Quaj coss de umoristic per fa no pensà a tanti demenzialitàa

Milano, 13 agosto 2017 - Nei vocabolari quei che g’hoo mi “Milanese –Italiano” e viceversa, la parola demenzialità, la se troeuva no. Eppur el mond, incoeu ma anca ier l’era pien de demenzialitàa. Per num giovin appena diplomà attor all’Accademia(mi hoo fàa quella dei Filodrammatici nel lontan 1959 e da allora hoo semper laoràa in teater, per el teater col teater, derbend teater e per teater metti insema la Radio e la Television) i demenzialità eren propri di scemenz inventà lì lì al moment. Esempi de canzon demenzial: “laggiù all’equator fa caldo, fa caldo, perciò all’equator si suda, sisuda, invece al Polo Nord fa freddo ma da morire perché al Polo Nord c’è gelo da non finire”(Albertarelli). Oppur se cantava “ se l’arciveescovo di Costantinopolii si disarciveescooviscostantinoopolizzasse vi disarcivescoviscostantinopolizzereeste vooi?” e ancamo’ “sopra la panca la capra canta sotto la panca la capra crepa”. Adess i demenzialitàa hinn pussè intelligent, hinn minga demenzialità, hinn ossimori, cioè on procediment stilistic che consist nel mett visin termini dal significàa contradditori, come “ un silenzio eloquente”. A mi i ossimori fan ridd. Come fann ridd certi battud: “ sont nassù all’ora del disnà e da allora hoo fàa nient’alter che mangià.” “ El mattin el gh’ha l’or in bocca, anca mi se mettessi la dentera” “ El metal ch’el perd semper a l’è el fer battù” “torneo de tennis fra onorevol: se cerchen racattaball” “ domà su Internet te scarichen” “ se cerca ona segretaria che la gh’abbia almen do leng”.Incoeu per vend on liber ghe voeur el titol brillant, el titol ch’el tira, ch’el fàa balà l’oeucc.Es: “Me ciami Mario e me foo de Coca”. El saria on success de centmila copi. La differenza tra ona circense e Ennio Doris? “La circense la fàa balà l’hula hop sui fianc, Ennio Doris i e mett in terra e ghe costruiss intorna ona banca”.

L'important l’è de trovà semper on quaj coss de umoristic. Quand la miè la te vegniva incontra cont on sorris per ditt “Han tajà el telefono” cosa te rispondevet? “Fa’ nient gh’emm el cordeless”. E l’è on scherz che la miè le tollera no. Anca mi tolleri no de vedègh on quaicoss ch’el brilla. Pensi subit a ona bomba puttost che a ona boccola diamantifera.Ona volta sont andàa a confessass. “Hoo peccà contra el sest comandament” “quanti volt?” “Sont vegnù a confessass minga a vantass”. On altra hoo vist on malàa dal dottor. “Me senti minga ben, me gira el co’, me se sfiacchissen i gamb, me crollen i spall” “Te manget?” “ salti l’antipast e se mangi el primm salti el second. Ghe do denter cont l’insalata e la frutta e a la fin bevi on para de caffè” “Vin?” “du dida orizzontal a ogni past” “ Sess?” “on para de volt al mes” “ l’è on poo pocch” “ behper on curà de campagna! l’è difficil trovà donn disponibil!” El sesso l’è ona roba importante per el marì e per la miè. “cara per el noster anniversari de matrimoni faremm l’amor come mai l’ emm fa’:” “ che bell, e come? come?” “ s’cena contra s’cena” “ ma l’è impossibil” “cara, hoo invitàa on’altra coppia”. E semper in materia de sess bisogna scriv la differenza tra terror e paura. “La paura la te ciappa la prima volta se te riessen no a fàa la seconda, el terror el te ven la seconda volta che te riesset no a fàa la prima”.

Femm cunt de vess in spiaggia sotta l’ombrellon a fàa i parol crosad. Subit me vegn in ment la battuda “come l’è mort, Marat? Pugnalàa in ogni cruciverba” . Adess gh’è pu niente de original. Te diset ona strampalada e on ora dopo te la troeuvet su UattsApp, su Yu Tube, su Face Buk, se te set on pover mortal. Se te set vun dello Smart Set te uset anca Instagramm o Amazon. Appena leggiuu: “ona volta la gh’era la ca’ di sogn, adess gh’è el sogn d’ona cà” “Gh’aveven nient in comun e allora s’hinn sposa’ in gesa” “Non si è solidi senza liquidi” Difficil de capì se te diset no la frase in la Banca che l’è adrè a studià da on para d’ann ona toa “richiesta di mutuo”. Pussè facil invece “Una volta la TV la gh’aveva il tubo, adess la var on tubo” e ricordemm a tutti i produttor Tv che l’indice de gradiment el pò tramutass in medio o anular. “ Pierino chi l’ha sonà? “ “On scior che voleva quaicoss per el ricovero di vecc” “ e ti cosa t’è dàa?” “La nonna”.

Quaivun se domandarà el perché de sto florilegio de battud e de barzellett. Semm in vacanza no? Tutti comperen l’enigmistica per legg i barzellett. Beh, n’hoo tirà foeuraquaivuna dal me liber “Attenti al Gufo”, ormai esaurii come numm per el cald afos.Sì, podevi parlà di strad pien de cartasc e de cicch, di operator ecologic che spazzen no come dovarissen, de la gent che la spetta no che i viaggiator vegnen giò dai carross e te salta adoss per ciappà el post liber, che i treni che van ad Albairàa gh’han l’aria condizionada giusta e che mantegnen quasi semper l’orari stabilì salvo quand sont in ritard de mezzora e mi me domandi – dal moment che vegnen de Saron, el sarìa minga mej cancellàa la corsa?- , che certi volt l’aria condizionada di supermercàa l’è talment gelada che te sentet la necessità de on golfin, che i distributor de benza e gasolio hinn matt coi prezzi. Ghe on quaivun ch’el se profitta e el fa pagà 1, 889, mentre alter 1,468 al liter. A l’è ona bella differenza, servito o self. Inveci hoo preferì cuntà storiell che passen e van via, che fann no pensà (incoeu se pensa giamò trop) e che te fann sorrid come questa sentida dal perucchèe: “I capelli li vuole indietro? No, no, se li tenga pure”.

brivio.roberto@yahoo.it