Si è sempre costretti a correre o perché si è in ritardo o perché siccome si è in anticipo alla fine ci si dimentica di noi
Milano, 18 agosto 2017 - Bon Natall. “Attent… passàa el ferragost, Natall el riva come on fulmin…!” L’è minga on proverbi o on moeud de dì milanes. L’hoo semper dit mi, de poeuavè constatà che se fa nanca a temp a pensà on progett che riva subit la famosa festa. Per i scoll te set giamò in ritard. A comincen i primm de Settember e i Presidi hann giamò fàa i gioeugh. I Comun gh’han la programmazion longa, ma se te voeuret fa on quajcoss in Dicembre te disen che te set in ritard. Parlemm no di Società che fann i budget (legg come l’è scritt) in Ottober, ma de l’ann passàa.
E allora, quand te set in temp a presentà on progett? Te devet vardà la data de scadenza del bando. Te la guardet, magari l’è a la fin del Agost, o Settember, te compilet quel che gh’è de compilà, e te restet in tutt’i casi foeura. Cont on po’ de fortuna te ricevet anca ona lettera, vers Natall, per informat che t’han minga ciappà in considerazion perché i domandi eren tanti e ti sì te set rivà in temp ma tra i ultim e lor hann comincià a scernì meneman che rivaven. Te tegnaran present per el prossim bando, se ghe sarà, dato che el to progett l’era degn de attenzion, ecc. ecc. I solit ball o parol come quej de la canzon cantada da la Mina. Te scrivet che l’è minga giust, e te spettet ona riposta che la rivarà mai. E allora second el proverbi ch’el dis “I ball hinn ball ma a schisciai vacca fa mal” tutt dolorà te penset ai tri o quatter punti che segnen l’ann: el to’ compleann e quell di component de la toa famiglia, carneval, pasqua, la fin di scoll, ferragost, natall. Hinn lì i do ricorrenz, visin. Ecco perché passàa ferragost, me ripeti, l’è subit Natall.
El temp el passa come on fulmin. Se te dann a Magg on appontament a Settember e te diset “l’è tard, vardii che el Natall el riva ‘me on fulmin!” te risponden “Eh, manchen ammò sett mes! Adess l’è tropp prest., gh’emm nanca i riferiment. Dopo ferragost!” E “passà el Ferragost l’è subit Nadal”! besogna cor. Se te coret no te restet al pal de partenza. “pensà ch’el mond se ferma l’è de marter, mort on Papa se ne fa subet on alter” e attent anca a cor perché…“gh’è gent vestida de agnell coj dent de loff, che se la podess la te sbiottaress int on boff!” Te podet andà avanti ona vita cont i proverbi. “Chi non usa, desusa”. Il “chi” indicativ l’è maester: “Chi se loda s’imbroda” “Chi sbianca la cà le voeur fittà” “Chi troeuva on ver amis troeuva on tesor” “Chi rispetta ama” “ Chi se voeur ben s’incontra” “Chi sprezza ama, e chi ama caragna” “Chi rid el venerdì, piang el sabet” “Chi bella voeur parì, grand dolor besogna soffrì” “Chi no nass bell no po’ deventà bell” proverbi de minga dì ai visagiste che ciappen ona brutta anatroccola e la trasformen, salvo poeu falla piang la sira quand la se strucca. Del rest el proverbi el salva anche i donn brutt: “Donna bella l’è insidiada/donna brutta l’è scansada/ ma per fàa ‘na pastrugnada/ mej la brutta dessedada/ che la bella indormentada”.
Ma andemm avanti.“Chi ha besogn slonga la man” proverbi che me fa’ vegnì in ment i poverett che domanden la carità davanti ai Ges. Me sont fermàa on dì a contà quanti ghe daven on quajcoss. Nissun . Ona sciora dall’aspett benestant la se ferma: “Per favore, signora, faccia la carità, sono tre giorni che non mangio” e la sciora, quasi scandalizzada “Oh, no, no, buon uomo. Così non va, dovete sforzarvi!”. Semper davanti a ona Gesa gh’era ona veggetta che la cantava “Faate la caritàa a una povera vecchiettàaa” a cappella, senza accompagnament musical. El s’è avvicinà on ghisa e vist che l’era no ona extracomunitaria, l’ha bloccada “ Lo sa che è proibito cantare così per strada” la risposta l’è stada d’ona prontezza ammirevole “Vorrà dire che domani affitterò un negozio”.
Semper a proposit de slongà ‘na man, in metrò hann sona’ fisarmonicist eccezional, flautist che soffiaven de travers sora ona base de orchestra; ona tosa che la sonava l’arpa tra on scosson e l’alter; on quartetto d’archi: viola, violin, violoncell, contrabbas; on trio de fiaa: tromba, trombon, corno. Sonen e peu passen cont on biccerin de carta a tirà su danèe. La gent indifferenta la fa’ finta de guardai no. Come quand el passa el solit fioeu e te mett sui genoeugg on bigliett che nissun varda. In silenzi el passa a ritiral. El fa el so’ mestèe senza disturbà nissun, senza scagg. E chi entra in gioegh on alter proverbi: “Chi maa no fa, paura no gh’ha” discutibil perché second mi no gh’han paura anca quej che el maa el fan anca se “chi voeur coppà on can troeva la scusa” e se la troeuva no lu la troeuva el so’ avvocatt che el tira a man el proverbi “Di voeult scapuscia anca el pù bon cavall” tucc e duu convint che “Di voeult con pesg se fa, con pussèe la va ben”.
Ghe sarìa de scriv des liber a fàa i connession tra proverbi e proverbi, tra moeud de dì’ e i contrari, ma hoo taccà col Natall e cont quell finissi. “San Lorenz (10 Agosto) la gran caldura, Natall (25 Dicembre) la freggiura.” “Ferragost l’è long de arrivà, Santa Luzia (13 Dicembre, ma per tanti la sostituiss el Natall,) l’è el dì pu curt che ghe sia” “ 15 de Agost se coeus de cald, Natall se coeus de frecc” e in barba ai prevision catastrofich “ Se farà bell el dì de San Gall (16 Ottobre – l’è chi a duu pass!) farà bell fina a Natall.
brivio.roberto@yahoo.it