Un treno (Foto di repertorio Pressphoto)
Milano, 21 novembre 2019 - El treno de spess l’è el mè unich mèzz de trasport. A ona certa età, anca men dell’età certa, se lassa a ca’ la macchina, se ciappa el treno pussè comod anca se squas semper in ritard. El student, toccà brutalment dal locomotor a Costa Masnaga, l’ha attraversà de corsa el primm binari per andà sul second e ciappà el treno per Lecch. E perché serviss no del sottpass? Perché la stazion l’è voeuna di tanti senza sottpass o attraversament veggia manera cont i pedann che metten in pari binari e massicciada per creà minga occasion de topicch. “La sicurezza la dev vess migliorada” commenta on portavos del Comitaa di pendolar”. Ne parlen dal 2009. Fina incoeu “niente di fatto”.
Ghe voeur l’incident per moeuv almen ona quaj opinion. Mancanza de sottpass, assenza di passerell, ‘banchine troppo corte’?! Ma chi l’è l’ingegner che el gh’ha minga provvedù a fa’ on quaicoss, chi l’è ch’el progetta i stazion, che studia i binari, ch’el sorveglia i lavorador, ch’el se accerta che ghe sien minga fa’ cazzad? E chi l’è l’offizi che magara l’ha ricevù i reclamm, la richiesta di provvediment, la nota de pericolosità, e l’ha missa in del cassett in attesa de ordin superior? Chi è che l’ha tirà in long dal 2009 al 2019? Quanti responsabil quand succed on incident. E cont lor anca i viaggiator, specialmente i giovin che spavaldament fann finta de senti no’ la registrazion che dis ogni trii minutt “Non superare la riga gialla”. E allora perché propri i student per fass bej cont i sgarzolin, e i sgarzolon, attraversen i binari e finissen dall’altra part cont ona ridada de scherno. N’ho vist voeuna a Trezzan esse enne, cont ona bicicletta sui spall, inciampà. Fortuna che el treno l’era in ritard. Quaivun disarà: “la fatalità”. Mi voraria dì alter paroll e fa’ coragg al macchinista. E all’infortunà salvà e foeura dall’ospedal… quatter bej sgiaffoni...
mail: brivio.roberto@yahoo.it