I Ciappter Ileven
Milano, 2 ottobre 2018 - Ogni settimana lo sguardo di Roberto Brivio affilato in decenni di satira, esercitata come attore, scrittore e chansonnier, illuminerà angoli della Grande Milano di oggi: i suoi vizi, le sue virtù e soprattutto la sua gente, da raccontare con irriverenza e tenerezza, come sa fare lui. E in lingua madre: il dialetto milanese.
Se ghe fudess ancamò el lagh Gerundo el Pellicini l'avaria interessà anca i città rivierasch di so' spond. Ma l' è staà prosciugaa ancamo' ai temp del Barbarossa e per quèst (quindi) l'è pu visibil. Gh'è ancamò on quai rèst ma l'è minga assee per fagh sora on tour. Quel, che inveci, el bravo Francesco Pellicini l'ha progettà per i alter lagh lombard. Gh'hinn denter tucc: Maggior, Com, Segrin, Iseo, Garda e anca ona sponda svizzera de Lugan. Conferenza stampa in Region el 4/10 mattina a la presenza de l'assessor a la Cultura. Ghe sarann tucc i artist convocàa, vun per piazza. Desdott spettacol. Desdott artist.Ona Kermesse che la dovaria comincià propri cont Brivio e la Raimondi, a Porlezza el 26 de Ottober. Che idea, però, quella del Francesch Pellicini. Prima el Festival de la comicità che per ann el battaja per la bassa, l' alta Brianza, el varesott, el comasch, el milanes. E adess i lagh. L'ha scritturà on po' tucc quej che hann lavorà cont lù fin da quand l'organizzava i Lunedì di comic al Nazional, e, adess che l'è direttor artistich, al Giuditta Pasta a Saronn. Sont orgoglios perchè l'è sta' on me alliev quand insegnavi in di cors de formazion professional per la Region all'Ariberto. El faseva el militar, allora gh'era ancamò l'obbligh, e intrattanta el studiava de avvocat a l'Università. Ciappada la laurea anca per contentà i so' genitor, dopo on para d'ann de praticantaa gh'ha dà ona pesciada (se fa' per dì) e insema a la miè Isadora e on para d'alter attor, tucc diplomà a la mia scola, l'ha comincià a mett insema spettacol, e minga content de inventaj e provaj, semper in partenza da la soa Luino, el s'è faa anca l'organizzazion de vendita. Inscì el doveva nient a nissun e el podeva fa' quel ch'el voreva.
Minga content l'ha istituì on corso di Teatro Comico, in on teater de la zona, cont mi come insegnant de recitazion e Davide Rota per la comicità di Lombard Baluba. L'intent l'era quell de slargass, fa' di produzion important e tirà denter i alliev meritori. E de mezz gh'è stada la maternità (do' fioeu) de la mièe e dovè fa' anca el papà. E l'ha fa' sul seri. Con la gestion in proprio el podeva anca divid el temp.
Sont minga chi a fa' el panegirico del Pellicini e di so' azion. Ma l'hoo ciappada on ciccin a la longa per dimostrà che i attor hinn minga quei pegor ner che ogni tant vegnen foeura dai Gossip. Hinn lavorador come tanti alter e per mandà avanti la baracca gh'han de fa' fadiga come i lavorador in proprio. Per difend la categoria che de spèss mi strapazzi per via di vizi che a volt superen i virtù (parli semper de capacità a volt mis in ombra dai registi che a furia de volè el natural a oltranza metten in condizion l'ascoltador de minga capì i paroll). E per tornà sul concett del laorà, l'è minga semper i rose e fior che te fan vedè i offizi stampa. Gh'è stress, fadiga, paùra del confront cont i spettador, sentiss mai all'altezza de la situazion, vess debol prima de entrà in scena per diventà leon depoeu, avegh capacità de concentrazion per imparà la part, dagh a trà al metteur en scen, parlà cont i tecnic, i macchinist, i sart, tour manager, truccador, camionist, facchin, elettricist, fonich, scenografi, costumist. Ona volta, quand se viaggiava in treno, el cosiddett amministrador l'era quell che te prenotava i pension per dormì, i bigliett de viagg cont i scont ministerial, i ristorant, ch'el faseva 'na volta la settimana i pagh e che el te trattegniva i danèe per la Vides, ona sartoria che a Milan la stava de sora al vecc Teater Cristallo, in via Castelbarco de drè de la Bocconi, adess discoteca serada su, e che la faseva el corredo de ogni attor perchè quand te gh'avevet la fortuna de vess scritturà te dovevet presentass cont on para de vestì per la mattina, on para de pigiama per la nott, on para de cambi per el podisnà, tri o quatter vestì per la sera, smoking, frack, tight, mantell, e tucc i accessori, istess per i donn. Domà per i dramma storich tutt el vestiari te le dava el produttor.
Règordi che quand on attor el desmetteva de laorà el cercava de vend tutt l so' corredo. Aldo Allegranza l'era vun de quej. Come l'era fornìi! El “giugava” in ultim cont la compagnia del teater milanes e l'ha laorà in vun di primm spettacol che 'u tra' in pè per girà l'Italia nell'estàa. El faseva Pantalone e mi Balanzone in ona commedia dell'Arte. Diseven che l'era stà vun di omen de la Borboni e anca quest el ghe dava fama e rispett. L'è on mond fatt inscì. E certi volt doppi. Nel senso che i artist fann anca on alter mestèe. Musicist cont el contropel che magara hinn medegh, bancari che reciten, giornalist che canten. M'è capità domenega de assist a on spettacol de beneficenza all'auditorium de Il Sole 24 ore. Ona costruzion sotterranea ideada e trada su, forsi l'è mej dì trada sotta, dall'architetto Renzo Piano. Me ricordava, in di gallerii lateral el cinema Ariston. Gradinada per i poltronn e palch scenich a terra. Depoeu ona prolusion filmada che la trattava on village del Ruanda per l'organizzazione Mawaba e la soa infatigabil Katrine, el spettacol. Guarda la combinazion. Quand cont el Leo Wester gh'emm programmà on circo collocà de drè al Teater del Leone XIII, olter ai ballett brasilian eren rivà i ballerin del Ruanda Burundi. Hoo faa on salt indrè de squas 40 ann. E, varda come l'è piccol el mond, prima dell'inizi chi te incontri Vecc collega di ann '55 de la Palmolive, quand laoravi anca mi all'offizi vendite, in attesa de entrà in arte (se dis inscì). Beh, come enterteinement gh'eren i Ciappter Ileven, ses element, che de musica se ne intenden. Chi hinn Sul Cd che m'han regalaa gh'è scritt che i Ciappter Ileven sont on idea de Stefano Elli, Marco Lo Conte e Mauro Meazza (giornalist al Sole 24ore) cont la complicità determinante e irrinunciabile de Filippo Bentivoglio e Mattia Bertani (musicisti perché anche l'orecchio vuole la sua parte cont on gener musical che l'è el “Pop economico-tributario, con venature giuslavoristiche) e de Alessandro Esposti alle tastiere, management Laura Bassi, la tosa de Paola Ballerini, amisa da temp, che la dirigeva el Palatrussardi, diventà Palavobis e adess grazie al Comun, local de rottamà.
Se dovessi fa' el giudes come voeuna di quii trasmission in doa l'esecutor el sembra davanti a ona commission de esam de maturità, ghe darìa dès cont on giudizi precis: “finalment on rosc (gruppo) che el «dis concett che resten», che el gh'ha de drè alter come, critica, umorismo, ironia, che el se ridd addoss e che el conquista el pubblic con allegria, misura e ch'el sa' in doa andà a parà. Con on mattador, Mauro Meazza, bella vòs, presenza, padron de la scèna. M'han ciamà sul palch cont Grazia Maria Raimondi. Gh'èmm dit pressa poch la stessa roba. Se semm esibii cont on certo ritegn. Ovhei, gh'era de avegh paura. Fortuna la voeur che la mia Jena l'ha tirà foeura on po' de battud che hann ciappà el pubblic e che mi hoo collega' cont on para de esempi de la stessa natura satirica scritt nel secol passaa (fa' ona certa impression affermall) e usaa nel me repertori. Esempi: in tema de canzon la ballada di impiccàa cont el so' “dondolando-dondolando”, in tema de cori i strofett del Gigi Lunari “Era Natale nell'harem del Pascià – nell'Oceano indiano – alla casa Bianca”, in tema de laorà cont on para de inserzion trovàa in la rubrica de on giornal: “Cercasi segretaria specializzata, capace iniziativa, possegga possibilmente due lingue” e “Fabbrica dinamite cerca operaio, spostamenti rapidi”. brivio.roberto@yahoo.it