Milano,17 marzo 2020 - In Italian la parola “bell” l’è usada in tutti i sals: bella malattia, bella guarigion, bella vita e bella mort… Insomma “bell” el va ben in ògni combinazion. Nel me liber di parolasc, ediz Meravigli 2012, l’hoo nanca considerà per da’ spazi a “Bella”. “Bella come el cùu de la padella”, disi nel comment. Disi anca che prima de trincià on giudizi bisognaria vedè se propri propri l’è bell ‘sto cùu padellent. Ghe gionti anca che l’insult el ‘sta minga in pe’ se l’è minga precedù da: “te set” o “a l’è…” e disi anca che i padell hann formà on’associazion (finanziada) che difend la categoria.
Chi ghe va contra el corr el risc de vess ciappàa a padellad. E mi ciapparia a padellad tucc quei che creen confusion a proposit del Corona Virus. Te partisset a curass come te consiglien in Tv, e te finisset per domandatt se quell che te fet l’è giust. Prima i mascarin o marmottin van ben, poeu fann nagott, poeu ghe voeuren, poeu gh’hinn i sciacall che aumenten el prezzi, poeu la costa ona madocina, e a la fin te la pagher l’ira de dio. Adess ghe n’è nanca voeuna. Te consiglien de falla cont la carta forno, cont la carta d’alluminio, perfinna cont la carta igènica. La polmonite da virus la se po’ minga curà cont l’antibiotich, e se desmenteghen de dit come te se devet curassela a ca’ toa, perché, sta’ in ca’, la sarìa la panacea.
Hoo cattà su on poo de discors. “Se te gh’heet toss e fevera, vist che i ospedal hinn tutti intasà e che gh’hinn pu lett per la rianimazion - hann portà da Bergamo do’ ‘mmalà fina a Palermo - ona guardia medica che la va avanti e indrè e la te applica i apparècc podarìa servì mej che vess abbandonà in on corridor de ospedal” “Per curass in ca’ te devet savè se l’è polmonite da antibiotich o no” “Ma se l’unica reson l’è quella del spazi, perché riattiven no i caserm abbandonà?” “Manchen apparecchiature adatte? L’unica la sariss che Le Banche o i vari Fondazion bancari comprassen i macchinari che manchen”. “Bravo. Minga stanzià i somm a on altra fondazion che i e ‘dopèra per pagà arretraa e stemm cito su alter tipi de spesa” “Certo. Comprà i respirador travers l’“ufficio acquisti” de la banca donatrice, e poeu daghi in duu dì ai struttur che ghe n’hann bisogn” “Idea strepitosa e intant formà squader de “pulizia” in tutta Italia per sistemà i casèrm che dovarissen avè giamò tutt: lett, linzoeu, coert, servizi, offizzi” “Scommetti che hinn bon de dì “bella idea ma la fa’ minga part di noster procedur!?”.