Pellicola cinematografica
Milano, 2 febbraio 2020 - In milanes, ma me risulta anca in alter dialett, gh’hinn di moeud de dì che te incioden. Ghe n’è on bordell classificaa e degn de vess tirà a man. Van ben per tutti: “azionisti e president, gran politich e sergent, poaret e chi l’è abbient, religios e Cardinal, Re, Regin e animal, Papi, suor, fanigottòn, operari e dirigion”. “Per tornacunt, per fa giughina,/ chi va al molin el se infarina. Var pù on amen curt e sincer/ d’ona longa sfilza de preghier. Inutil vantass d’on bon usell/ quand se sa che l’è tutta pell. Anch se in apparenza la logica strid/ toeughen a chi piang e daghen a chi rid! Gh’è de la gent scarsa de cervell/ perché quand la fa el fa anca quell/ d’ignoranza fan esibizion/ se creden “cim”, hinn di grand cagon! Politegant e bausciatt,/ coerc bon per tucc i pignatt. L’ignorant ch’el dà d’intend de savènn dee pu/ el fa rid anca el cuu. Quand che la merda la monta al scagn/ o che la spussa o la fa dagn.
” La stranèzza l’è che in squas tucc gh’hoo mis el sciampinn cont n’avventura. Ciappa per esempi l’ultim, quell de l’affari che monta in scagn. Tanti ann fa’ gh’avevi tutt pront per fa’ on film. L’avevi scritt, sceneggiaa, organizzaa. Titol: Facce di gomma. Gh’avevi do produttor che metteven i danèe. L’ un el se occupava de diamant, l’alter de filand. Vorevi scritturà do attris de nomm, per fa’ cassetta. Vuna l’aveva firmàa, l’altra la rispondeva mai. L’era ona conoscenza di primm temp del cabaret. La vegniva semper in prima fila, a ridd. L’avaria fa’i salt mortal per laorà cont numm. L’è diventada importanta col cinema. La segreteria telefonica la rispondeva semper “Ahimè. Non ci sono ma mi troverete telefonando a…” Mi telefonavi ad “a” e me rispondeven che l’avarissen avvisada subit. Depoeu duu mes de telefonad a voeui e del “Ahimè, ecc. ecc,”on di’, esasperaa gh’ho lassà in segretaria la formula: “quand che la... ecc.” Uei, l’ha sentii. Me l’ha dit on collega che l’ha incontrada a Ponza incassada con mi perchè l’aveva accusà la sassada. Intant la produzion la s’era stufida e el film l’ha mandà in la gesa di vaver. Tutt per cent (i hoo cuntà) “ahimè”.