Adess on opinion la tran adree

Milano, 28 aprile 2019 -

Con questo racconto Roberto Brivio, il Cantamacabro dei Gufi, chitarra, fisarmonica e voce del mitico gruppo dialettal-cabarettistico che animava la Milano degli anni ’60, inizia una collaborazione col Giorno. Ogni settimana il suo sguardo affilato in decenni di satira, esercitata come attore, scrittore e chansonnier, illuminerà angoli della Grande Milano di oggi: i suoi vizi, le sue virtù e soprattutto la sua gente, da raccontare con irriverenza e tenerezza, come sa fare lui. E in lingua madre: il dialetto milanese.

Ona volta gh’éren i attor che se divideven in vari categorii: l’attor drammatic (es. Ricci), el legger (Melnati), el comic(Totò), mist (Cervi), el comprimari, l’antagonist, l’utilitè (ch’el podeva fa’ tutt), el pader nobil, l’attor giovin, el caratterist; istess per i donn. Poeu i hann dividù in duu class: attor de prosa e attor de rivista, giovin e vecc. Depoeu ancamò hann creà alter duu tipi: bej e inscìinscì. Anca i autor hann dovù cambià. Tragedia, dramma, commedia, rivista, commedia cont musich (primm attor e secondari doveven savè cantà e ballà), commedia musical e adess musical, che l’è on po’ musichall per via di ballett e opera per via di cantant che parlen mai ma canten, se deno i a cjamarissen attor de Operetta. E dato che per on quaivun el termine Operetta el sbatt giò, sotta i pè del teater, la cjamen opera buffa, opera comica; mi disi che l’è opera minga opera. I attor doveven avegh on propri guardaroba. Chi ghe l’aveva no doveva fassel: frack, tight, smoking, smoking bianc, abit de mattina ch’el valeva fin ai do’, semper che se trattas no de matrimoni, funeral o azion politico- diplomatica in doa se doveva presentass in pompa magna; ghe ne voeureva duu de abit da mattina, trii per el pòdisnà, trii vestì scur per la zena, on vestì de campagna, on vestì per andà a cavall e l’abbigliament per la macchina, anca se st’ultim se podeva pretendell da la produzion perché l’era considerà costumm. E ogni vestii cont i so’ accessori, camis, golf, gilè, cravatt, cappell, calzett, scarp.

On patrimoni che on Di Maio qualsiasi podeva mettegh sora la patrimonial. Oh, signor, gh’hoo dà on’idea. Penser torna indrè se de no i attor olter che el pocch laorà se troeuven on’accise sui vestìi. Gh’era ona sartoria ciamada Vides in via Castelbarco, al primm pian del cine-teater Cristallo, che la confezionava el corredo di attor e se faseva pagà cont ona trattegnuda fada dai amministrador de compagnia e mandada mes per mes fina alla estinzion del debit, che el finiva mai perché ogni ann gh’era semper on quaicoss de noeuv de comprà. Proibì indossà i abit de scèna foeura rappresentazion. On attor doveva imparà la part de commedi che vegniven replicaa tutti i ann. I compagnii giraven cont ses, sétt allestiment. Come per i Operett. Poeu l’è rivada la television e gh’è sta’ pù bisogn del guardaroba perché commedia per commedia le forniva la sartoria teatral, magara de la tv medemm. I attor hann comincià a aumentà, i produzion a vess semper de men, inscì s’hinn creà per el piccol schermo duu noeuv mansion: l’ospite e l’opinionist ( minga semper giornalist, psicologi, scrittor, espert in on quaicoss, ma anca gent de nient), parvenu rivà magara dall’agricoltura per “opinionà” su la letteratura, la pittura, la filosofia. I hoo vist dal Costanzo Show che dovariss derbì la bocca quand el parla, per fass capì mej, naturalment. Tucc quei che ghe stan intorna gh’han minga el coragg de dighell e lu el cred de vess capì. Gh’era el trio de fiss (ti e troeuvet a fa’ i opinionista in tutti i trasmission de rivista, tra pocch anca nel teater classic) la Iva al 22%, detta Zanicchi, Cristiano Malgioglio, l’Alba Parietti (recuperada a la grandissima chè l’era on poo de temp che la partecipava no). Poeu gh’era Platinette, figuress ti se la podeva mancà, D’Agostino, barba e occiai negher, pelada e fa’ de trasandaa, Vittorio Feltri, l’unich a di ona quai battuda caustica per la qual hann riduu tutti quanti, Costanzo per primm. Gh’era la D’Eusanio, Cecchi Paone, Facchinetti Junior, Vladimir Luxuria, l’immancabil Mughini.

Hann comincià cont la politica. La Parietti l’è subit intervegnuda col dì che el pader l’era partigian, ma Malgioglio la faseva no parlà e la sormontava, poeu intervegniva la D’Eusanio che la se faseva sormontà dal D’Agostino ch’el parlava del so’ Dago Spia, ‘quotidiano del mattino’ l’ha dit vun che ricordi pù. Compri pù giornaj, l’affermava, ma leggi el quotidiano de D’Agostino che el me da’ la carica. Ma Costanzo ciamà confidenzialment Maurizio el voreva no che la trasmission la ciappass la cjav politica e el se intrometteva cercand invano de entrà in combutta ma subissà dai cjaccer del rosc che a distanza de poltrona el teneva banc cont i stupidad del moment e i spiritosad che gh’aveven nient de spiritos. Datosi che nissun el ghe dava a trà, el Maurizio el dava ordin de tasè e per fall mej la fa’ sonà l’orchestra sistemada ai so’ spall almen trii volt e depoeu l’ha miss in onda la pubblicità. A la ripresa parlaven de grass e de magher, argoment in programma anca a Porta a Porta. Intant la Parietti l’ha faa ona soa battuda a proposit de tett: “Hoo faa la prima e vist che l’andava ben me sont fada anca la seconda”. Subit de poeu l’è riva’ on taxista che el fa’ l’opinionista in taxi con i client. Ona volta l’ha cargà ona sciora che s’è sbiottada completament per pagall in natura.

E m'è vegnuda in ment la storia de quell che l’ha accettà la proposta e depoeu la cliente la ghe dis che el so’ mestèe l’è quell de la cortigiana e che doveva dagh almen desmila. El taxista l’ha fa’ nanca ona piega.Gh’ ha precisà che el so’ mestèee l’è quel de portà i client e che el tassametro l’è andà semper, da quand le sciora l’è montada in vettura, quindi, vist che eren andà sui praa del Parco delle Cave, se la donna la voreva tornà a ca’ all’Ortiga eren 15mila, altrimenti la lassava in piena nott a la serèna. brivio.roberto@yahoo.it