I Legnanes, settant’ann a teater

Milano, 27 dicembre 2018 - El 28 anteprima di Legnanes al Teater de La luna:che bella idea quella di anteprimm. Mi hoo partecipà a quella di Legnanes fin da quand hinn vegnù a Milan (1958), fomazion Musazzi-Balocco, in “Va la’ Battel” e poeu “Te la là la luna” e ancamò “Zucch e melon a la soa stagion” e via via nel temp, per 70 ann circa, salvo quij ann che laoravi anca mi e fasevi cont i me compagn I Gufi anteprimm di noster spettacol per vess rigorosament in linea cont la moda di ann ‘60, ‘70, e pussèe avanti con l’Operetta insema a Grazia Maria Raimondi. I post riservaa per i primm de la prima fina al ’64, eren semper duu: Roberto Brivio e Gigi Vesigna, per la rivista “Studenti” che faseven, el primm come redattor capp (s’eri redattor de me medemm, visto che ghe n’era minga alter) e lu come Direttor responsabil. Ricordi i anteprimm del Dario Fo cont “Gli angeli non giocano a Flipper”, “Aveva una pistola con gli occhi bianchi e neri”, del Bramieri “Sayonara Butterlfly”, de ”El Gufo e la gattina” cont Walter Chiari , senza savè che on dì ne avaria fada voeuna mi cont lu per “Scusate è tutto qui” al Cristallo de via Castelbarco che adess l’è diventà on supermercato.

La compagnia l’era de quatter personn: Walter Chiari, Roberto Brivio (me sarìa mai miss come primm nomm anca se la produzion l’era mia) Patrizia Caselli, Grazia Maria Raimondi. E poeu gh’eran i anteprimm del Piccolo e quej de la prosa per compagnii che se formaven a Milan. Ma tra tutti, quej sicur, eren semper i anteprimm di Legnanes, perché pur essènd nassù a Legnan eren stà adottà dai milanes squas fudessen roba nostra. Provaven in on quai teater di dintorni, me risulta squas semper in quel de Cassan Magnagh, faseven on po’ de recit in provincia e poeu via a la tenuda longa all’Odeon, al Liric, al Nuovo, allo Smeraldo, per i vecc Legnanès, Smeraldo, Nazional, Teater de la Luna per i noeuv, che, vist i temp, el success e la voeuja de ridd nostrana, tegnen pussè a long di vecc. Perché, parli semper second mi, el spettacol che presenten le adrè a diventà universal, comprensibil a tucc.

Semm sul piano della internazionalità, gh’è minga bisogn de la lengua, el cunta el gest, la missa in scèna, i costum a volt di poaret del cortil a volt sfarzos de rivista. Cunta la simpatia, la comunicatività ( e chi ghe n’emm da vend). Poeu basta informà el pubblic quader per quader in su la trama e l’è fada. A part i diverbi de la Teresa - dona all’antiga ma nell stess temp moderna, gelosa quand la ved che la soa union la po’ vess in pericol, ma averta quand se tratta de giugà cont on marii ormai foeura del dazi e invocagh la mort ogni des per des - con la soa tosa Mabilia che la gh’ha on guardaroba de fa’ ballaa i oeucc del pubblic pussè smaliziaa, cont i detti legnanes, usà mej d’ona legnanesa, che la sa longa sui possibilità de qualsiasi gener del so’ Gioann. Perché el po’casca’ el mond ma la soa tosa, già avanti in di ann, l’è la soa Mabilia e el marì, anca foeura de rigol, l’è semper el so’ Gioann. El pubblic se affeziona anca ai comprimari, che abiten nel cortil, pronti a diventà come el copion i e voeur.

Quand entren in scena ciappen on applauso de simpatia, e che fa’ el giusto contorno ai vicend de tutta ‘na commedia. Oltre che in del cortil in doa ciaschedun el sviluppa la propria personalità (varda la Carmela de Maurizio Albè, con la foto del marì in cornis sul stomigh, la Fiorella del Mauro Quercia, quella del Giovanni Mercuri, la Pinetta dell’Alberto Destrieri, el personagg mangiadonn del Danilo Parini, el Franco Cattaneo e Francesco Pellicini che l’è adrè a imparà a come avegh el dono dell’ubiquità - direttor del Giuditta Pasta de Saronn, del Festival del Cabaret, del Festival di Lagh e adess attor di Legnanes oltre che protagonista in serad organizzà da lù e per lù) hinn mascher, personagg immortaj che te desmenteghet pù, come la Chetta, l’antagonista de la Mabilia, che la s’è semper creduda pussè bella de lee.

In somma, a la fin del panegiric me troeuvi in man, nel coeur e in la ment sti facc de “70 voglia di ridere…c’è”, capeggiàa da trii malnatt de la ridada: Antonio Provasio (Teresa) Enrico Dalceri (Mabilia) e Luigi Campisi(Giovanni) che come entren in scena, la platea, la galleria, e, a seconda di teater, i palchi e i loggion, hinn pien de gent che i e acclama. Lor impervesen, fann fa’ ridadd che in television si a sognen, se cambien, se moeuven e parlen cont i testi e la regia classica del Provasio che el sa’ quell che la gent la voeur, cont le coreografie de Sofia Fusco che la dirig i boys da fai sembrà professionist provaa, e i moment musical de Arnaldo Chato direttor de on’orchestra che la se ved no ma la se sent in tutta la soa bravura. Quand hoo vist el Chato, direttor de ona Big Band scritturada quand fasevi l’Operetta insema a on’Orchestra Sinfonica, e poeu maester accompagnator al piano de cantant liric insema a mi e a la Raimondi in indimenticabil serad, per on moment me sont sentù part de la famiglia.