Ciao Zerbin ona perla del teater

Fabio Wolf

Marta Marangoni

I calend d’agost hann portaa via on alter monument de Milan e de la soa cultura, el noster amis e maester Marino Zerbin.

Ora vitta votada al teater: a sett ann el scriveva giammò i commedi a la manera del Goldoni. El Marino l’ha recitaa tucc i classich, Pirandello, Shakespeare, Molière, financa cont Branciaroli e Chiodi. Ma a hinn staa i magattell el so primm amor, tant che l’è rivaa al Piccolo insema ai Colla e ultimament al Teatro della Cooperativa cont el Sarti.

Gran magister de lengua milanesa, el menava a memoria el Porta, el Tessa, el Barrella, el Valdi e l’è staa autor per el Mazzarella. Al Spirit de Milan nel so straordinari cors de cultura milanesa parlaven meneghin i sicilian, i egizian e financa i cines eren inscì bon de dì “Ciciarem on ciccinin“.

Per nialter Duperdu l’ha corregiuu i test cont severità e l’ha anca digerii i noster neologismi cont l’ironia de chi ne sa voeuna pussè del diavol.

El Marino in sul palch el se trasformava, l’era on re, on avvocat, on ciocchetee, on fiolin, semper precis in del parlà, pront a dà on consej e tramandà la soa sapienza ai alter, ai giovin soratutt.

E per l’associazion Minima Theatralia el s’è prestaa a fa teater social insema ai milanes de la periferia.

Cont la mort l’era superstizios, primma de salì sora el palch el diseva: "Mej morì per cambià aria", oppur "Spettem minga, perché voo a mangià l’erba dai radis".

I spettator per luu eren sacri, ghe daven la forza de vess semper impeccabil e grandios.

Milan l’ha perduu ona perla e num hemm perduu el nost Marino.