El Nazional, on teater de success

Milano, 3 gennaio 2019 -

Ogni settimana lo sguardo di Roberto Brivio affilato in decenni di satira, esercitata come attore, scrittore e chansonnier, illuminerà angoli della Grande Milano di oggi: i suoi vizi, le sue virtù e soprattutto la sua gente, da raccontare con irriverenza e tenerezza, come sa fare lui. E in lingua madre: il dialetto milanese.

Mi credi che pussè milanes del Nazional ghe ne sia minga. On temp l’era del Giordano Rota, persona mitica nel camp del teater. El vegniva a vedè The Rocky Horror Show al me Cristallo de via Castelbarco, in pè (l’era semper straesaurii) poggiaa ai paret de alluminio che avevi fa’ per l’acustica. El Nazional da cinema e cinema-teater, l’è passaa a teater e adess l’ è vun di maggior loeugh de spettacol de la città, in doa se programmenn Musical da la longa tegnuda. Nel passaa el Nazional, l’ha ospità varij rassegn de canzon milanes, l’Arca Canora inventada o portada avanti, ma l’è la stessa roba, dal Tullio Barbato, direttor de la mitica radio Meneghina; l’ha ospità stagion de prosa, e anca ona produzion che impegnava per la prima volta in teater Diego Abatantuono cont on Molière.

On bel dì l'hann sarà su. Gh’e’ semper de fass vegnì on quaj brivid quand saren on teater. O el derben pù per trasformall in garage e aspetten che el Comun ghe cambia la destinazion d’uso (in ‘sto cas el teater podaress vess sarà su anca per des, quindes ann, la fin che farà l’Italia o Majestic in piazzal Lodi) o che on quaivun compra el stabil per sbattel giò e tira su ona ca’ d’appartament. Hoo dit appartament minga appuntament, anca se la sariss pussè redditizia e cont on gir de contant da fa’ invidia a on Super Super. E i proprietari di centri benessere cont i massagg reclamizzaa vistosament cont insegn cines o giappones ne sann on quaicoss sul guadagn. «Qui si fa la tuina». Cossa l’è la tuina? M’hann mai vorsù spiegamel. Bisognerà che decida de domandal direttament a on quai pos tribul del gener. Al Teater Nazionale gh’è el Musical “Mery Poppins”, scritta come se legg. Nell’offizi de Matteo Forte, l’amministrador delegaa, on primm pian cont i finestron che guarden piazza Piemonte, hoo cercà de capì l’andament de ‘sti musical che fann esaurii (adess se dis sold aut) per duu o trii mes. «Quand gh’emm derbi el teater depoeu trii ann de ristrutturazion l’è stada ona bella novità per ‘sta città», el dis Matteo. Per via dei musical che avii faa? «Anca, ma suratutt per la tegnuda. La gent de Milàn e dintorni l’era minga abituada a vedè on laor teatral in scena per trii o quatter mes». Minga vera, disi. “Siamo tutti milanesi” cont el Nino Besozzi l’è stà su trii mes de fila e l’ha replicaa per circa trii ann. «Alter temp», el me fa Matteo Forte cont on sorris. «Gh’era no la television. L’unich concorrent l’era el cinema. Frequentà el teater l’era on fatto de cultura». E numm Gufi? Teater Nuovo 65/66, duu mes de fila, El Matteo pensa e poeu el replica: «L’era el cas che conferma la regola. Vialter sii staa on fenomeno come hinn staa e hinn adess i Legnanes». Me ven on sorris de soddisfazion, subit smorzaa dai paroll seguent.

«Ma sii sta' anca quatter pirla a dislenguass. Mi s’eri giovin e podi no giudicà, ma tutti disen inscì. Del rest quand sii vegnù al Nazional Ti, Patruno e Svampa, gh’è stà el sold out». Matteo el parlava minga milanes, sot mi che volti i so’ discors. Lu el dis che i so’ nonni parlaven domà in dialett. L’è de lor che l’ha imparàa a capill. Ma la bravura nel portà ai stell on teater de circa 1.500 post ghe l’aveva denter e depoeu ona sana gavetta l’ha tirada foeura. El me parla di compagnii che allestissen on Musical cont i regol del teater di importazion: regista l’istess, costum nanca on naster divers, vos che sembren quej del laor original, coreografii che hinn different nanca de on pass; financa el trucco parrucco el va dent la caterva de spes de manteniment di personagg che vegnen da Londra o Francoforte e loggen in Hotel 5 stelle, la politica la c’entra no, mangen in ristorant tipo Savini, vesten in Napi street, insomma deven avegh ona paga squas de calciator, che la se po’ no ammortizzà cont i prezzi del bigliett a 40 euro de media lorda. Mi credevi che fudessen giamò prezzi esageraa. «In Germania la media l’è de 80 euro. Voeur dì el doppi». Ma se la media di stipendi l’è 1.300 euro lordi, cont on bigliett ch’el costa 80, ona famiglia de quatter personn portarien via a la ca’ 320 euro, e poeu gh’è de giontà nel mes on cinema, ona partida, on concerto, ona pizza, on liber, el quotidiano e nissun el dev fumà se de no comincen i debit.

Matteo el rincalza: «L’è per quest che gh’emm miss in pè di produzion noster. Fittom per on periodo de temp i diritti e allestissom el spettacol come voeurom numm, senza la spesa di trasfert e stipendi del lor personal». Ueilla, l’è in gamba ‘sto Matteo. El sembra che gh’abbia inventà l’acqua calda come diseva el Walter Chiari in la commedia omonima scritta dal Paolo Mosca, inveci l’è ‘na geniada, come quella de mett su, anzi sotta, al Nazional ona scola de Musical in doa i allev imparen a cantà, a recità, a ballà, e poeu vegnen scritturà per quel che serv a la produzion Entertainement, che prima l’era tutta olandesa, e adess l’è a mezz cont l’Italia. «E per la prossima stagion, cont l’organizzazion in partenza da febrar, ghe sarà ona sorpresina. Te ne parli no perché la dev ves ona novità quand sarà el moment de presentalla». Vardi Matteo Forte. L’è propri Fort. Giovin e in gamba. E anca simpatich, me par che el guasta no. Ghe foo ona domanda a l’improvvista: e el Liric? El doveva minga vess voster? «El doveva. Per on certo periodo serom sicur de aveghel. Semm in lotta. Sperem», el dis mentre m’accompagna a la porta. «Liric …ex Canobbiana...», el me fa’. Per el moment «On Sogn». «Doman... del doman non v’è certezza», el me dis roband on vers a Lorenzo el Magnifico. Beh, el Nazional, lu e l’intera organizzazion gh’hann el profumm de Magnifich. brivio.roberto@yahoo.it