Fabio Wolf
Marta Marangoni
è passaa anca el Dì de la Memoria, hemm vist e sentii tanti robb, per fortuna la memoria l’è ancammò important per tucc, perchè l’è on patrimoni che l’è minga de trà via, ma de conservà gelosament per quej che vegnarà. La Shoah l’è ona maggia negra in de la storia de l’umanità, e poeu i partisan del nost Milan che l’ha pagaa on gran prezzi per la libertà. I deportaa italian a hinn staa 40
milla, 8 milla eren ebrej ma i alter eren tucc politich, come i operari de la Falck, de la Pirelli, de la Breda, che se metteven contra la violenza nazifascista e sbassaven minga el coo, cont i scioper del ‘43 e ‘44. Di quest, come la dis la Segre, la memoria l’è giammò quasi perduda, ma numm Duperdu voeurum tegnila ben salda.
E allora gh’è ‘na vos che la parla per tutt i deportaa di fabbrich. L’è el prezios liber
“Da la fabbrica ai lager” del Peppin Valota, el fioeu de vun di deportaa de Sest. El regista Renato Sarti el g’ha traa foeura on spettacol meraviglios per regordà: “Matilde e il tram per San Vittore”, in scena al
Teater de la Cooperativa fin a questa domenega. I testimonianz di tanti donn che hann perduu i lor omen in questa tragica storia, miee, fioeule, sorell, mader, tornen viv sott ai noster oeucc grazie a la intensa interpretazion de la nostra Marta e de la Rossana Mola, giammò superb in “Nome di battaglia Lia” da pussè de vint’ann. Perdii minga l’occasion de scovrì quajcos de pocch cognossuu.