Tortora, Villa e Flauto
Milano, 17 dicembre 2017 - A hinn trr studen universitari che s’hinn mis in testa de imità I Gufi e de tirà a man el lor repertori di canzon. On bel dì m’han telefonaa per vegnì da Novara a fass sentì. Mi s’eri a drè a faa i montagg del Film “L’Ultima Milano” ch’emm girà mi e Guido Veronesi e me sont faa raggiong a la post-produzion. A hinn rivà in trii. Vun el sonava la Fisa (Marco), l’alter la chitarra (Jimmi), el terz el faseva el mimo( Simone ). Uei! Complimenti. Bell’impasto vocal, discreta presenza, on poo debol, ma giuin come eren podeven no avegh anmò la statura da palch scenich. Beh, mi che dovevi fa on spettacol al Teater del Popolo de Gallaraa, e al Teater Giuditta Pasta de Saronn, i hoo scritturàa. Per el success gh’hoo dit che podarissen vess i Nuovi Gufi. Han ciappà la svirgula, e hann cominciaa a traa in pè noster canzon. Hinn vegnù a on me spettacol a Cusano Milanino, gh’hoo combinà on puntell cont el Gigi Lunari e… adess giren cont la bombetta, a fan mostre dei noster disk in vinile, e ieri han debuttàa in on teater de Novara cont on spettacolo intitolàa “ Meglio Gufi che mai”. Complimenti. Gh’hinn personagg che riciamen cont maestria la vegia “Indietro Tutta” titolandola “Indietro Tutta 30 e l’ode”, me riferissi a Arbore e Frassica. E alter che rinnoven el mito de I Gufi. “Meglio Gufi che mai”. 1981, on frecass de audiences, letter che impieniven i sac postal (gh’era minga facebook) gent che la faseva fil de mezza giornada per ciappà el bigliett e partecipa’ a la differida, sponsor che faseven a gara per entrà in trasmission, negozi che ciamaven i Gufi a firmà autografi e in cambi impieniven el portabagagli cont vestii, alimentar, scarp, e che mandaven a cà anca i mobil. Aiazzone, Annabella, Gillette, Supermercati Brianzoli, Zangola el buttèr, tant per dinn quaivun. L’era el grand moment di television privàa. Nunc, Lucio Flauto, Ric e Gian, serom i portabandera de la privatizzazion, prima cont i cassett che andaven su e giò per l’Italia e peu per via etere. Renzo Villa el patron, Enzo Tortora el direttor artistic, on accoppiada de success. E adess gh’è chi el voeur ripet “le gesta del gruppo”. Lunari el m’ha ditt che hinn bravi. Me fidi. E hann fa’ ben Arbore e Frassica a inventà ‘sta noeuva trasmission che peu l’è fada cont tochei de la vegia. La sarà on esempi. Arbore l’ha ditt che l’ha preferii mett i spezzon al post de trasformà el programma in ona “parata di reduci”. Paroll giust! E pensà che ‘sti trasmission a hinn tutt variant de “Ieri e Oggi” cont la differenza che per Indietro tutta ecc. du Grand de la comicità gh’hann dà denter cont invenzion e straordinaria simpatia. Me offri per fa ona operazion analoga cont I Gufi. De peu ‘sto florilegio de sviolinad on moment tragic. L’è mort Gianpaolo Belli.
No, l’era no discendent del Belli de Roma, ma l’era on personagg che l’ha passaa la soa vita a organizà spettacol per i ospiti del Redaelli de Vimodron. Mi lu conossevi insema a la Raimondi da almen 40 ann. E gh’èmm laorà in del teatrin del Geriatrico anca come Meneghin e Cecca per quattordes ann filàa, in costum, per i repart, in tutti i ses pian, nel cortil, sota ona tenso, a Nadal, Carneval, Pasqua, Primavera, Estaa. E de là dei noster spettacol anca quej cont la Feldmann, la Sironi, Gamberini, Dallara, la De Angeli, Anelli, el Martucci. Per fa passà el temp ai inquilin de la ca’ de riposo che adess la se ciama RSA, e che la ospita anca quej che hinn in riabilitazion. El Belli l’è staa per ann on punto de riferiment important. Lu e el cardiologo Nino Frustaglia, direttor sanitari. Gh’hoo portà anca Walter Chiari quand l’è borlà giò dal palch scenich del Cristallo, el teater che gestivi in via Castelbarco, adess trasformàa in discoteca. Distorsion a la gamba e al brasc. I primm cùr, e peu intervent d’on fisioterapista che l’è staa bon de mettel in pè. Serom in scena cont el spettacol”Scusate è tutto qui” mi, lu, la Raimondi, e la Patrizia Caselli.
La rentrèe del Walter dopo on periodo doloros. El solit schifos success (disi inscì quand la gent l’è in visibilio), fermàa dopo quatter dì. El gh’emm ripres l’ann dopo al Carcano. Trii replich de gloria, alla quarta el smottament in quel del Cavalese e el Walter l’è minga vegnù in scena perché l’ha ditt che el gh’aveva minga voeja de fa ridd la gent. Per lu el spettacol l’era no “must go one”. E adess, dopo la memoria dessedata dal Giampaolo Belli che el Signor l’abbia in Gloria, ona lettera indirizzada a mi ma per oggett ona domanda all’Enrico Intra. La lettera , sintetizzada: “me piasaria savè dall’Intra cosa ne pensa dell’Andrea Chenier che per la prima de la Scala l’ha occupà pagin su pagin in tutti i giornai”. L’hoo girada al Maestro, la risposta l’è nel solit riquader coloraa de bleu. Ve saluti cont on duell de frasi del spettacol col Walter. “El pecenna personal del Papa: Han dit che costavi tropp e m’hann sospes da la messa in piega” “ El Papa in visita ai tepee nel villaggio de Ginocchio Ferito: Fratelli Pellerossa, l’Apache sia con voi”. brivio.roberto@yahoo.it