La Lombardia punta a passare subito in zona arancione
Milano, 29 novembre 2020 - Ala mattina on oggiada ai giornal e poeu voo in doccia pensieros per quell che m’è restà in testa. Donca, la pubblicità de la pomada per el nas, la proroga a la patente fina ad April del 2021, el Corona Virus che ormai el se assuefà all’omm e el se trasforma senza che i ciaccer poden fermall, che l’ha cambià anca la soa virulenza in totale assenza di pericolosità, che la Lombardia l’è passada al color de la carota tal che i novax canten “Se gh’han de dì i virologii/i omm de scienza / i rìcercador/ el virus mùta/ el copa pù/el color ross/ ch’el se metten in del…/polipolipoli fa il pollino, qua qua qua qua fa’ l’occhetta, glu glu glu glu fa il tacchino… e di noi che cosa sarà.” Me vegn in ment quel romanz de fantascienza che parlava de ona Sanguisuga aliena taccada a la spalla che la comandava el cervell in diretta. Te dovevet moeuvela no, pena la toa mort. Via l’alieno, via el fiaa, coeur fermo, panscia bloccada, cervell ch’el depon i arm, articolazion gelada, oeucc oscurà, pensee fermo sul la sanguona e el so’ nutriment: el sang. Ona forma de vampirismo noeuva. Ma intant i monitor vegnen couvert da la pubblicità, ciamada dal Mike nazional “Consigli per gli acquisti”.
La pomada per fa’ passà i dolor de s’cena, i vestìi d’inverno che quand ti e vedet indossà da modell (fa nient s’hinn conformaa) te paren che daghen prestanza e quand ti i e gh’heet su diventen strasc, el black friday, e oli, salam, pasta, scarp, cavej, biscott, pillol per i stitich, stitich per i pillol, trii, quatter auto che fann de tutt, da la corsa a la pomiciada, dal portà i fioeu a scola a compagnà i vecc alla “soglia”. L’invid a provà, a comprà, l’è insci fort che te comprarìssed tutt. E intant te penset che tutta ‘sta roba l’ha t’ha miss ona gran confusion compagnada da la frenesia de aveghela. Te manca tutt, dai liber a la pasta per i dent, da la dentera (e magara i dent gh’hinn tucc) al balsamo per i cavej. Per minga poeu parlà de cultura. Te se sentet restà indrèe. E intant te impienisset la borsa de robb che hinn diventà indispensabili. L’alter dì hoo comprà el boeucc de la doccia. Quell che gh’avevi el mis’ciava pocch. L’idraulico l’aveva dit : “Basta on quai bus tappà dal calcare per la mancata fuoruscita della calda.” Hoo nettà bus per bus cont i stècch, gh’hoo faa’ fa el bagno in dell’anticalcare, nient. El noeuv l’è compatt e regolabill. Cont on difett: el me sbusa la pell. mail: brivio.roberto@yahoo.it