Fabio Wolf
Marta Marangoni
Cossa la ghe fa ona loeuggia in su i palazz de Milan?
L’è la famosa “scrofa semilanuta”, ona creatura leggendaria, el simbol pussè antigh de la nostra cittaa.
Ghe n’è voeuna in via Mercanti sora el segond arch del Brolett Nouev. On’altra l’è lì de drèe, sora la Loggia di
Osii (ona loeuggia sora la Loggia), ciappada de on’aquila, forsi per "pubblica memoria essere Milano feudo
imperiale". Poeu ghe n’è voeuna denter on stemma in la cort interna de Palazz Marino. E l’ultima l’è piazzada
sul portich del Palazz di Giureconsulti.
Allora perché?
Bisogna tornà indrèe al VI secol a. C., quand giraven i Celti per l’Europa. Ambigato re di Gall el manda i sò
nevod de la Francia oltr’Alp a cercà on bon sit per fondà ona cittaa: Segoves el va a nord, Belloves a sud. Chì in
Italia! Belloves l’era on grand sognador: la leggenda la cunta che in d’on sògn premonidor el ved la dea
Belisama che la dis: “Là dove troverai l’animale sacro, fonderai una città!” El dì dopo, mentre el marciava in del
bel mezz de la Pianura Padana - che l’era ona padù pienna de acqua e de zanzarinn - el troeuva dinnanz ai so
oeucc l’istess animal del sò scud. E inscì dinnanz ai sò Gall, che ghe credeven no, el decid de pientà el sò camp
propi lì.
De questa leggenda hemm cantà anca nialter Duperdu: “Qui fondiamo la città, la più grande che ci sia della
Gallia Cisalpina, dell’Insubria la regina e come questa scrofa irsuta, ossuta, mediolanuta Chiameròlla…
Milano!”