El teater e mì quand seri piscinin

Milano, 29 luglio  2018 -

Ogni settimana lo sguardo di Roberto Brivio affilato in decenni di satira, esercitata come attore, scrittore e chansonnier, illuminerà angoli della Grande Milano di oggi: i suoi vizi, le sue virtù e soprattutto la sua gente, da raccontare con irriverenza e tenerezza, come sa fare lui. E in lingua madre: il dialetto milanese.

Quand s'eri piscinin, dai ses ai des ann, rispett ai mè de adess ghe n’è 70 de differenza, fasevi di robb che me appassionaven. Per esempi legg e rilegg on liber intitolà Il Tesoretto, antologia, squas enciclopedica, de tutt (me mader l’era diventada matta per trovammel, poeu le vendeva on cartee sotta la scola elementar de via Felice Casati) che la faseva part insema a Minuzzolo e Giannettino de Collodi (minga all’altezza dell’universal Pinocchio) e a Robinson Crusoe de Daniel DeFoe (1719), de la me prima biblioteca che adess la gh’ha ona cifra ragguardevol de 20.000 volumm. Ma anca, quand andavi in vacanza a S.Paolo al Tiliment, in tal Friul, visin a Casarsa (Cjasarse) de PPP (15 km), gh’avevi la passion di liber. Me recordi i giornà passaa sui quei de la “Biblioteca dei miei ragazzi” de la Salani editor. Avventur che, magara, farien ridd i fioeu d’incoeu, ma che alimentaven la fantasia, te faseven viaggià, te daven la spinta (sbrunte, furlan) come I ragazzi della via Pal, come i Salgari (“Guarda, Carmaux, il Corsaro Nero piange”).

Dai liber passavi a realizzaa i costum cont la carta crespada per organizzaa spettacol e tirà su moneda per i pover; numm che serom pussè pover de lor e mangiavom, ‘na volta in tutta l’estaa, el gelato perché on fattor in premio al noster aiutt in di camp le offriva. Fasevi a sett ann la regia di canzonett in voga a quel temp “Toc, toc” “Cui è” “Sont Tony” “Te lo digo tante volte/ de non star a bev el vino/ Te gh’et mi e on fiolino/ tutti i dì de mantegnì” “ te lo digo tante volte/ de fermar la tua boccazza (leggi boccassa)/ mi te spacco un legno in fazza/ e cussì te parli più /El xe mio ‘sto portafojo/ de prodigi non ne vojo/ ti va’ a letto col tuo fioio/ e mi vo’ de per mi” “ Papà lassa stà la mamma/ che te insegna de giudizio/ qual è quel brutto vizio/ de ‘ndà l’ost a bev el vin”. Ona mattina vedi ona baracca da circo ferma davanti a ona cort che la dava in strada travers on porton per i carr (el famos passo carraio). Me ferma vun smontà dal carrozzon “Satu cui ch’a l’ha un pal di fiar? (sai chi ha un palo di ferro?). El “pal di fiar” l’è on tocch de fer, alt squas un meter e mezz, che el serviva a fa’ i bus in terra per piantà i Gelsi, che serviven ‘na volta come palett per sustegnì i vid. “Me none (mia nonna)” gh’hoo dit (i ai dit). “Si to none me l’ impreste, stasere vi invidi a on spettacol (se tua nonna me lo impresta vi invito questa sera a uno spettacolo). Sont andà a toeull e l’hoo portà strusandoll a “ sti commediant” che han rappresentà trii spettacol in trii giornad de fila: Il Fornaretto de Venezia, Pia de’ Tolomei, la Passion del Signor. Appena partii, hoo organizza’ sul “saliso”, ona specie de gettada de cement davanti a ona ca’, i tre recit. Da quel moment sont sta’ contaminà e vedevi de per tutt palch scenic. Prima all’oratori (A sedes ann hoo interpretaa Il Cardinale Giovanni de Medici, poeu le Furberie de Scappino, peu Pesci Rossi de Morucchio, la Fonte Prodigio, on para de Operett minga offizial, e depoeu l’Accademia dei Filodrammatici, su on Camion itinerant, in mezz ai pràa, nel telon de on Circo, in ona baracchetta che l’andava per i paes come el Teater dell’Arte, de i Guitti (a la manera de quej che recitaven in Capitan Fracassa: “Arlecchino e Il Circo 3P”).

Fort di me conoscenz giornalistich a La Notte, Corriere Lombardo e Corriere d’Informazione, fasevi l’offizi stampa e presentavi la stagion a la Terrazza Martini. E inscì el Teater piccol l’è sta’ semper la mia grande passion. Quand hoo vist quell de Villa Castelbarco a Vaprio D’Adda, hoo squas prova’ on sveniment. El metti chi in fotografia. L’è ancamò cont i panch al posto di poltronn, 99 post, palchscenich grand con la graticcia alta per calà i scèn. Hoo parlà cont el proprietari Massimo e la miè Raffaella, compatti cont el fioeu Gian Mario, tra on bagn e l’alter in la piscina de la Villa che la stà de front, al di là dell’Adda, al villaggio Crespi, ancamò de fattura ottocentesca. Gh’hoo dit che me sarìa piasù organizzà per settembre ona stagion mista tra prosa, operett, vaudeville in milanes (quei del Tecoppa). On festival in onor de Piero Mazzarella, l’ultim di Grand a vess scomparì. El m’ha dit che l’era interessaa e che on altra volta el s’era rivolt al Comun per on aiutt cont on bel picche come risposta. Gh’hoo dit che me sarìa interessaa mi. El programma? Tutt quell che ghe sariss piasuu al Piero Mazzarella: el Giovedì riserva’ al Vaudeville, el Venerdì ai Operin del ‘700, el Sabet al Cabaret in milanes, la domenega ai personagg che hann fa ridd Milan e dintorni. Cont la ripetizion de tutt la settimana depoeu e l’assegnazion de la targa Piero Mazzarella al personagg scernii da ona giuria formada tra i lettor de Il Giorno, in doa scrivi ona pagina intera trii volt la settimana, in milanes, e capeggiada dal direttor Sandro Neri. Le sa no, ancamò, ma dovariss accettaa perché on Premio Mazzarella l’han anmò de assegnall.

Invitarooo anca la miè Barbara Nardi, i fioeu Piero, Paolo e Riccardo che cont la mia tosa Federika, figli d’arte tucc e do’, l’ha interpretaa Pirandello (Questa sera si recita a soggetto e Ciascuno a suo modo) Anouhill (Antigone) Alfieri (La Congiura de’Pazzi), il ritratto di Dorian Gray de Oscar Wilde, in on para de stagion irripetibil, anca perché gh’è stada la prima rappresentazion in assoluto de Dracula e de la Mummia. Voeuri che el ghe sia anca el fradel Rino Silveri, che tant l’ha scritt per el fradell e tant l’ha collaborà cont lu, soa ombra ma da la bravura,, anca come regista, de no mett in discussion. E dal moment che Piero Mazzarella l’è staa Meneghin come sont sta mi (14 ann insema a Grazia Maria Raimondi) voeuri fa ona rimpatriada anca cont el Tullio Barbato che dalla soa Radio Meneghina l’ha daa l’anima a ona città come Milan che la tend a desmentegà el so’ dialett. Disi semper al so’ fioeu Luca che vorarissi intervistà el pader ma a la fin, pensi che el sia mej ciamall per prima istanza a questa manifestazion. Lu, giornalist, espert on po’ de tutt, conferenzier suj argoment trattà in di so liber, osservator de la vita cittadina e anca de quella extra città, cont ona vitalità impressionante, el compar in tanti moment important cont el so’ Borsalino, a recordà, a corregg, a parlà de tucc i artist che l’ha conossù e de quej ch’hinn passaa per l’Arca Canora de la Canzon milanesa. brivio.roberto@yahoo.it