"La gente la voeur ridd, de gust": pecà che manchen humorist

Milano, 6 luglio 2017 - 

Sott al pont de ciff e ciaff…

Lì ghe stà Bergniff Bargnaff

cont la testa verdesina

ran dottor chi l’indovina

Gh'è chi dis che la quartina la voeureva indicà ona rana ma la vera spiegazion l’è che el pont se identifica in quel delle Pioppette. Nissun el dis in doe l’era. Podeva vess sul Navili o in Martesana. Fatto sta che el serviva per nascond on Bargniff (brancadonn col lazz, cont la red di ciappacan). El Bargniff Bagnaff impresonava i tosann per consegnai ai Spagnoeu, allora padron de Milan. La veste verdesina l’era el so’ indument colorà de verd per quattass e fass minga vedè. Ona roba camaleontica.

Avevi promis de mett ner su bianc la storia de certi filastrocch che i fioeu usen per la cunta. Tela chi on altra: “Togn Togn/pela rogn/pela figh/ Capitani di formigh/ Capitani di soldà/indovina chi l’è stàa”. La se cantava giugand a la sberla del soldà. Ona man sul fianc passada sotta la sèlla, trii o quatter fioeu de drè, vun ch’el tira ona grossa manada e tucc e quatter col did sollevà a vosà: indovina chi l’è stàa. La storia fa segn a on cèrt Antonio Landriani (Togn) vincitor di bolognes e fiorentin, che aveven rogn intra de lor e se pelaven come figh. L’era ciamà capitani di formigh perché in gioentù l’era stàa seminarista, quindi come lor numeros (nel votcent perché incoeu manchen i vocazion e on pret l’è prevost de almen trii parrocchi ) e ner come i formigh. Ona storia consimil l’è raffigurada nell’affrèsch del palass Borromeo cont el gioeugh “sguralatazza”. Anca chi se doea indoinà chi l’aveva dà on pugn in su la sc’ena de chi stava sotta (l’è on gergo per significà quell che doveva ciappal): Sgùra la tazza/sgùrala ti/ dagh on pugn/ và via de lì.

E per conclud do stori che fan part de l’anedottica milanesa. Quella de la Lucia, fioeula de on armiroeu de via Armorari, che sedutta da on nobil l’è stada abbandonada e privada de la tosetta. Matta dal dolor ‘sta Lucia la ninnava su la strada ona pigotta creduda la soa creatura. “Tandarrandan Lussia/sott’a quel cassinott/ghe stà ona veggia stria/ che fà ballà i pigott”. Son sicurr che Giovanni Barrella el s’è ispirà a ’sta storia per inventà la soa famosa “Mamma di Gatt”, recitada, oltre a lu, da tanti grandi attor, primm fra tucc Piero Mazzarella seguì da Liliana Feldmann, e me ven voeja de mettela anca mi in repertori. La seconda storia la dis “La veggia Rampina/la va in cantina,/la pela l’usell/ la dis che l’è bell/” I critich parlen de allusion cont la stregoneria ciappand ad esempi Caterina Medici perché pareva che stregass el so padron e la proeuva eren i penn de polaster trovà sotta el cussin; mi, dopo che hoo leggiù i quatter vers hoo dit che l’usel l’è semper quell, tanto l’è vera che la Rampina anca se l’è veggia la dis “che l’è bell”. Questi hinn i filastrocch che mi canti in teater a la manera del Paolo Poli, giugand in scena e spiegand al pubblic i me impression. Adess de filastrocch se parla pu’. Quand te comincet a cantaj i procacciator de scrittur, i proprietari di teater, i dirigent di canal televisiv disen che te stufissett el pubblic, che la gente la voeur ridd, che Zelig e Colorado, do trasmission che hann rovinà la piazza, te fan fa’ ona riduda plateal ogni des second (l’è minga vera perché el pubblic de la trasmission el ridd quand i cartej o el direttor de scena disen “ridete, applaudite” e se la telecamera la dev puntà su on quaivun o on grupp ghe disen de ridd sguaiatament, de gust. E riden tucc, e se creden anca lor attor o cabarettist o cantant).

Gino e Michele, han debuttàa al Refettorio, on cabarett che hoo derbì dopo la prima separazion de I Gufi (se ciamaven I Bachi da Sera e eren in cinq), m’han dit, quand hoo portà lor on’idea comica che la vareva or, “questa però fa ridere ogni tanto, non ogni dieci secondi come i ragazzi che lanciamo”. Me permetti de dì che i e lanciaven in ruera, che mi ridevi no perché de drè a quel che diseven gh’era nient e come mi ghe n’era tanti. Gino e Michele scriveven bei testi, ma faseven minga ridd, quand s’eri presentador de “Lo Squizzofrenico” ona trasmission de la famosa A3 portada a ciappà el terz premi dell’ann: primm I Gufi, second Ric e Gian, terz Roberto Brivio, seguida da “El Parapiglio” con mi, la Raimondi e anca el Gianni Magni. Adess quand me domanden cossa pensi del cabaret d’incoeu, disi che manchen humorist come el Marchesi, el Flaiano, el Silva, el Terzoli. Inscì aveghen come el Gigi Lunari. Chi l’è? L’ho giamò dit in on alter articol: el quinto Gufo, che l’ha scritt do noster spettacol sold out in tutta la penisola. E per dà a Cesare quell che l’è de Cesare, el quinto Gufo quand gh’avemm sbaraglia’ le audiences cont “Meglio Gufi che mai” l’è stàa el regista Beppe Recchia.

brivio.roberto@yahoo.it