Se duu concert ve paren tropp

Milano, 25 febbraio  2018 -

Ogni settimana lo sguardo di Roberto Brivio affilato in decenni di satira, esercitata come attore, scrittore e chansonnier, illuminerà angoli della Grande Milano di oggi: i suoi vizi, le sue virtù e soprattutto la sua gente, da raccontare con irriverenza e tenerezza, come sa fare lui. E in lingua madre: il dialetto milanese.

El comunicaa dell’Enrico Intra el m’ha mis in subbuglio per duu reson. La prima el contenuto del concerto che l’Enrico multimusica el va a fa’ doman sira al Piccolo Teatro ai or vintun (21), la seconda perché propri in quella sera (26/2) e semper al Piccolo, sala de via Rovello, sede classica del Teater poussè luster d’Italia e forsi anca d’Europa, che l’ha dà i nadal artistic a Giorgio Strehler, on genio del Teater, gh’è el concerto in commemoration del Nanni Svampa, mort ses mes fa. Ma porco sciampin s’hinn minga accort che nella stessa sera van in scena duu concert e che el pubblic el podeva vess interessàa a tucc e do? Voeuri minga paragonà el Svampa a Chopin, Debussy e alter. Ma el pubblic, magara, l’era interessàa a vun e all’alter che, varda on po’, se incontren propri nel personagg de Enrico Intra, el fondator del cabaret a Milan, e dal moment che nissun l’aveva faa, anca in Italia. 

E chi èren quej de la prima guardia del Cabaret a Milan? Pupo de Luca, Enzo Jannacci, Liliana Zoboli, Silverio Pisu, Tinin e Velia Mantegazza, Franco Nebbia, Augusto Mazzotti, Roberto Brivio con la famosa “Bevi Rosmunda bevi nel cranio vuoto del tuo papà..” e “Vorrei tanto suicidarmi” musica de Ario Albertarelli , fin quand a hinn rivaa I Gufi (Brivio-Magni-Patruno-Svampa). E adess I Gufi hinn domà Brivio e Patruno perché i alter hinn andà, speremm, in ciel insema a quella miriade de personagg che in questi ann hann saltà l’Acheronte, gh’hann fa on sberleff al traghettator Caronte e s’hinn involaa tra i Sant del Paradis, magara passand per el Purgatori, per sentì el Svampa cantà “ purga i me peccaa” del Brassens, voltada in milanes. Uei, peccaa che el concert l’è vers piazza Castell e la commemorazion a la fin de via Dante, se de no, nell’intervall i artist podeven scambiass de post. Quej dell’Intra, Enrico compres, passaa sul palch scenich del Svampa, e quej del Svampa (in ordin de entrada per i proeuv: Luca Maciacchini, Umberto Faini, Enzo Jacchetti, Duperdu, Claudio SanFilippo, Alberto Patrucco cont el pianista Caldarini, Flavio Oreglio e i Staffora Bluzer, Franca Mazzola, la cantante Vesco, Roberto Brivio e Lino Patruno, e per conclud el presentator de la serada Raoul Cremona) passaa sul palch scenic dell’Intra. Se te guardet la pagina di spettacol de Milan te se rendet cunt che el Lunedì l’è ona vera fusina. Se leggen poesii, se fann cicli de conferenz, gh’hinn i commemorazion, i proeuv general de on quajcoss de noeuv, i riunion, i anteprim, i proiezion privàa e pubblich. Par che la città la se deseda dal letargo de la domenega che ona volta l’era piena de attività e adess l’è settada giò. 

Del rest la festa l’è fada per riposà. Ma temp adrè gh’eren i film de la mattina, la Messa del mezdì rappresentazion del podisnà, i replich de la sera. Frequentaj l’era come riposà, svagass. Minga tanto per quej che ghe lavoraven. E allora l’idea del Lunedì. Inscì te devet divides tra ona presentazion ai ses, e on conctail ai sètt, on pontell ai vott per tirà i noeuv e cor a ona rievocazion. Fortuna che tutt se ferma a mezzanott se de no al Lunedì el sarìa movimentà pussè del Sabet. Per tornà a bomba metti de seguit in del solit riquader la lettera dell’Enrico Intra ch’el parla del so’ spettacol, De quell’alter a gh’hinn i comunica de cronaca e voeuri minga interferì.  Ma l’Enrico, che l’è on Maestro, direttor de ona schola Jazz comparada al Conservatori, el gh’ha semper on quajcoss per mord. Per esempi la parola borderline che sul vocabolari l’è indicada come frontera, confin, margine, bordo e de chi (quindi) “linea de confin”, me la mett squas come on rimprover. Rimproveri a part quand i argoment a hinn tanti se sa mai a qual dà la preferenza. Mi lassi la scelta a la saggezza del pubblic. Se andii de chi ghe sont mi se andii de là gh’è lu. A vialter l’ardua decision. Basta che se troeuven i post! brivio.roberto@yahoo.it