Parte del cast di “Soffia, so’” di Garinei e Giovannini
Milano, 6 novembre 2018 -
Ogni settimana lo sguardo di Roberto Brivio affilato in decenni di satira, esercitata come attore, scrittore e chansonnier, illuminerà angoli della Grande Milano di oggi: i suoi vizi, le sue virtù e soprattutto la sua gente, da raccontare con irriverenza e tenerezza, come sa fare lui. E in lingua madre: il dialetto milanese.
Per prima roba foo i me compliment all’assessor Stefano Bruno Galli. On assessor a la cultura cont l’aura de la cultura che la ghe gira intorna, l’è difficil trovall. De solit i assessor a la cultura quand ciappen quella carica se acculturen depoeu intanta che se proccupen anca de vess amministrador. Stefano Bruno Galli no. Prima el s’è fa’ on mazz per acculturass de tutta la Lombardia e minga domà de quella. Poeu el gh’ha dà denter, come se el gh’avèss ciappà la laurea in Lombardologia, per savè tutt de tutt e de tutti. E quand gh’è capitada l’occasion de avègh i delegh immagini che el gh’àbbia scrizzà (digrignato) i dent e pronuncià i paroll: accetti anca perché mi conossi i lagh, i confin, i montagn, i tradizion, i città, i usanz e i costumm de tutta la Region, loeugh che gh’an la possibilità de fa’ parlà anca i mur, i vecc monument, i ca’ ( Il Romanzo di Milano di Tito Livraghi ed. Meravigli, in doa ona ca’ appont, la cunta la soa interessanta storia). Dai discors generich me pareva de capì la soa passion per l’antigh e per el modèrno, che ghe pias scoltà i menestrèll trovà sui canton come i professionist che sonen e canten in di teater, vedè e sentì sonà strument prezios che fan part de la storia musical de tutt el Stival, compres el triangol su la ponta. Ovhei, sembra che el cosiddetto “continente” el voeura dàgh ‘na pesciada, fagh saltà i colonn d’Ercole, corr nel Mond, saltà in Europa. Invece gh’è on fil che le tegn ligàa, vincolaa, inciodaa.
El fil de la cultura, di tradizion, del dialett, che grazie a la TV e a Camilleri col so’ Montalbano l’è diventà facil a capì. Andrea Camilleri el m’è sta’ presentà dall’amis commediografo Tonino Nediani quand gh’èmm debuttà al Fiammetta de Roma(‘64). L’era giovin e magher e Nediani l’ha dit davanti a on piatt de ris a la cantonese (serom al restaurant cines) “T’hoo presentà on scrittor che tutta Italia conosserà e onorerà.(trad. vocale)” L’è de lì che hoo comincià a scriv Wari wari ‘u Ferry botte, La lucumutivi, La ballati dillu calciaturi di palluni cacciatu dalla squadri per scarsu rendimentu, cont el me siculo maccheronico. Ghe voraria on Museo, sostegnivi. On Museo per ògni cultura. Per fa sì che nissuna la sia desmentegada. E adess ghe gionti: i Museo hinn minga ona natura morta. Hinn viv, pulsant, pien de storia e de gloria, cont i robb in exposizion che spetten domà el moment de parlà, de cuntà storj fantastich. I Museo hinn paret che poden illustrà moment de vita, de mort, avventur, moment de pas e inutil moment de guerra. La cultura insema a la memoria, l’è el mur portant de la civiltà.
Se i me eren paroll detta’ dall’entusiasmo, i oeucc dello Stefano Bruno Galli disi el nomm tutt intregh perché domà inscì el se complèta) parlaven al post de la bocca. Sont minga on sviolinador. Quei che leggen i me articol sann che se devi da’ contra a ona persona le foo senza remission, che la sia importanta o no. Disen che parli mal de tucc! L’è minga vera. Parli mal de quej che se comporten cont poca civiltà, dimostri sorpresa per quei che fann ragionament bizzarr, estros, balzan, stravagant, , quej che gh’hann on’ idea soa, che la porten avanti con coragg. El semm tucc quanta fadiga se fa a pensalla, completalla, presentalla, sostegnilla, realizzalla. Fan fadiga anca personagg de nomm, che par gh’abbien la fortuna che la ven foeura dai saccocc! Ma quand me capita de parlà ben voo fina in fond, che in ‘sto cas l’è la Lombardia, cont la soa storia, cont el milion de Unni che la gh’hann invasa. On milion! Linguagg, dialett, moeud de viv, de mangià, de vestì, de laorà. Cent, dusent ann per integrai. E i Longobardi che gh’hann dà el nomm? (el completta Stefano Bruno Galli). Parli de I tragedi de famiglia. Alboino che costring Rosmunda a bev nel cranio del pader Cunimondo (vedi Va Longobardo Tango di Brivio-Albertarelli, I Gufi in BN ediz. Rai), argoment che in man a la Barbara d’Urso o a Mara Venier ingolfaria i primm pagin de tutti i Gossip d’Italia. Ghe foo la domanda barbina: cossa el pensa del lagh Gerundo? L’è ferraa anca in quell. “Grandissim, MiBg-Cr-Lo. L’è stà in pè’ fina quand el Barbarossa l’ha bonificaa perché in certi post l’era paludos. M’è capitaa sott oeucc un liber (vedi Lago Gerundo tra storia e leggenda, di Fabio Conti ediz.Meravigli) che illustra anca el dragh Tarantasio, diventà , quand l’era simil a on serpenton, simbol de Milàn ( vedi L’Ultima Milano, film de Brivio/Veronesi, sortida programmada a la fin de Gennar, n.d.a).
A la fin de la conversazion su ‘sti robb gh’hoo dit: I sett generazion de milanes me fann ridd. Numm semm tutti milanes arios, come se usa dì. Domà che sta’ città, femm insema, la gh’ha la specialità de integrà la gent cont ona facilità che la sorprend. Vorevi giontà che la commedia “Siamo tutti milanesi” rappresentada all’Olimpia in di ann ‘50/60 l’ha faa squas ses mes de esauriti cont Nino Besozzi come protagonista. L’Olimpia l’era in largo Cairoli, in doa adess gh’è el Decathlon. I giovin, ma anca i vecc ormai se ricorden pu de ‘sto glorios teater (1000 post) che l’era diventà in di ann ‘70 on Cafè Chantant come l’Olimpià de Paris e che a inaugurall gh’era l’orchestra de Gorni Kramer, e credi che se ricorden nanca di cinema Eden e Piccolo Eden, propri de faccia (di fronte). Andavi allora a Teater cont la claque e el capoclaque, quel ch’el dava i bigliett, se cjamava Margarino, el gh’aveva la vòs come el Mazzarella e scriveva rivist per i avanspettacol. La soa pussè grande invenzion l’è stà el personagg del Gengiva, on tipo che faseva ridd parland cont i laver sbattù all’interno de la bocca, come se el recitass cont i gengiv. E dato che l’era anca el capoclaque del Lirico el gh’aveva la mania de dagh el pountell all’Olimpia per consegna’ i bigliett per el Lirico e viceversa. Credi che stori come questa fudessen pan per la voeuja de cultura de la memoria dell’assessor.
I so proposit hinn cjar. La Lombardia l’è piena de monument, de reperti, de quader, de oper artistch da fa’ concorrenza al Louvre e all’ Ermitage miss insema? Demm la possibilità a la gent che i e poda vedè, gustà, apprezzà. In Lombardia gh’hinn tradizion che se i gh’avessen all’ester sarien bon de esaltai? Femmii cognuss! E mi ghe gionti: la Lombardia l’è granda, la gh’ha tutt montagn, lagh, pianur, fiumm? Sfruttemej. Lu la ved dal pont de vista turistic amministrativ cultural, mi dal ponto de vista del teater. Me metti a disposizion. Cont on assessor a la cultura ch’el sa de cultura, che ghe pias la cultura, che l’era acculturà anmo’ prima de fa’ l’assessor, gh’è semper de imparà. Mi e Guido Veronesi operador a la videocamera oltre che coregista al film, gh’emm fa’ ‘na longa cicciarada/intervista. Duu minutt andaran in l’Ultima Milano. El rest i lettor podaran vedell su you tube sotta el nom: I cicciarad de Roberto Brivio, in pillol de cinq minut ciascheduna. brivio.roberto@yahoo