Par de vess in on film de fantascienza

milano, 10 marzo 2020 - Una canzon cantada da Cochi e Renato inneggia a la vita bella, tanto bella che l’hann fada testimonial de ona pubblicità come tanti canzon che se fodessen minga abbinà a on quai prodòtt se sentiressen mai (‘sta’ strumentalizzazion la sviliss sia l’autor che el compositor). Ma quest l’è on inno a la forza de la vita e sentill dent per dent te da’ coragg in ‘sto moment in doa gh’è in gir domà paura; paura de vess contaggià, paura de dovè malass per on “sgarbuj rotond”, paura, sì, che sortissen difficoltà economich da mett in genogion laò, cultura e la vita istèssa. E el risultaa se ved: semm come in on film de fantascienza. Serad che paren quej del coprifuoco, negozi cont la clère tirada giò, cine e teater saraa, loeugh de aggregazion disertaa e proibì, asili, scoll, università, cont i cadèn ai cancell, bar a orari fiss e cont i client sentà giò ai taolin (contrariament a quell che succedeva all’ester, numm serom el popol del caffè in pè).

Strad voeuj. Uei! Se foeura gh’è nient de fa’ se sta’ in ca’! E i trattorii, i ristorant cont pizzeria annèssa? Avert ma i client settà giò e a on meter de distanza l’un dall’alter. Anca se se tratta de ona famiglia che depoeu la zena la torna a ca’ insema, gombet a gombet. E i trasmission cont el publich? Cadrègh voeuj. Men che v’una, quella de I Soliti Ignoti. Podom nanca dì “s’èmm faa per meritass ‘sto gibileri?!” perché gh’èmm fa’ de tutt e segutom a fall. L’è inutil elencà i noster peccaa vers la natura e numm medèmm che ghe femm part. O dì che semm pesg di animal. Col noster comportament gh’èmm fa’ incazzà Quaidun e podom nanca digh de perdonann datosi che gh’èmm sarà su la Ca’! Man man che passa el temp e i notizi dann el resoconto ora per ora de quell che succed in tutt el mond vegn foeura la nostra bontà: assenza total de egoismo, animo de iuttà i giovin e lassà da part i vecc per recuperà i pension, magher e sottil, el cost di medesin a volt giudicà inutil, quell di ca’ de ripos che hinn tutt men che ca’ de ripos, in doa malaa e san hinn miss insema con l’istèss trattament psicologich, in doa el minim l’è 2450 euro al mes comprensiv de noia e esclus el cost de quand vun el lassa el lett per ‘ndà foeura orizzontal. Bontà vers i profughi, a paroll vers i donn. Bontà?! Gh’ha reson Trilussa “Per quel popolo cojone risparmiato dar cannone.”