telecom
Milano, 17 gennaio 2019 - Telecom per on' offerta strepitosa. Fissom on appontament a ca' de la mia miè e convint de quell che m'han presentaa (eren in duu, mas'c e femmina) firmi on contratt. I venditor hinn semper istess, sia che venden salam sia che venden telefonìa. Tiren foeura i argoment pian pian. Questi duu hann aspettà la firma per presentà el colp final: el cubo. L'han dit inscì, de passagg, come se el fudess on prèmi gratis. Ghe sont casca'. L'era gratis domà per ona proeuva de trii mes e depoeu avarien applicà on cànone. Ona stupidada, diseven lor, ma anca 1 euro al dì, ad es.,che sembra nagott, fann trenta al mes e 360 all'ann. Per Per vedè tutti i film, quei naturalment in dotazion a la Tim. Mi che s'eri abbonà a Sky e sont staà costrett a interrompel per via che gh'avevi minga temp de guardall, mi che me senti no de passà la sera a la ricerca de on quaicoss telecomandand 300 canal, mi che voraria vedè el teater in television, come succedeva ona volta e adess ghe nanca ona commedia, mi che hoo presentaa progett su progett per mandà avanti on'idea teatral televisiva e hoo trovà domà vun interessaa, a st'ora forsi “mort”, avevi ciappà on cubo in del cubo.
Figuremes che in trii mes de proeuva l'hoo taccà nanca ona volta! E allora hoo telefonaa per di' che voreri restituill. Risposta, sì, che le manda, ghe do l'indirizz, come el ricèvom ghe cancellom l'addebito. Ma come disi, Avii dit che l'era gratis! Risposta: Se le tegniva! Dato che le tegn no el dev pagall. No, avii capii Se tegnivi el cubo me le daven gratis, dal moment che ghe l'hoo daa indrè devi pagall. Chiarezza e trasparenza. E allora, incassaa al massim hoo dit: Ve l'hoo mandà indree e conservi la ricevuda de la posta.. L'era noeuv, mai usaa, e gh'hoo fà i foto come prova, con testimoni ancamò viv pronti a giurà sul cubo. Voeuri che el sia scontàa da la bolletta. Quand avii faa l'operazion paghi la differenza. Hoo mai ricevu' risposta.
Chissà in doa l'è andada a finì la raccomandada e chissà in che man l'è finì el cubo. Ogni volta che telefonavi me rispondeven ona volta dal sud, ona volta dal nord, ona volta dall'Albania, ona volta dall'Austria. Saveven mai nient e per de pu a lor risultava tutt regolar, perfinna el pagament. Depoeu gh'è stà l'assalto. Telefonaven da Wind, da Tim, da la Trii, da Infostrada, da Vodafon, da l'Autostrada, da la Provincial. Gestor cont on'offerta e per client noeuv pussè vantaggiosa. E mi cuntavi la storia del Cubo. E tucc a dì: eeeh! El cubo! Esclamazion per significà che l'era on affari complicaa e foeura de rigol. Mi disevi, specie a quei de la Tim, che gh'era el contenzioso per ona bolletta. E i callcenterist a dimm de preoccupames no che avarien mettù lor a post la question, che se trattava de on' offerta noeuva che la comprendeva prezzi, vantagg, e on' altra specie de cubo. Mi che me pias minga fa' i contratt per telefono ghe sont cascaa e hoo accettà la Tim. Cinq minutt Mezzora tra spiegazion e risposta de Si ai vari domand che el telefonista el faseva.
El voreva squas conoss tutti i particolar de la mia vita. Ad on certo punto gh'hoo domandà i so'. L'ha dit che podeva no dammej. Ma come ! Lu el voeur savè quanti volt voo a la toelette in ona giornada e el me nega el so' nomm Tant hoo baccajà che me l'ha daa. Roberto come el me. Hoo pensà che el me ciappass per el fond de la s'cena e inscì me sont fa dà anca la soa parentèlla. Per falla corta, voeuri minga stufì, anca se so' che hinn robb che capiten a tucc tutti i dì e a tutti i or, sont passà da la ciavetta Tim a Tim linea interna già pronta. M'hann mandà on tecnic per i collegament, hann sbaglià cassonett, l'ha podù fa' nient, l'è andà via e invece de tornà m'hann ciamà ancamo' per dimm che ghe voreva on terz garante. Se dovevi fa' I hoo mandà a quel paes e me sont tegnù la mia ciavetta.
Hoo vorsù fav la storia completta per significà che vivom in on paes meraviglios ma cont ona burocrazia che quella russa l'era nient in confront. Recordi ona commedia intitolada “Ma è poi esistito Ivan Ivanovic” de Nazim Hikmet missa in scena al teater del Corso ( l'era sotta el bar de le Tre Gazzelle in centro e l'hoo amministraa per duu ann) nel lontan 1960/61 in doa la burocrazia la faseva da padròna. Uei, eren rose e fiori.
Chi ch'è de tutt: fioeu che nassen a la vigilia de Nadal e poden no vess registraa fina a Gennar, tabacchee che fan no la poste pay perché ghe dann pu' el permess, cart de identità del tipo noeuv come la tessera sanitaria che per aveghi te devet prenotaj e costen fino a 25 euro, document perdù o roba' cont el portafoeuil che per fa' 'na denuncia te domanden de presentà i document(sic), rotond miss in mezz a quatter strad tutti cont el senso vietato, e depoeu trii gir te vedet on cartellin sbattù in d'on canton de voeuna cont scritt de passà controman, cartej stradal che manchen e te costringen a viaggià a la spera indìo, e…vai col liscio. On dì i elencaroo con pazienza e ghe faroo on liber. Per el moment on consili: cambii nient de la vostra vita, perché ògni cambiament el costa danèe e temp. E fasii ona copia conforme de tutt, anca de vialter, se sa mai! brivio.roberto@yahoo.it