Freddo
Milano, 19 gennaio 2020 - "Gennar fa’ i pont/Febrar i e romp/Mars fioeu d’on baltrocca/ in April se pisocca/ Magg omen e don vann i amor/Giugn per el forment l’è segador/ Luj la terra la buj/ Agost el so’ l’è fosch/ Settember l’uga l’è most/ Ottober cucumber pertegom i rover/ November l’està de San Martin/ Dicember l’è el mes ch’el nass el Bambin». Donca, hinn giamò 26 dì che el Bambin l’è nassù, second la convenzion stabilida da Papa Giulio. El Nadal l’è finì e comincen i puntell svariaa cont el calendari. Gennar l’è miser de fest. La Befana el ses (6), la Memoria el vintises (26) e nient alter. Sì, el trenta (30) e trentun (31) i giornad de la Merla. El frecc ch’el dovariss fa’ barbellà tucc. Ma quand te se dessed la mattina te set lì a pensà cossa mett, perché i giornad prometten cald, e i serad frecc. Mett che ona mattina te se vestisset legger per minga sudà cont i riscaldament che vann fort perché l’è la regola, e per on cas de destin, senza preavvis, te capita de rientrà ai sett (19) o ai vott (20), te sentet l’aria che l’è diventada giazzadina, tant l’è vera che, vers i trii, veder di macchin, tecc e prà hinn pien de brina, e te se pentisset de minga avegh indoss on golfin, un giaccon foderà de pel o on mantellon sora tutt. Per minga parlà di scarp. Va ben che adess gh’hann tutti scarp de pallacanèster.
Ricordi che me papà el voreva che andassi in gir cont i scarp luster de cuoio e portassi in cartella quei de gomma che doveven servì domà per la ginastica, la palestra, el camp sportiv. Adess second la moda, i donn giren cont i stival che i e fann sembrà tutte ippiche, cavalcatrici nel senso di Amàzzoni. I omen cont i scarp de tennis (Jannacci profeta) rinforzà, cont l’interno de pel, e la soeula lusnante. Uso? Costante. Spuzza? Latente. Comodità? Lagnante (pè che trasuden e se riempissen de vessigh). Merla o non Merla, Gennar l’è on mes de poca fantasia. Disen tucc che l’è long, chel finiss pù, che l’è noios, specialmente se gh’è minga el frecc. El cald, el so’, te fa passà la voeuja de mangià la Cazzoeula, la Busecca, la Polenta Vuncia, la luganega in padella, el codeghin cont i lentiggi, la pasta e fasoeu, el risot giall a la monsciatta, i mes’ciòss de less, manz al grass de ròst..., bevegh adrè el nettare de San Colomban al Lamber e conclud cont el pan de mej e i tortei de Carnevaa a la milanesa. M’è vegnù ona sgagnosa de la madocina. Pianti chi e voo in cusina a famm trii o quatter polpett de verz come aperitiv.
mail: brivio.roberto@yahoo.it