Da reggia di ratt a la Movida: hinn cambià in mej el Navili e la Darsena

Milano, 5 settembre 2017 -Hoo ricevu ona mail che la diseva pressapoch inscì: “Incoeu se fa on gran discut su la riqualificazion di Navili, la sponda sciora e quella sbiocca (poera), tirà via i barcon, la resistenza di proprietari de questi local galleggiant contra la sarada. So minga se quest el po’ vess on sponto per fa’ capì come hinn cambiàa i Navili e cossa hinn diventà (ona filera de locai, de ristorantitt…)”. L’è minga domà on sponto, l’ è on argoment. Ma prima de trattal sarìa ben legg i parol de la canzon scritta da Ivan della Mea e intitolada “La Canzon del Navili”. Se voeurii ascoltala cantada da I Gufi, andii su You Tube, I Gufi a Colori. “Quand s’eri gioin laoravi chi/ sora el Navili des or al dì/ me sont sposà el viagg de nozz/ me toccà fall sora sto’ foss/ (inciso)Gh’è chi dis che l’è bella quest’acqua marscia/ sto scaregh pubblic de cess de ruera/ Ma mi quand riva giò la sira/ me senti el stomegh bell’e saràa/ (2 strofa) Adess che sont vecc, pien de malann/ me tocca fa ‘sta vita de can/ cont el barcon e pien de rabbia/ a caregà sabbia sora el Tisin/ (inciso)Gh’è chi dis… ecc. (3 strofa) Però la storia l’è minga finida/ sora el Navili gh’è n’altra vita/ dal bell Tisin a Porta Cines/ des or al dì e mes su mes/ (inciso) Gh’è Giovan el mè fioeu la mia speranza/ Giamò finida giamò brusada/ gh’è chi dis che l’è bella st’acqua marscia impestada/ gh’è chi dis che l’è bella, ma a mi me pias no”.  La gh'ha no bisogn de vess commentada. L’è ciara. Se parla de ona volta. El Navili, la Darsena, hinn ona nota de color in questa vegia part de Milan. Me sembra che el sia important valorizzà quell che l’è stà vun di port pussè important per el moviment, che l’era diventaa la reggia di ratt de peu che i barcon avevev desmis de porta’ la sabbia. Mi vedi ancamò el tutt, pover de moviment. Voraria che la Darsena la fudess piena de barchitt, de innamoraà che fann on acquada (passeggiada in de l’acqua) come se ved in certi film. E i barconi miss su la sponda Pavesa? Ingombri? No, caratteristica. Tegnù ben podarissen vess, come a hinn stàa nel passàa, post in doe fa’ musica, presentà liber, e la sera spazi per spettacol milanes, de cabaret, in doa incontrà personagg conossu e vedèn alter nass.  Ghe n'era vun, I Scimbi, frequentà da intellettual, in doe podeven nass moviment cultural. E i alter, loeugh, sit viv! minga mortori abbandonà. Certo ghe voraria sorveglianza adeguada per fa no circolà quell che l’è proibì. Ma la inscì detta “Movida” la rend ona zona piena, me ripeti, de vita. Certi volt me domandi, quand leggi che gli inquilitt se ribellen per el baccan, ma quand hann comprà o affittà cà sora i Navili, l’han faa perché la zona l’era quella che l’era, altrimenti l’avarien scernida pussè avanti, vers Gaggian, oppur in su la Martesana (disi no sul Seves o sul Lamber che hinn semper in esondazion) o a la Bovisa, a Lambrà, all’Ortiga. No hinn andà lì perché gh’hinn i pittor, i fest, i ristorant a la serèna, i negoziett che venden de tutt, i cantastori. La riva con la grana? La riva povera? Sì ghe ne sarà voeuna cont men negozi dell’altra. Sul Navili Grand, spall alla Darsena, la riva destra, dal pont in doa gh’era el Mercato Metropolitano (20.000 personn al Sabet) in giò vers Corsic gh’hinn anmo’ magasin, pràa, le canottieri, e la part destra del Navili Paves l’è pussè povera de negozi, ma l’è on bel vedè in di strad che le traversen, i post all’avert occupà anca d’inverno. Insoma l’è ona zona de Milan in doe pode’ dass di pontell sicur de trovà on moviment in tutti i significaa. Per mi i Navili a hinn cambià in mej, salvo el mercà rional, brutt. Eren mej i bancarell de la fera de Sinigaglia. Cambià i Navigli, cambiada la darsena, cambiada Porta Cicca (Cicca, dis ona storia, l’è on termine che voeur di “donnina”. Sota la dominazion spagnoeula, ste’ “donnine” se offriven al mej offerent. Adess se gh’hinn se recognossen no miscià cont la gent de tutti i color che la frequenta i spond di canal e de la gran vasca e i e ciamen donnasc!). Ma l’è no cambiada la cafonaggin de quej che frequenten el post. Sporch per terra, bottili, cadregh, legn, ruera in di foss, che quand hinn succ per la pulizia biannuale mostren la mala educazion di frequentador.  Ecco, bisognaria, per fa’ entrà la gent in quella zona, forse l’unica de Milan in doa certi inquilinn sbatten giò el superfluo (anca i cicch di sigarett) da la finestra, fass mostrà ona tessera de frequenza ai cors de Educazione Civica. Perché el sporch, i avanz, i bottili voeui, spaccàa, el ruff, van no in terra de per lor. Tanti anni fa Liliana Feldmann, attrice di alte qualità, primadonna della Compagnia Calindri/Feldmann, insema a Brivio cont Evelina Sironi, l’ha inaugurà on cabaret su on barcon per tutta on’estàa. El spettacol l’era intitolà “Milanesissimamente vostri”. La gh’è stada ona ripresa al Liric a la fin de Settember. Cont numm gh’era anca on Ing. che per on po’ de ann l’ha fàa el Meneghin, dopo el me e della Raimondi (Cecca), e del Marelli. El disi perché Gianni Ferri l’aveva progettà per mi on Teater de 500 post su duu barcon de cement che avevi affittà al Ponte della Becca visin a Pavia. Progett ch’el se fermàa perché ghe voreven tanti de quei permess che (parli dell’80) sarìa in ball ancamò adess per completai. El Teater voeurevi ciamall “Barcon Boat”perché a poppa gh’avevi intenzion de mettegh i roeud come i battel del Missìpissichi. El primm spettacol? “Sciòbot”, de Brivio/Marelli/Negri. E in mezz a la Darsena, in pien inverno ho salvà vun che l’ha tentà de suicidass. L’ho portà a riva. Gh’hoo fàa la respirazion artificial. Gh’hoo schiscià el coeur e quand l’ha derbì i oeucc, gh’hoo dit “ sei un cretino, non potevi buttarti a Giugno? Adesso andremo al Fatebenefratelli con la broncopolmonite.” “Dovevi lasciarmi morire. Sono pieno di debiti. Devo soldi a tutti, parenti, amici, nipotini, suore del convento, preti delle chiese, negozianti” “Domani mi ringrazierai. Quando vedrai il sole, mi sarai grato. Tu mi devi la vita!” “Ecco, un debito in più!”