Teater
Milano, 30 marzo 2018 - Ogni settimana lo sguardo di Roberto Brivio affilato in decenni di satira, esercitata come attore, scrittore e chansonnier, illuminerà angoli della Grande Milano di oggi: i suoi vizi, le sue virtù e soprattutto la sua gente, da raccontare con irriverenza e tenerezza, come sa fare lui. E in lingua madre: il dialetto milanese.
M’è capità tanti volt de fa’ di comparazion, specialmente quand lavoravi per la Radio Rai e scrivevi test che poeu dirigevi e fasevi recità ad attor de comprovada bravura radiofonica. Quand sont vegnù foeura dall’accademia de Arte drammatica la prima roba che hoo faa cont i me compagn l’è stada quella de andà a famm i fotografie da on professionista de nomm (Luxardo) e de fa’ i provin a la Rai. Provin che i avevom ciappà sottogamba. Te capiret. Te vegnivet da ona scola durada duu ann e te se sentivet de spaccà el mond, senza capì che te stavet per affrontà on lavorà in doa l’era pussè facil che el mond el spaccass ti. El regista di provin l’era Eugenio Salussolia, direttor de quei commedi che allora alla RadioRai andaven per la maggior. Adess cont la scusa che i giovin preferissen alter ritmi i e fann pù, senza tegnì cunt de l’educazion che te daven. Disen che el teatro l’è maestro de vita. Se ved quell che imparom adess senza certi maester! Legg, el diseva Salussolia, depeu che l’assistent de studio el t’aveva dà on feuill cont la part. Ti te leggevet cont baldanza, risultaa, zero.
Sul natsre restaven domà di vers. Perché? Perché te gh’avevet no la spinta del diaframma che la mandava la vòs foeura e la faseva penetrà in del microfono. L’è quell che succed adess in di sceneggiaa ciamà fiction. La maggior part di attor, bej facc, bej espression, bell portament, vòs nient, a hinn can, disarissen i vecc che purtroppo a gh’hinn pù e poden no insegnat come se fa’ a recità senza recità, a vess natural senza vessel, a usà el fiaa, la gola e i cord vocal, a vosà senza vosà, e a fass sentì in fond al teater senza parè. Tucc, da Volpi a Lionello, da Gassmann a Carmelo Bene, da Benassi a la Volonghi, da Santuccio a la Brignone, da Proclemer a Albertazzi, da Stoppa a Morelli, e cent alter icone del Teater italian, adoperaven la vòs come se in del stomich gh’avessen avù ona caverna rimbombante.
T'è sempre capì tutt quell che diseven. Adess pocch e nient. I teleattor sussuren tucc in la stessa manera. Per lor dì “ti amo” e “ti odio” l’è la medesima roba. Tutt linear, senza inflession, senza color.Monotoni da faa indormentà. Partissen ben a parlà coram populo e finissen per parlass addoss, a fa’ i soliloqui . Come i pret in Gesa, che quand preghen se fann capì, quand predichen te fann dormì. ‘Sta lezion mi l’hoo imparada la prima volta che me sont trovà di là del veder a fa’na regia radio. Fermavi semper, tucc, fina all’esasperazion. «Te parlet che se capiss pocch, che attor te set? La toa vòs la dev vess ona musica, cont i not che van dal Do in avanti, minga che resten semper al Do». E se tratta no de cantà. Se tratta de recità. Ghe ne saria anca per i cantant che quand fann la strofa (come el sosteneva in d’ona riposta l’Enrico Intra) canten bass che se capiss nient e poeu sgàren, strillen, vosen, squas per fa’ sentì che l’emission la gh’è. Domandi scusa ma me sont fa’ ciappà la man dal discors quand hoo comincià a parlà di comparazion. Cossa gh’è da comparà? Prima de tutt la vos, come hoo giamò faa. Peu el moeud de recità. Sillabazion giusta, finì i paroll, minga lassaj sospes alla penultima sillaba, scansion professional cont la vòs, come se dis, de petto. Omen e donn.
L'è ona comparazion tra quej che san no adoperalla, la vòs, e quej che la adoperen al mej . Peu la coloridura. Incoeu sentivi ona puntada de “La Signora in giallo” cont la Landsbury, doppiada cont ona vos inconfondibil, tipo quella della Lattanzi. La storia la se svolgeva in teater cont el solit omicidio. I attor a eren pront per andà in scena. Riva el regista o el capocomic, el dis «Caraggio, entrate, scandite, fatevi sentire» e peu el se rivolg a on giovin «E tu vedi di non sbrodolare come al solito». T’è capii che insegnament? Ed ecco la comparazion tra chi parla e chi el cred de parlà, tra chi recita e chi el voeur vess natural ma senza nèrv in de la vos el riva nanca a la prima fila, tra chi el sona e chi el cred de sonà. Hoo assistìi a concert de pianoforte in doa se sentiva sonà domà el piano. El forte el gh’era mai. On pianoforte monorde l’è tutt dì. E inscì, come se compara un film comic da on alter comic, da ona commedia drammatica e on’ altra quasi tragica, se compara anca la musica. Per esempi in questi dì, che semm nel periodo de Pasqua me venn in ment de quand al Teater de Villa Clerici hoo traa in pè on spettacol cont el Giacomo Celentano, la Claudia Koll e tanti alter che cantaven musica religiosa, intitolaa “Tra Sacro e Profano”. Gh’era ona cjara e netta comparazion tra i duu moeud de affrontà i argoment. Ma me n’è restà vun in del co’ che me piasaria sviscerà. La comparazion tra la musica Sacra e la musica Jazz. E chi mej del citato Enrico Intra el po’ damm ‘na risposta? Ghe giri la domanda e foo mett in del solit riquader la risposta