Ragazza al computer (foto repertorio)
Milano, 14 giugno 2020 - Hoo sem per dit che sont minga simpatich ai macchin cont denter i robot perché ogni volta che ne dopèri voeuna hoo semper la sensazion che me toen in gir. Tachi l’aspirapolver e inveci de aspirà el me espira, me metti al computer e all’improvvis el me cancella tutt, monti in auto e la cjav dell’avviament la se blocca, la stampante la me stampa nient e la gh’ha i toner noeuv, el telefonin el cjama chi voeur lu, e seguta a tegnì averta la comunicazion anca quand l’hoo smorzà, el se mett a sonà in del bel mezz de la nott, l’obliteratrice la me blocca el bigliett e l’alter dì hoo ciapp à’na multa perché l’aveva minga timbrà e quand l’hoo fa’ provà dal controllor la se missa in funzion, e, in gesa, al santuari de San Riccardo Pampuri hoo pizzà ‘na candila elettrica e l’è scoppiada.
Quand cunti ‘sti robb, quaivun, l’ esclama “va’ a fass benedì!”. Sont minga d’accord. Hinn i macchin che ghe l’hann cont mi. Appena me veden se disen “uei, l’è rivà el pistola, dai che ghe femm i dispett inscì el s’incazza”. Se disi ‘sti storii ai tecnich, me dann del matt. Ma mi sont come Roberto Vacca, come Asimov, credi che i macchin, che te superen in intelligenza, pensen, te toen in gir, e on dì o l’alter te mètteran sotta. L’è per quest che Asimov l’ha inventà i legg de la robotica. Per salvaguardà l’omm e fall minga andà in balìa de ‘na macchina che, per quanto la sia intelligente, macchina semper l’è. Fina a quand ghe metteran denter i sentiment. Allora, Signor salva ‘sti pover mortal fa’ de carna e oss.
E l’è stada la preghiera che hoo fa al Santuari de Riccardo Pampuri in quel de Trivolzio (Pavia). M’ha portà, insema a la me tosa Federika e la miè Grazia Maria Raimondi, mia sorella Maria. A Trivolzio perché Riccardo, l’era laureà in medesina, già dottor in ospedal, e fraa Terziari Francescan. L’èmm ringrazià perché senz’alter el gh’ha dà ona man ai so colleghi volontari e no, che s’hinn prodigà cont i malaa de corona virus. Uei, de fadiga n’hann fada e hinn a drè a fann anmò laorand anca desdott or de fila. L’hoo ringrazià, sont saltà in auto…la batteria… scaregada e senza che mi toccassi on qualsessia mouse.