El dì de la Memoria e el Giovanni in via Paolo Sarpi

Fabio Wolf

Marta Marangoni

El 27 de gennar l’è el “Dì de la Memoria”, perché in del ‘45 l’Armata Rossa l’ha liberaa Auschwitz. L’è on moment important per la nostra cittaa che l’è on scrign di quej temp là: lapid, prej de topicch, monument, teater, financa ona Cà de la Memoria a l’Isola. Nialter semm appassionaa de memoria e ne pias andà a scovrì i sit indove l’è passada la storia di donn e di omen che hann daa la vitta per la libertà. L’è giammò trii ann che g’hemm on progett de mappatura insema al Comun de Milan: “MuMeMi, canzoni per non dimenticare”. L’è ona mappa del google, indove te vedet i pontin cont el nummer, te schiscet lì sora cont el rattin del tò compiuter, e inscì te podet trovà la storia e la descrizion del sit cont i milanes, anca famos, che ne parlen e anca ona Canzon Fattapposta scritta giò de nialter. Quest’ann hemm incontraa in via Paolo Sarpi al nummer 10 vun che l’è propi ona sagoma. On grand attor comich, tant apprezzaa in tutta Italia: el Giovanni del famos trio Aldo, Giovanni e Giacomo. Sì, propi luu! In d’on video el cunta su la storia del Luigi Vercesi, partisan, arrestaa lì a cà soa, imprigionaa in San Vittor, deportaa al camp de concentrament de Fossoli e poeu fusilaa. El 23 de gennar te podet vedè l’anteprima de questa mappa in del noster concert “Fra le storie d’inciampo di ieri e di oggi” al 15 de via Santa Croce, a l’IBVA, che l’è on’associazion che la iutta i pussè fragil de la cittaa. Ve spettom!