Franco Nebbia
Milano, 11 ottobre 2019 - Flavio Oreglio nel so’ liber intitolà “L’arte Ribelle - storia del Cabaret da Parigi a Milano” Sagoma editore - che sont a drè a fini de legg, el fa’ on distinguo tra cabaret e ridada. “In Italia – el dis in italian – se attribuiss minga a la parola ‘cabaret’ el giust significaa . La stragrand maggioranza di personn le mett insema a la comicità e le tira denter a la battuda a la ridada. El tèrmin cabarettista l’è diventa’ incoeu sinònim de comic. Nient de pussee sbagliaa”. E giò el principi de ona ‘storia’ cominciada all’ Intra’s Derby club a Milan e fermada a Zelig, semper a Milan, prima che la television se impossessass di personagg che ne nasseven. El liber l’è squas on romanz. Porco sciampin che cultura, che linguagg, che assortiment de concett, che esposizion. La sembra ona mostra con tanti quader ‘taccaa a la paret, tanti foto, tanti stori. El par on libri de storia. Ma l’è on liber de storia! La storia del Cabaret a Milan. Ma perchè devi minga parlann adess? Spettà de finill? Intant che scrivi finissi de leggel istèss. E podi dì che in ‘sta storia ghe sont denter fin al coll. Anca cont el co’. Ona immersion totàl (accento in su la à perché se de no me par de fa’ la pubblicità a la benzina). Ogni tant me do ona spinta ai pè, e riemergi, tant de respirà on ciccin, la classica boccada d’aria come quella che se respira battendo el croll. Ed ecco che tra ona brasciada e l’altra, prima de fa’ la cinquantesima sponda, avanti e indrè che bel divertimento, passi in rassegna el liber che el me entusiasmaa a ogni capitol. E ghe n’è tanti. Storich storich, nel senso che hinn storich de storia. Fotografich , per dì pien de fotografii. Notiziarich, o ben, pien de notizi che ti, e ti, e ti te savevet no, e mi…nanca. Puntualizzazion. Virguletizzazion. Ona storia del ridd dai iscrizion rupestri, all’omm di cavern…pardon, tavern, ai roman che saveven come ridd quand faseven mangià i Cristian dai Leon in del Colosseo, no, forsi quest el gh’è no. Insomma, la partenza da le Chat Noir de Rodolphe Salis (1881) considerà el nonno del Cabaret dato che l’è el pader de le Chat Noir. La par la storia che mi cunti e che m’ha cuntaa a soa volta Carlo Rizzo, la spalla de Macario, che hoo avù in la mia compagnia de Operett, e che hoo semper pensà la fodess ona storia cabarettistica de la vita, de ona attualità che la mètt sòttsora. Infatti el Rizzo me diseva, cuntala anca fra 50 ann, l’è semper fresca come se la riguardass el moment che te la diset. Stii’ attent: Io ho sposato una vedova/ Mio padre ancora giovane ha sposato la figlia di questa vedova/ mia figlia, quindi/ Mia figlia sposando mio padre è diventata mia madre/ e io devo chiamarla mamma/ Ma mio padre sposando mia figlia è diventato mio figlio/ e mi deve chiamare papà/ Poi, loro, hanno avuto un figlio/ questo figlio essendo figlio di mio padre è mio fratello/ però essendo figlio di mia figlia è mio nipote/ quindi io sono mio nonno/ se sono nonno di mio fratello sono mio nonno. L’è squas ‘na storia katartica. Ti pensa. Inveci de insist sul Katartich, Oreglio che in frances se scriv Aureglio (au legg o), el parla di Hydropatici, de cabaret de parola, cabaret de situazion, de teatro-cabaret, de cabaret musical, demenzial e sentìi, sentìi... cabaret intelligent, ma se gh’è el cabaret intelligent el sottolinea Flavio, gh’ è anca el cabaret idiota. Notazion degna del Katartich, scrittor de katartikasserie come ( voltà in milanes by mi): L’amor l’è on attimo. Mi t’hoo abituada inscì/// Per fa’ leva sul me’orgoglio l’ha scernì i me ball come se fodess on ponto d’appògg ( nota: el milanes l’è pari al puglies. Anca lor disen d’appògg) /// Se viv no domà d’amor, però c... fasemel!/// Che fann pendant cont quej ch’èmmm scritt mi e el Mazzotti (1970): Giovin disperà el pizza el televisor e el se butta in del second canal/// Fiscalismo in del Paradis Terrestre: Adamo e Iva ///el giovin regista impegnaa per la soa opera violentement satirica el s’è servì de ‘na macchina da presa per el cù /// Ma parlemm ancamò de l’Arte Ribelle. On liber de tegnì in libreria, de legg tutt in d’on fiaa e consultall anca per ricordass stori e personne ch’hinn diventà important e ch’hinn passà a Milàn dal Santa Tecla a la Muffola, dall’Intra’s Derby al Nebbia club, dall’Intra’s al Corso al Lanternin, da la Cassina di Pomm al Cab ’64, dal Refettorio a Le Clochard, all’Art Mondial Gallery, e poeu in teater per conclud cunt Zelig e l’Archivio Storico del Cabaret Italiano. Gh’è pan per tucc. E quej che gh’hinn no l’è perché s’hinn minga fa’ trova’, datosi che Flavio Oreglio l’è on scrupolos e la soa ricerca l’è fina trop meticolosa, e la gh’ha el pregio de vess ona sorta de romanz, puttost che on mero elenco de local e de artist. On romanz del cabaret, minga del gabarè. On gener de spettacol inscì menzionaa per la miss in scena, el moeud de espression, i contenù, la scrittura, i canzun e no, second el pensèe Oregliann, per la ridada che anca se la gh’è la se ferma a volt in del gargarozz perché la reson che l’ha originada l’è amara, ironica, satirica e mai fine a sè medemm.
brivio.roberto@yahoo.it