Evelina Sironi e Mario De Angeli nella popolare trasmissione radiofonica “Cicciarem on Ciccinin”
Milano, 3 aprile 2017- Evelina Sironi e Mario De Angeli, eren Gregori e Francesca nel ‘55/56/57. La trasmission radiofonica intitolada “Cicciarem on Ciccinin” talment seguida che perfina a S. Sir, in del temp che guardaven i partid, i tifos de Milan e dell’Inter tegneven i primm radiolin Sanyo sull’oregia per sentì la Liliana Feldmann che la cantava cont Febo e la grancassa, per ridd cont i battud de la coppia pussè litigiosa de Milan, ona specie di Andy Capp della settimana enigmistica, e aspettà i avventur e i canzon che tutta la compagnia sotta l’esperta guida de Enzo Covalli, on regista radio bon mel pan ma bravo e intelligent la faseva ‘na volta la settimana. Peu de Angeli s’è stancà de segutà a fa’ el Gregori e la Sironi m’ha domandà se vorevi fall mi. Detto e fatto. Sont diventà, minga per la radio chè la trasmissione la faseven pu, ma per el Teater, Gregori. Me recordi che avevi ciappà i medesim intonazion del me predecessor. Avanti inscì per on quai ann e la Sironi l’ha desmett de fa’ Francesca. La part l’ha ciappa Grazia Maria Raimondi. Medesim intonazion.
Ona tradizion che la se ripeteva tegnend alt el concetto della litigada in famiglia. El bell che andand avanti in di ann mi e la Raimondi segutum a litigà alla manera dei du personagg inventà dal Carosso. Sont minga sicur ch’el sia lu, perché a quel tempo la radio rivista de Milan la gh’aveva scrittor come Carlo Silva, Menicanti, Spiller, e poeu Terzoli. Gent che se la fudess ancamò viva daria ona spazzada a quel che ciamen “comico” incoeu. Ma tutta sta cicciarada perché nel ratellà, la Francesca la dis a proposit de ona bolletta della lus considerada trop cara: “ Se te vet avanti inscì finirà che te me sopprimet la lus elettrica” e de rimand Gregori “E ti te me sopprimet i danè del portafoeuj”. L’ho mis in del titol perché el portafoeuj gonfi el tend incoeu a vess sgonfi, soratutt quand se tratta de spend i danè per dimagrì. Te tiren foeura rezipe (ricette) che nanca se te studiet ai scoll seral te vegnen in ment. E la cannella col caffè, e el caffè verd ma trattàa in manera che’l se mangia i grass; el tè verd ma minga verd… verd. El minestron fa’ con i scigoll, la versa, el fenòcc, trii o quatter dadi ma “vegetali”, ona scatoletta de pelati. Du or de cottura e via ona bella tazza che la serv anca a fat andà de corp. Si, ma dopo se te manget? Tutti i ser verdura alla griglia, a mezdì o pess o polaster o legumi o insalatta, carna ona volta la settimana, oeuv ona volta, pan pocc e nient, carboidrati ona quaj cossolina, acqua minga gasada, vin on biccer alla sera, frutta 70/80 gramm.
No ai banan, ai cachi, sì ai mel, ai scires. Insomma te disen che “dieci medici americani dell’Università di Boston” han studià per mett in riga i grass e faj diventà magher. Saran minga quei des “medici americani” che ona volta consigliaven el dentifricio Colgate, o quei des “medici americani” che han esperimentà el Viagra, el Cjalis, la pillola. Fatto stà che i commission de dottor hinn semper formà de des person, che i speriment hinn fa su ona totalità de 800 persone, e che per mandà giò el prodott te devet legg i controindicazion. Legg e se te set onest te sbattet i pastili nella ruera, el sciropp nel cess, la pomada prima che i fioeu la spalmen sul pan te conven liquidalla (renderla liquida) nel lavandin del bagno, perché second i consili del milion de laureà in medesina (ch’hin quej che t’incontret per strada, i amis, i parent, i visin de ca’ e anca i lontan, i conossuu e i forest, tutti cont la lor esperienza a dat pussè che consili) per dimagrì te devet fàa la “dieta delle uova”, du la mattina a la coque, du oeuv dure ai vundes, trii con l’insaladda al disnà, tri in cereghin la sera, e se de nott te se svegliet cont on poo de famm fass du oeuv cruu scisciand ross e bianc da on bus fàa cont ona guggia. O anca la dietta del persutt o dell’emmental. La mattina mezz etto de giambon e mezz etto de emmental accompagnà da on biccer de Porto. Idem ai vundes, idem ai tredes, idem ai cinq, idem alla sera. Mi l’hoo provada. Mangiavi ogni dì due etti e mezz de giambon, due etti e mezz de emmental e bevevi 5 biccer de Porto. De dimagrì se ne parlava no, in compens s’eri semper ciocch. L’era el temp che la nasseva la mia tosa.
Me ricordi che la Raimondi, nel famm vedè la Ninin, la m’ha dit: “Meno mal che la gh’emm concepida prima che te cominciasset a fa ‘sta dieta!”. Adess me lassi ciappà ancamò in di red di dietta ma cont poca voeuja. Segui i indicazion el primm dì, al second, al tèrz me capita ona zèna e quand vu foeura sont minga bon de controllass, specialment in di pastizz che metten in taola per l’aperitiv. I patatin, i oliv, i cocumer sott asèe tajà a tocchei, i biscott salàa, la pancetta, el salamm, la fertada, detta kisc, portada dalla visina, che se anca la te pias no te devett dì che l’è bona e fa’ i compliment alla “sceffa”, e la salsa pastizzada, la majonnesa, i patati cont el tonno, i gamberett magari pescà in del lamber, el codeghin, i mondeghili, el grana, insomma quand hann finì l’aperitiv tutti a disen “E adess chi l’è ch’ el mangià ancamò?” e la te vanza tanta de quella roba che te piang el coeur mentre te diset “Aperitif? La volta che vegn te le sognet che mi ne mangi on boccon!”.