Chi fa pussée dann la vaca l’è soa

Milano, 30 settembre 2018 -

Ogni settimana lo sguardo di Roberto Brivio affilato in decenni di satira, esercitata come attore, scrittore e chansonnier, illuminerà angoli della Grande Milano di oggi: i suoi vizi, le sue virtù e soprattutto la sua gente, da raccontare con irriverenza e tenerezza, come sa fare lui. E in lingua madre: il dialetto milanese.

L’è on adattament d’on moeud de dì brianzoeu applicaa a la educazion di cittadin italian e stranger che viven in tutta Italia e se ne sbatten altament del viv civil, de l’igiene, del rispett vers i alter (on pret el disaria vers el prossimo). Cosa l’è el prossimo, ona roba che la gh’ha de vegnì? L’insèma di personne che fann part d’on paes? “avanti c’è posto” a quel che el “vegn dopo”? El me amis Mazzotti, quell che l’ha scritt insema a mi el liber “Meglio bastardi che mai, dal diario di un cane”, l’aveva inventà frasi che poden spiegà tutt: “Avete perso l’autobus? Aspettate il prossimo e amatelo come voi stessi!” Eren i temp de la demenzialità e in Italia semm sta’ i primm a falla in di spettacol. “Il cieco non teme l’infarto. Occhio non vede, cuore non duole.” “Quando il tempo stringe, fa un male della madonna” “Milano. Giovane Don Giovanni di periferia si fa trapiantare la mano morta”.

La gent la saveva mnanca cossa fudessen i frasi de fa’ ridd, e men che men i attor o el cabaret che el stava per vegnì foeura dal guss passada la scorlida che gh’emm dà numm Gufi. Ma per passà dall’incipit a quell che voeuri dì, femm no i battud e ‘parlemm di vandali. Quej che, incoraggià da certi intelligenton che voeuren fass passà per intellettual, sporchen i mur, i treni, i tram, i carrozz del metrò cont i bombolett e scriven robb senza significaa, a fa’ sgarbèll calligrafich, semper quej, ripetitiv, che fan vegnì fastidi. Almen ‘na volta scriveven epiteti contra el governo, on partii, on sportiv, on personagg che stava sui ball a la maggioranza. Adess se sa no cossa la dis la maggioranza… de la gent. E allora sporchen, imbratten, per el gust de rovinà ca’, monument, macchin, vedrinn, porton e alter. Se podarissen sporcà el Domm, la Stazion central, e perfinna la Madonnina, le farien. Attenti cont la Madonnina. Cont la mania de fa’ el selfie in di loeugh pericolos e squas irraggiungibil cercheran de rampegass suj impalcadur per rivà a Lee e immortalass in ona foto. Col risultato che se la va’ mal el temerari ris’cia de “mortalass” infilzà in ona Guglia, magari comprada dal Fusetti.

E la colpa de chi l’è? Mi disi che la colpa l’è di educador sia che fudessen pa’, ma’, maester, professor, pret o poliziott (lassi perd i assistenti sociali perché varen propri pocch, taccà ‘me hinn al regolament). Me ricordi che el me papà, quand s’eri piscinin e andavi cont la mamma ai giardin pubblic de Porta Venezia el me diseva “Monta no sui prà: l’è proibì (gh’era el cartell “non calpestare le aiuole). Se passa un ghisa in bicicletta e te catta a schisciagh l’erba, el te da’ la multa. Te la paghet tì. Te mandi a laorà, per pagalla”. E mi che gh’avevi quatter o cinq ann, sul prà ghe andavi no. Ona volta (gh’avevi giamò quattordes ann) sont andà a pescà al Porto di Mare cont on me amis che m’aveva imprestà la canna. Per disgrazia ona guardia m’ha beccà. El m’ha domandà la licenza e mi ghe l’avevi no. L’ha vorsù parlà al me papà, a la sede de la vigilanza. Mi, per dighel, gh’hoo mis ona giornada de sofferenz, per paura del castigh, che poeu hoo ciappà istess. Ona settimana senza andà foeura domà che per entrà in scola accompagnàa e tornà semper cont on responsabil. El me papà l’era taccaa al dover in tutt e per tutt. El sgarrava no. L’era sta’ educaa dai so’, contadin ignorant, a fa’ minga di azion contra legg e el sò comportament l’era de esempi a mi e a mia sorella. Allora l’educazion la partiva dai genitor. Propri quej che adess, se te se permettet de dì on quaicoss ai fioeu, te vegnen a legnà come hann fa’ cont professor, presidi, maester e che seguterann a minga insegnà a ‘sti fioeu come comportass educatament, studià, fa’ minga i prepotent, i ganassa. Come fann a rispettà i regol se hinn prima lor che le rispetten no? Semm in pièna anarchia. Se quaivun el romp on bene comune, ghe dann reson. Se veden ona statua rotta, in terra, a tocch, se ne sbatten. E parli anca de quej che dovarissen vess responsabil.

Porti on esempi. La stazion del metrò a Cologno Nord, la gh’a di capannon in doa mett i treni che sosten per la nott o hinn in riparazion. Da un po’ de temp (on ann circa) duu treni, complet, hinn fermi sui binari nott e dì, foeura. Magari gh’hann de vess demolii e spetten el moment giust. Vùn l’era covert da un telo impermeabil per tutta la soa lunghezza. On sapient imballagg che me faseva pensà umoristicament “te voeuret vede’che quand metterann el treno biott, senza la protezion, le troeuvaran pien de spegàsc, disegnàa, coloraa, pastizzaa?” Ona mattina, dal Bus ch’el me portava a la fermada del Metrò, vedi che la copertura la gh’avéva on smollament al centro del treno. Hoo telefonaa a vun di solit centralin che te rimanden ai numer, hoo brancà on operador per digh come l’era la situazion, pregall de corr ai ripari, de giustà el lembo del telon. M’hann rispost che l’interessaa el gh’era no. Ma chi l’era l’interessaa, el treno? L’amministrazion de la MM? El custode? M’hann anca domandaa come podevi avè vist el treno. Gh’hoo dit che el sbrégh del telon le vedeven tucc quii che passaven o in Bus o in auto o a pè, che se l’andava avanti inscì el telon el sarìa andà in terra. M’han ditt che questa l’era ona supposizion azzardada. Pesg di barzellett che hann inventà sull’arma. Allora hoo desmettuu. Che se rangen, hoo dit. Da quella telefonada hinn passà trii, quatter mes. In doa l’è finì el telon se po’ vedell dai foto. Sciori lettor, el treno cont la soa storia l’è lì a testimoni. L’ignoranza umana la se mett visin a la voeuja de passass la responsabilità. Gh’è minga bisogn de ciamà l’autoambulanza per vedè la rovina che gh’è foeura dal deposit. A la fin quaivun spaccherà i veder, la carrozzeria, l’interno, dovrara’ i carrozz come cess, latrina, deposit de immmondizia. Ghe dormara’, anca, l’occuperà. Chissà quanti cas come quest gh’hinn in gir. E numm, spettator passiv, cont i oeucc foeura di orbitt. E lor, i minga responsabil, semper pussè indaffaraa a lassà perd, tant el treno, forsi, el dovarà vess demolìi. Perché imballal, allora?! brivio.roberto@yahoo.it