant. Sul Metrò i ritard gh’hinn domà se on quaivun el se sbatt sui binari, se gh’è on interruzion de corrent, o on guast de ona quaj carrozza. Dovarissen dì el perché de on ritard, inscì el viaggiator se ne fa ona reson. Ma lor, quej de l’altoparlant veouren tegnì el segrèt. In sui mezzi de superficie i problema di ritard a hinn divers: traffich, scambi del guidator, gent che la ghe mett ona vita a montà in carrozza, sul Bus, magara pien. A volt hoo vist andà foeura de rigol el troller, oppur on scambi che el funziona no. E allora el tramver el blocca el mezzo, el mett a post, a man, la perteghetta, el va cont el fer, ch’el someja a on piede di porco, a smoeuv el scambi. Temp ch’ el se accumula sui ritard dovù a volt a on corteo funebre (pocch per la verità per via del cost : 1299 tutto compreso, corteo escluso per i permess de viabilità, de sosta, de occupazion spazio pubblich): “ecco che per strada/ passa un funerale / ossequi, condoglianze, come va?/ Ha visto Porta a Porta?/ Ho fuso il Maserati. Ma pensi che vergogna/ quella c’è/ E’ stato un grosso colpo. Ma non li prendon più. La tratta 30 giorni a Cefalù. Sembrava un angioletto. È morto come un re. Aveva segretaria e pied a terre. Un vecchio si avvicina e tocca il braccio ad un parente. Ma pensi che l’ho visto in ascenseur. Non mi fate un torto. Datemi un cordone. Ricorda l’anno scorso a Courmayeur?!” (da Funeral Show di Brivio/Patruno. Ediz. Voce del Padrone, You tube…I gufi a Colori). Ritard, la mattina tra i ses e mezza e i des, anca in su la trangenzial in doa te vet giamò a pass d’omm. 

Roba da domandass “ ma quella gent, i automobilist, o se leven su ai cinq e se metten in marcia dai ses per vess puntual in sul lavorà, o ciappen cicchett in progression geometrica. E numm se lamentom se vegnen no a teater el martedì, mercoldì e giovedì. Mi consigliaria on orari pussè comod per tucc, ma le dovarissen osservà tutti i teater de Milan e anca quej del rest d’Italia. Inizi spettacol ai sett e mezza, come fann a la Scala. Basta cont l’andà a ca’ a cambiass, tant se l’è minga ona prima mondana tipo quella de Sant’Ambroeus, van tutti a teater vestì casual, e certi volt on casual firmaa. Finì el laorà, te raggionget el Teater, te vet a fass on gir d’intorna cont la persona che la te accompagna, quatter ciaccier, la fila per i bigliet se ti e gh’heet no e depeu la rappresentazion. Quand te vegnet foeura te gh’et el temp de andà anca al ristorant se te ven voeuja e soratutt se te gh’et i danèe de investì in ona cena. Te podet andà a cà cont i mezzi o trovà la macchina in doa te l’heet lassada la mattina. Rivà a cà,, se te gh’heet minga sogn, te fet in temp a vedè la seconda serada in TV e anca el proseguiment de la prima, tant a fan di programm che finissen pù anca se alla longa rompen i ball perché a hinn ripetitiv e noios.

La noia la se mazza cont la canzon de Califano e con la varietà di robb che te vet a faa. Quand, ai primm temp de la mia carriera, che l’è no stada luminosa perché sont minga on scienziàà, perché hoo inventà nient, perché cossa te voeuret che ghe frega al mond de I Gufi bell e dessmentegà, perché a sont minga stà bon de lassà on’opera che la faga parlà nel temp (cont quest voeuri minga piangiom addoss perché hoo semper faa quel che hoo vorsù), disevi che in di lontan 1950/58, lavoravi all’uffizi pubblicità de on giornal peu in ona ditta che la vendeva detersiv, peu hoo fa’ el rappresentant de stècch (se ciamaven Fluc ed eren a la clorofilla), e hoo vendù i primm pennarell, per strià la vita inventavi i giornad de la poesia, i recit a l’oratori, la compagnia de prosa a la scola seral del Pitagora (el gh’ha recità e cantà anca el Teo in odor de entrà in del Clan de Celentano), andavi cont Gigi Vesigna ai coctails de la Terazza Martini, ai presentazion di liber, a Teater per tornà la sera a cà a pè, a cercà de entrà ai primm cinematografic con la tessera de collaborator d’ona rivista mensil e quand gh’avevom famm e pocch danèe, giusta ai temp de l’Accademia del Filodrammatici, entravom al Pam Pam per ordinà “il coperto”, mangià pan e olii e andà via cont la voeja de impieniss el goss cont ona insalatòna, che allora, la costava pocch e nient, minga come el prezzi de adess, alt che l’è mej mangià on second con contorno. Te manca che te metten in sul menù el Tan o el Taeg e te set a post. L’alter dì in d’ona trattoria del centro hoo trovàa ona distinta sott al piatt cont i famos Tan 4.45% e Taeg 6.33%, App-connect in Waze, active info display e frenante automatich, limited edition, 208 black line da 100% euro mes. Advance connectivity, disegn & sport pack. Hoo nanca ciamà el camerer. Sont sicur che el messagg a l’era per compragh i scarp e fall fann no scarligà (frenante) nel servì i client. Hoo miss in de la busta do’ euro e chi s’è visto sì è visto.  brivio.roberto@yahoo.it