La cultura de pontificà, de esagitass, de derogà la diventa temp perdù

Milano, 12 settembre 2017 - Quand hoo derbì a Milan, in via S. Maurilio, “Il Refettorio”, cabaret ricavà in d’ona cantina che per rivagh bisognava attraversà on cortil e andà giò per ona scala propri de cantina, ho dovu pensà, come direttor artistich, votà de mi medèmm inscì nissun podeva dimm che s’eri mis lì per clientelismo, al programma. Tucc a dimm che dovevi avegh ona linea, che l’era minga necessari che la fudess politica ma ona linea la doveva vess. Hoo pensà subit a quella del Bialetti. Ona linea che la parlava, che la se fermava, semper drizza. Insomma ona linea mobile. Ma peu hoo pensà che se la fudess minga drizza e l’andass so e giò dand on colp a destra e vun a sinistra second le esigenz, el sarìa stàa mej. Minga per faa la banderuola, ma per colpì verament el marsc. Ma chi s’eri mi per giudicà quell che l’era giust e quell che l’era sbaglià, in d’ona società “plus ou moine” ( ogni tant el frances el ghe stà ben) simil a questa.

Vardì e fii i comprazion del cas: disaster natural e provocà = corsa di minìster a dì i solit robb, vos radiotelevisive de circostanza, quasi tutti semper pronti a dà la colpa allo stato che el gh’è no, stanziament straordinari di milion de euro (ona volta eren miliard de lire) che se blocchen da ona quaj part e el piano de ricostruzion, a detta de chi l’è pussè informàa e cognoss i corridor sotterranei del flusso di danèe, o l’è in ritard, o l’ha minga ancamò comincià a camminà o l’è bloccà per ona question burocratica; quel che succed all’estero: on temp la guerra fredda cont la Russia adess el pericol de guerra calda cont la Corea che dopo la guerra l’era considerada on set de film anca de propaganda, adess pericol smargiass cont la gent ripresa intanta che la batt i man, a ridd, a presentà telegiornai a mandorla cont el fà tronfalistic che numm cognussum; spettacol che van avanti cont i premi, i red carpet, i vestìi che inviden a mett el tacc su un lembo per vedei andà giò e mostrà gamb, mudand (che del rest se vedeven in trasparenza), reggitett, natùre (frances), fa nient anca se pien de cellulite, de pell che la va giò.

L’è mej finì in mezz al gossip che avègh minga visibilità, poca ciamada e quindi faa fadiga a trovà de laorà a ona certa età; e la cultura? Come ona volta el termine el fàa slargà la bocca a tucc, quindi l’è cultura pontificà, l’è cultura esagitass, l’è cultura scriv i parolasc e pronunciai ad alta vos, l’è cultura taccà lit, l’è cultura menà bott, l’è cultura spantegà cultura e lamentass perché l’è trascurada, a hinn cultura tutti i paroll che la gent usa per di’ che l’è cultura: la cultura del bev, dell’inciocass, de la droga, la cultura dell’acqua, del verd, dell’asfalt, del costruì cà obbrobrios, la cultura de ona architettura popolar che, anonima, la te schiscia , e la cultura sportiva, quella della curva, quella di pestagg allo stadio, quella di medesin, delle visite spiecialistiche, della malasanità… podi andà avanti come ona legura, come on film a la moviola quand te la giret svelt per rivà ad on dato fotogramma. A l’è velocità. Gh’è ona cultura anca nella velocità e i pussè saggi disen che subit dopo gh’è quella de la pausa. E tra velocità e pause el passa el temp e al primm esamm te se rendet cunt de quell che t’è perdu a la ricerca (l’è minga ona massima proustiana) de on quaicoss che te podet pù ave’: la cultura dell’età. Hoo comincià cont el Refettorio perché nella programmazion hoo mis on copion scritt da on australian, on certo Albert Wise, intitolà “La ricerca del tempo ritrovato”tant per fa el vers al “perduto”. Ma per mi allora quell temp lì l’era quell perdù de quand s’eren smembrà I Gufi, l’era quell de quand s’eri concertista de Fisa e studiandola pu hoo pers tutt, anca la capacità de improvvisà on valzer, l’è quell del quand giogavi a pallacanestro e avevi formà ona squadra (su no perchè devi semper formà on quaicoss, Mai che me fasessi scritturà a faa el semplice fante con la possibilità de diventà domà caporal maggior), l’è temp perdù quand ho dismettù de andà a cavall, la sensazion pussee forta dopo la prima volta cont la Raimondi (cossa avii capii, intendevi dì’ a la soa prima apparizion sul palcscenich con la compagnia de Operett Rizzo-Brivio nella part de la II soubrette ne Il Paese dei Campanelli de Lombardo e Ranzato). 

Ma la bastonada  me la dada el me fioeu Matteo, ch’el voeureva fàa el calciador e invece l’ha fàa per on po’ de ann el Cantautore, e adess el gira l’Italia per ona ditta pensand a volt quell ch’el podeva vess so’ pader se el se fuss amministràa mej cont i dischi i liber i spettacol le regie e la gestion di teater. Me le diseven tucc. Perd no tempo con i local! E adess podi dì che veramente l’era temp perdù perché ogni offelè fa el so mestèe. Senti giamò on quai lettor ch’el dis “Ma ti te scrivet roba biografica!” “Tucc” ghe disi “ se scriven addoss. Ma inscì troeuven el moeud de parlà de tutt per tutti” E mi me sont sentì bastonà, disevi prima, dal me fioeu Matteo, quand el m’ha dit “Ho sentito una tua canzone, anzi due e le ho trovate una bellissima, l’altra moderna” “quale la bellissima?” Gh’hoo domandà. “L’Antartide. Attuale, graffiante, cantata bene!” L’hoo mai sent’ parlà inscì di me canzon. “E l’altra?” gh’hoo domandà. “Ehilà Hop, Sveglia. Una protesta coraggiosa. Venduta in un involucro di tipo nuovo. Adesso farebbe scalpore” Già, l’ha scalporà anca allora. S’eri al Liric a fa on spettacol e dal loggion han comincià a sbatt giò in platea volantin cont i paroll de la canzon. L’era l’autor (Calcaterra) che cercava de fass pubblicità in quella manera. E mi, stupid (ecco el temp perdu) a redarguill, a dì che el podeva no fàa inscì, che gh’avevi ona faccia da difend, che el doveva no mettem a la berlina per vend i disk con mi come cantant protagonista. … “ questo pazzo mondo/ormai non è più tondo/qualcuno l’ha reso quadrato/ e mi ci ha inserito/ Eilà hop sveglia!”/ questo pazzo mondo/ ormai è tutto inquinato/qualcuno ci ha guadagnato/ e mi ci ha incastrato/ Eilà hop Sveglia/ Pe questo pazzo mondo/ un terzo muore di fame/ ma cosa importa agli altri/ basta accumulare/ e non risparmiare/e non riciclare/ Eilà hop svegliaaa” Una anticipazion di Rapp piantada sul paviment del Liric e in 120.000 copi del disk distribuì sui spiagg d’Italia. Vialter avii giamò capii in doe l’e’ el temp perdu: fa ona roba e piantalla lì. Cred in on messagg e avegh no el coragg del portall avanti. Dagh a tràa a tucc quej che sostegnen che te se rovinet cont i to man. Cred in on’idea e fa de tutt per minga sostegnilla inveci de andà avanti a ghignon dur. Tutt i volt che te deroghet te entret denter nel temp perdù.