Se da la storia imparomm nagott

Milano, 19 agosto 2018 -

Ogni settimana lo sguardo di Roberto Brivio affilato in decenni di satira, esercitata come attore, scrittore e chansonnier, illuminerà angoli della Grande Milano di oggi: i suoi vizi, le sue virtù e soprattutto la sua gente, da raccontare con irriverenza e tenerezza, come sa fare lui. E in lingua madre: il dialetto milanese.

“Gennar el fa’ i pont - Febbrar i e romp”. L’è on vers de “La vosetta del Lunari” ‘na canzon scritta dal Roberto Marelli, passada a mi che gh’hoo faa ‘na quaj modifica, passada ancamò a Sergio Parisini, jazzista, arrangiador, accompagnador e anca direttor d’orchestra. L’ha dirett l’ orchestra sinfonica (24 professor) che la sonava in di Operett quand gh’avevi el nomm in ditta cont Grazia Maria Raimondi e trii operett (La Vedova allegra, El Cavallin bianch, El paes di campanell e on Gran Gala’) de portaà in gir. Ona formazion che olter a l’orchestra la girava con on ballett classic de ses donn e duu mas’c, on ballet de tip tap de sett giovin (dai 14 ai 16 ann, che vegniven in tournèe cont i genitor) quatter cantant liric, quatter attor, e mi cont la Raimondi che fasevom i part del comic e de la soubrette. Con i tecnici (ses) la compagnia l’era formada da 55 personn senza cuntà on coro de 45 element che l’andava e vegniva ogni tant, ma de per lu, nel senso che el gh’aveva el so’ pulmann e el cantava (quand se podeva pagall) domà in di grand teater come el Comunal de Piacenza, el Ponchielli de Cremona, e alter cont on gir de trii mes de fila.

Gennar el fa’ i pont. Ma quaj? Quei che se spacchen, che crollen come in ona fiction? Quej disaster annonzià in di film american perché on compless l’è construì su ona palud, cont material andà al men, su ona faglia cròi, (friabile), in doa el costruttor, che l’è semper on cattiv contornà de cattiv, el voeur fa’ on albergo de sogn, on paes (villaggio turistico), on motel su on campett in doa giughen i fioeu? No. Questa l’è ona invenzion filmica. I unich pont valid e percorribil, el me telefonava l’altra sera Guido Veronesi, a hinn quej de Santambroeus, Nadal e Santo Steven. Vedemm se ghe n’è alter: venerdì sant sabet domenega lunedì dell’angiol; i mort, i Sant, el Patrono, la Liberazion, la Festa del Papà, de la Mamma, de la Nonna, el 25 Avril, el primm Magg.

I alter pont, quej de cement con i pilon, a hinn tutti de controllà. Ogni Comun ch’el se verifica i so’, se se veouren evità disaster e mort. Ghe n’è giamò tanti per incident, squas semper provocà da i cattiv abitudin di guidator, autisti bevù, drogà, distratt, che telefonen, perfinna che leggen, rattellen, varden el tom tom, o el paesagg o ona bionda che i a appena sorpassà, o crollen per on colp de sògn. I giornalist che fan i resoconti al tg disen el numer di vittim de la strada con ona nonchalance unica, senza soffermass granché, come se ‘sti incident fudessen abitual, senza dà pes al numer. Invece quand se tratta de ona tragedia tipo pont che crolla, cà che la scoppia, pulmann che va giò in d’ona scarpada, bomba d’acqua che invad ona cittadina, diga che la salta, i mort sembren vess la prima robba che per i ascoltador la gh’abbia importanza.

E peu riven i capp del governo, i politich che poden no mancà ( quand gh’hinn no tutti pront a tiragh i sass addoss, a dì che la Nazion la gh’è no) i messagg de cordoglio, de partecipazion, tutti cont i medemm paroll dell’incident precedent: faremm on’inchiesta, trovaremm i colpevol, se po’ no morì iscì, ciapparemm provvediment important, chi l’ha sbaglià el pagarà. Quaivun l’avanza denonzii, passen quatter o cinq dì e tutt l’è miss nel cassett del temp, fina a la prossima catastrofe che la po’ vess on terremott, on maremott, ona noeuva e inaspettada mossa del destin, aiutada dai man di omen che fin dal principi a hinn minga stà all’altezza de la situazion, e dai casin che fann cont i danè stanzià per ona robba, utilizaa inveci in on altra intant che gh’hann anmò de rivà quei de la prima, senza cuntà i robalizzi, l’apatia, la mancanza de considerazion quand quaivun el denonzia on pericol imminent.

L'homme l’è semper incurant de quel che disen alter cont l’autorità de dill. El seguta a... anca se el dottor el gh’ha ditt che se el va vanti insci’ on di’ o l’alter, o prest, el coeur el molla, “quindi niente sforzi”. Ma lu, per fa vedè che l’è on macho i sforz i e fa’, eccome. Per esempi on giornal el riporta ona notizia illuminante a proposit de quell che hoo appena finì de dì. “Ponti a rischio. Vanno chiusi”. Allarme ignorato. Milano Meda, diktat dei tecnici a la provincia che la gh’è pu, A hinn quatter i pont. N° 14 e n° 12 a Cesano Maderno; il 10 a Bovisio Masciago e al svincol 26. Il des l’è off limits al traffic, e i alter trii dovarissen vess saraa a la fin d’Agost. El giornal el conclud “ Ma, salvo sorprese, non è così” E se succed on disaster chi el pagarà? L’ingegner incaricaa, l’ha dit a la fin de Agost 2017 che podarissen transità mèzz cont on carich inferior ai 10 tonnellad per on ann ancamo’. L’ann el finiss el 30 Agos 2018. La Region Lombardia l’ha finanziaa l’operazion de consolidament cont circa 1 milion e mezz de euro. La Provincia che, ripeti, la gh’è pù, ma on quaivun el gh’ha de vess a ciappass responsabilità, la voeur fa’ alter ispezion e depoeu la valuterà se impònn limitazion al traffic. Intanta...

E in doa andarann a finì i danee stanzià dall’assessore alle infrastrutture de la Region Lombardia. Semm a la frutta. Troppa gent a decid, troppa gent che la voeur minga ragionà cont el bon sens, tropp a fa’ i amministrador. Gh’hann no fiducia l’on con l’alter. Anzi se guarden cont invidia. «Se te rendi minga difficil la strada ris’ci de perd la poltrona». Gh’è anca on quaicoss de bon, però. Hinn a drè a ingessà i piloni de la tangenzial. Ghe dev vess quajcoss che va no in di 4 pilastri che sostegnen el viadotto de la MM2 sora la Gobba. Anca per lor passen i ann e cement, tondin de fer, poden rovinass, ossidass cont i intemperii. Ghe laoren a cicli continuativi do squader de 5/6 operari l’una. Me senti confortaa.