I milanes felis fann volentera volontariaa

Marta M. Marangoni

e Fabio Wolf

Milan l’è ona cittaa felis? I milanes a hinn felis? E poeu che cossa l’è la felicità? Impossibil de dì. A g’hann provaa da semper poeti, scrittor, filosofi e santon, ma ancammò la se capiss minga. On recent studi de la London University el dis che la felicità la riva quand che se ghe pensa minga sora. Se pensomm a la felicità, lee la dispariss! Donca sarìa mej gnanca fass la domanda. E allora come l’è che se fa? Facil! La London la g’ha la soluzion: pensà ai alter, iuttà chi g’ha de besògn e vess disinteressaa. E allora Milan - che per definizion la gh’ha el coeur in man - l’è de segur felis. In de la nostra cittaa in del ‘800 e in de la prima metà del ‘900 hinn nasuu istituzion e associazion benefiche e filantropiche per sostentà la gent in difficoltà: famili, mader e fiolett, lavorator, vecc, donn, baloss, baluba, disperaa. Chichiscì se dann danèe, mangià, medesin, addirittura la scoeula per imparà on mestee e dagh la possibilità de andà cont i sò gamb. Quant milanes generos hann regalà robba, danèe e temp (ona cossa tant preziosa per lor). Quant esempi de altruism, impègn, intelligenza e bontà de anim. I milanes fann volentera volontariaa (ghe scusii el gioeugh de parol) e le insegnen anca ai giovin perchè la tradizion l’è questa chì. Anca st’estaa cont i prezzi ai stej e cont la crisi, g’hè tant besògn de iuttà. Insomma num milanes semm solidal, magari parlomm poch, però sèmm semper lì a dà ona man e ghe demm denter a manetta. Ecco perché semm felis!