Alla Bovisa fra un risotto e Nanni Svampa

Marta M. Marangoni

e Fabio Wolf

A la Bovisa el gh’è on sit che l’è propi de vedè. “El sit to be” el se fa ciamà. Ma tucc le cognossen come El Spirit de Milan. Eh sì, perchè el voeur riportà in voga quella veggia manera de vess milanes, de stà in compagnia

cont on bel risott giald a l’osteria e cantà ona canzon del Nanni Svampa: “Mangiomm e bevom poca voeuja de lavorà!” Però el lavora eccome el Luca Locatelli per trà insema tutta ‘sta baracca de cultura: musica, cabaret, swing.

L’è davvera on miracol nassuu denter on alter miracol: on’architettura futurista tirada su in del 1921 cont el

progett del grand architett Antonio Sant’Elia. Denter la gh’è on’area de 11.000 meter quader, ciombia! Prima el

portava el nòmm de la famiglia Balestrini e faseven l’oli vegetal. In del 1963 riven i fradej Livellara e la diventa ona fabbrica de cristall sopraffin, lavoraa a man e soffiaa a bocca, fin al 2004.

In del 2015 l’è rivà el Spirit a ridà vitta a quella archeologia industrial, mobigliada cont gust e eleganza che te

par de vess in d’ona altra dimension, indove el temp l’è sospes in mezz a l’edera e ai milla lus del varietà. A

gh’è financa on salon immens ciamaa la Cattedral, cont on palch che l’è ‘na piazza d’armi come quella del Sempion!

Denter in tutt sto rebellot te podet trovà anca nialter Duperdu in “Barbera e Champagne”: el pontell per i

milaneson del giovedì l’è el prossim 17 novembre, on concert dedicaa al noster maester Marino Zerbin.

I Duperdu canten la canzon “El Spirit de Milan”

(ph. Matteo Carassale)