Anche un bambino può scoprire la sensazione particolare di sfogliare un giornale
Milano, 4 dicembre 2018 - Ogni settimana lo sguardo di Roberto Brivio affilato in decenni di satira, esercitata come attore, scrittore e chansonnier, illuminerà angoli della Grande Milano di oggi: i suoi vizi, le sue virtù e soprattutto la sua gente, da raccontare con irriverenza e tenerezza, come sa fare lui. E in lingua madre: il dialetto milanese.
Ti guarda. Me capita de vess in gir per Milan, in cors XXII Marz visin a la gesa de Santa Maria del Suffragg, e de entrà in la libreria affiancada al becchèe sul canton cont la via Fiamma e intant che guardi i liber, tacchi a parlà cont el me cugnaa Gfranco che m'ha accompagnaa. “Te vedet” ghe disi “I liber a hinn come on vestì. Chi o davanti a la mia libreria d'appartament, o in biblioteca, te vestissen, de dann ona protezion, te derben el cervell, te podet passà chi denter or e or a sfoeuiaj e te se accorget nanca del temp ch'el passa. Te venn voeuja de comprai tucc, de podè leggej a velocità supersonica e dal moment che quand ti e ciappet in man te comincet semper da la fin te dovarisset vess come Pico della Mirandola. Pensa che in vun di me dodes hoo miss la prefazion al post dell'indice e viceversa. Vun ch' el gh'ha el vizi come mi, derba in fond e comincia a legg dal principi. Tutt all'invers. I liber a hinn util minga domà per quell che gh'è scritt, ma anca come arredament de la ment, come magazin del savè. Me basta a volt guarda' el dòss (dorso), legg i titol, girà la copertina, perché me se derba(apra) on orizzont. In la Bohème i e brusen per scaldass. Mi podaria morì de frecc, puttòst. Basta a volt guardaj per scaldass. Personagg, concett, storj, paesagg, avventur, amorazz, gh'è el mond. Te vorarisset che tutt te penetrass in del co'”.
El Gian Franco el sorrideva. Ghe sembravi esageraa. El pensava che mi cercassi de fa' dell'umorismo. Mi s'eri convint, perché tutti i robb che passen per i noster man, che guardom cont i noster oeucc, gh'hann el doppio uso, e certi volt anca el triplo, el quartuplo. Domà i macchin fann quel per el qual hinn sta' programmà. On computer el podarà scriv, fa di cont, conservà in la memoria tutt quell che l'è possibil, fa' de archivio, ma el finiss lì. Anca se gh'è on quaivun ch'el sostegn che l'è el “tutt” del futuro e che el futuro el gh'è giamò adess, ch' el se mèttarà al post (soppianterà) de la carta stampada, di liber, di giornal. Sarà difficil, disi mi, al cugnaa. Tutt quell che te voeuret ma el giornal no. Te voeuret mett! Per legg on articol, anca de politica, de devet 'contentass di titol che metten nel portal, se te riesset a derbì la pagina. Se de no cont el mouse te se mettet a la ricerca. E magari te sbagliet clicc e te se troeuvet in on' altra situazion. Capita che l'aggeggio el se smorza, se scalda. Te se incasset anca quand la pubblicità la entra cont prepotenza a mett sòttsora quell che te set drè a guardà, a scriv a cercà.
El giornal, inveci, te ghe l'heet in man, t'el palpignett, te ne sentet la consistenza, l'odor, la fragranza. T'el derbet in doe te voeuret e t'el tegnet avert o sarà, t'el sbaloggètt, t'el guaìtet (sbirciare). La pubblicità te la guardet o te la saltet. Te legget i notizi senza tirà el coll, i oeucc per el rifless, senza vess inorbì, imbarbajà (abbagliato) dal monitor. E poeu t'el mettet in pigna, in mucc, pront per vess doperà a fa quell che gh'è de fa' (altre incombenze). I murador cossa metten in testa, on cappel de carta de giornal o on computer E quand te vet in bicicletta cossa te mettet davanti al stòmich per riparass dall'aria Ona stampante
E quand te se accorget de avegh on bus in la soeula de la scarpa, 'ste ghe mettet denter, on foeuill de giornal piegaa o el mouse? E se el to' taolin el traballa perché ona gamba l'è pussè curta dell'altra o per el paviment in pendenza, te mettet minga mezz giornal piegà in quatter per dagh on ordin (assetto) stabil E cont cos'è che te picchet el can in su la s'cena quand te la fa' in ca', quand el boia (abbaia), quand te voeuret educall E cos'è che te adoperet per fa su on pacchet improvvisaa, on regal e te gh'heet no on tocchel de carta da pacch E se te cambiet la terra in di vas de fior cossa te mette sotta al taol o a la cadrega E con cossa te cascet via i mosch vist che la paletta la fa' schivi E cosa te adoperet per pizzà el foeugh del camin La diavolina La benza, pericolosa che la po' s'cioppà E se te smagget el paviment cossa te adoperet in primis per nettal
Poeu te se mettet a nettà la verdura e per facilità la retrovia (nettà el taol) te mettet sotta on giornal. E varda cas te capita de legg ona notizia noeuva. “Com'è” te diset “l'hoo minga vista ”. Te guardet la data, l'è de on ann passaa. Te la salvet cont tanti alter che t'è miss de part. On bell mucc. Ona enciclopedia. Mej de Wikipedia. Ecco, sì, el giornal, l'è ona enciclopedia. Tanti volt el te sorprend perché tira foeura di notizi che te avarisset mai ciappà in considerazion, ma che impienissen i oeucc e la voeuja de conoss. Quand te giret, a part i spes, i fadigh, i delusion, el temp che se perd per rivà sul post, te finisset per vess insoddisfaa. Quand te legget te se derba la ment. Te aspiret paesagg, personagg, news, descrizion, foto. Te desideret de viaggià, vedè, palpà cont i man, sentì i odor. Quand te set là, gh'è semper on quajcoss che el va no. Recordemes che Salgari el scriveva senza moeuves de ca', che Camilleri nel so' ultim liber “Ora dimmi di te” lettera a Matilda el dis che l'aveva scritt cont Gaspare Giudice, su consili de Libero Bigiaretti, trii articol sul canal Volga-Don, el pussèe narrativ possibil. Trii articol “de fantasia”, supportada da materia vera, ch'hinn andà a “ruba”, adrittura in sessanta paes. Gh'è vegnù, depoeu, el dubbi che tanti alter articol fudessen faa a la stessa manera e el pensèe le sconsolava. Allora gh'era no el computer, forsi, ma resta el fatto che el protagonista l'è minga lu, el scrittor che l'ha vendù desdott milion de liber, l'è el giornal, insostituibil per semper, e cont lu, el liber. Basta recordass el Diario Minimo de Umberto Eco, e el capitol “Frammenti” che mi hoo recitaa in teater, in cabaret, in di circol, in di bibliotech. Pensà che la prima volta l'hoo sentù da Pippo Franco ona sera ( lavoravom cont success al Fiammetta cont el spettacol “Il Teatrino de I gufi”) che semm andà a vedell. Eren i so' primissim temp, a Le Grotte del Piccione, a Roma. On local cont i corridora (parli del '64) arredà cont crani, ossa di man, de pè, in tema cont la canzon (Brivio/Albertarelli) “Scheletri contorti scheletri, sorgete dalle bare il giorno del Giudizio Universale…”.