Tasse, foto generica
Milano, 20 ottobre 2019 - Leggi sul giornal: spese sanitarie, prestazion e medesin scontà del 19%. Plastic Tax, vint centesim pussè al chilo. Bonus 80 euro, hinn a drè a studià el moeud de tirall via. Quota 100 me piasaria che me’l spiegassen mej. Cuneo Fiscal, i beneficiari gh’hann de vess sota i 26.000 de reddit. Fondo famiglia cont i bonus bebè e i voucher a sostegn di asili nido. Ecobonus, on labirinto; se sa no per avegh danè o per daj, parent a carich. Assegn unich, detrazion fino a € 9OO a l’ann. Mobili e verde, sconto Irpef del 36% per la sistemazion di zone verdi. Ona giungla. Tegniss a ment tutt insema ai alter impegn di tass e controtass, roba tassabil e minga tassabil, gh’è ‘de stordiss. Tira foeura de chi e mett de là, aumenta de su e diminuiss de giò. E vun el va in galera e l’alter la fa’ franca, e gh’è chi mett via i danè (come el fa?!) e chi i e spend, e la roba la fa mostra in di negozi ch’hinn squas semper voeuj. Passom i e vedom desert e se domandom “ma come fann a tirà su la clère la mattina?”.
Sentom de spess parlà inscì: “Piangen tutti miseria, hinn in crisi e poeu fan la fila per or in autostrada per fa’ ona giornata e mezza al mar, o sui Dolomiti. Ma al mar corren al risparmio. Nient ombrellon. Se le porten in macchina da ca’, cont el taolin i sdraio, i cadregh de plastica e i cussit pien d’acqua”. “Mi gh’hoo poca memoria”, el diseva on cervellee che l’ha faa i danè, “ma me ricordi tutt de la mia contabilità compres i scadenz. E anca la mia mièe l’è ona belva per la memoria”. Ona belva? Ona sciora tutta sofisticada che quand parla la mètt in mostra la salle a manger con i correttiv che tiren i dent a la medemm altezza, roba de costagh desmila a dent. Però el marì el m’ha fa’ ona confidenza. Gh’è di difficoltà... erotich. E si che ‘l ciappa i pillol... Me fa’ vegnì in ment ona frase che hoo leggiù in on liber de Elmo editor (1958) “La realtà supera la fantasia”: «Usate profilattico Laytex. Mollezza, permeabilità, estensibilità fino a metri 1,26».
mail: brivio.roberto@yahoo.it