Il cinema Pace chiuso nel '59
Milano, 3 luglio 2018 - Ogni settimana lo sguardo di Roberto Brivio affilato in decenni di satira, esercitata come attore, scrittore e chansonnier, illuminerà angoli della Grande Milano di oggi: i suoi vizi, le sue virtù e soprattutto la sua gente, da raccontare con irriverenza e tenerezza, come sa fare lui. E in lingua madre: il dialetto milanese.
M'è rivà a cà on liber dal titol “Cronaca di una vita” de Giuseppe Pirovano cont la dedica: “a Roberto Brivio, attore da me sempre ammirato, questa modesta testimonianza di lavori e studio”. Prima de comincià a dagh on'oggiada hoo cercà de savè chi le mandava e perché. Leggi in fond (mi cominci a guardà i liber, i giornai, la carta stampada semper dai ultim pagin, tant l'è vera che nel liber “Cabaret dim…a” che i librerii esponeven no per via de la parolascia nel titol, la prefazion l'hoo missa in ultim, inscì chi la voeureva saltà ciappava ona fregada perché avèvi faa in moeud de integralla cont el final) e in su la bandina gh'è scritt: “Giuseppe Pirovano, giornalista, 2 lauree in Pedagogia e Medicina”. L'ha scritt sull'Avanti, sul Corriere e l'è stà la vòs storica del Gazzettino Padano e 'volto' della Testata Giornalistica Regionale. L'ha laorà come operari, musicista, attor anca come chirurgo. Hoo capì da doa l'è vegnuda la segnalazion de mandamm on liber che l'è stà stampaa in proprio nel domiladesdott. Da mia sorella! Uei, Gazzettino Padano, Tv Regional e mi ghe metti anca Nazional no podeva che vess mia sorella Maria annunciatrice in pension de tucc e trii. Con vott ann pussè de mi el Pirovano l'ha faa squas el percors che hoo fa' mi, salvo Medesina, Chirurgia, Pedagogia. L'è stà anca in Accademia dei Filodrammatici on quaj ann prima de mi, l'ha cercà de fa l'attor e l'ha sonà el Jazz, intanta che (mentre) mi sonavi la Fisa classica. Hoo comincià a leggel (lu o el liber l'è la stessa roba perché i paroll a descriven la soa vita, dai primm ann a incoeu, dai so' nonni a lu che adess l'occupa quella qualifica. Cont ona miè d'or e argent, cont i fioeu, cont i so' viagg, i so' amicizi, i so' tentativ de fa 'na robba 'gni volta che se taccava a on' idea, a la facilità che el gh'aveva nel licenziass e nel trovà on laorà, fa nient se l'era minga el stess de prima, e cont el so' punto fiss in la testa: laureass in Medesina.
Pensavi de legg la solita menada biografica, ma man man che andavi avant in di pagin m'accorgevi de trovam davanti a on romanz de vita cont i so' alt ebass, cont i so' colp de teater, e soratutt cont la descrizion minuziosa de on mond che l'è sta' el me e che s'eri a drè a desmentegall. Ona lezion de storia del secol passàa cont i fondament de 'na politica seria e pièna de promess che l'egoismo e la voeuja de arrichiss ai spall di alter hann mandà in vacca. Quand senti i politich che fann la gara a parlà in coro del benesser di cittadin, del paes, del conservà usi e costumm, de incrementà ricerca e istruzion, de favorì cultura e progress, cont tutt el zuccher che tiren foeura da la bocca, me va su la glicemia a quattercent e no basten vint unità de insulina per falla andà giò.
El liber, che el dovarìa vess pubblicà dal Mondadori cont tutti i presentazion e la stampa del caso, te porta indrè, in avanti, al temp present, te fa' i comparazion, senza vess cattiv, te fa' capì quand l'agì l'era sbagliaa e quand l'era giust, quand l'era facil trovà de laorà e quand el stava per diventà (come adess) difficil. Quella del Pirovano l'è stada ona vita piena, in doa l'ha trovà el temp anca de divertiss cont eleganza, personalità; de ridd, de svagass, anca ben che, el dis lu, certi moment difficil vann accettà cont e l sorris sui laver e la voeja de andà avanti per superà el moment. Devi dì, per quest, che Giuseppe el fa' scola. L'ha provà de tutt, a stagh denter e foeura, a fass i domand e a rispond, a impostà on problema e a risolvel. In tutti i camp che l'ha toccaa.
Dervi ona pagina a cas: Cap. 74. Pagina 180. El gh'aveva l'incarich dal direttore de l'Avanti, Carletto Colombo ( che l'è stà anca el produttor de I Gufi, insema a Remigio Paone, rispettivament gestor del Gerolamo e di Teater Nuovo e Odeon) de tràa in peè l'archivi storich del quotidian socialista. “In effetti quando cominciai non c'era quasi nulla. Solo qualche foto e qualche rivista illustrata. Non sapevo molto sull'argomento e così inventai tutto. Cominciavo alle 17, ritagliavo gli articoli dei giornali e delle riviste su personaggi della politica, dello spettacolo, dell'arte, della musica, dello sport, dei cardinali (...), tutto quello che poteva interessare ai giornalisti per stendere un articolo. Il tutto veniva messo in grosse buste con i nomi, archiviate per ordine alfabetico”. Ma mi in doa s'eri che nei primm temp de la mia carriera, insema al Gigi Vesigna, voeurevi fa el giornalista, quand el Carlo Colombo l'era direttor de L'Avanti On grand direttor perché el reussiva a valorizzà tutti i redattor, l'afferma Giuseppe Pirovano. Pensà che gh'èmm toccà tanti post squas insema! prima lu e depoeu mi! Per esempi l'editor Guertler. El voreva fa' i dischi de I Gufi. Numm semm stà dirottà in on altra Casa Discografica, la Voce del Padrone/Columbia, diventada poeu Emi. Ma mi, come el Pirovano s'eri stà in contatt cont Balloni, el direttor, e con el clarinettista Tomelleri, per scriv canzon su i squader de calcio. Senza cuntà i curiositaa che vegnen foeura dal liber, i nom di familiar, di amis, di fioeu, nomm che andaven in di ann 30, 40, 50. Nel '50 lu el gh'aveva 20 ann, mi 12. S'eri piscinin ma el me papà el me portava a vedè i avanspettacol (che allora eren fa' cont i equilibrist, illusionist, comic, chanteuse e cantant operistich) al cinema '900 in piazzal Lorett perché in orchestra el sonava el so' M° Giocchetta (Fisa) che l'è diventaà poeu anca el me maester, e Giusepp l'andava anca lu. In cors B. Aires gh'eren 4 cine-teater: 900, Venezia, Pace, Puccini, e in piazzal Oberdan alter duu: Diana e Giardini, incoeu Spazio Oberdan. In di strad lateral gh'era L'Impero, el Modena, l'Alhambra. I èmm vist squas insema. Peu lu l'è andà a la Rai e l'ha laorà cont i amis di noster primm temp: Mezzera, Mamola, Scaramucci, Sparano, Roberto Costa, Azzella, Luridiana, Mauro Magni . Senza parlà de la guerra, de la ricostruzion, di speranz, di desideri. Che vita. Per certi vers parallela. Per alter no, ma piena de proposit, de ritmo, de musica, de notazion, de voeuja de trovà la pietra filosofal. Lu l'ha trovada. Le dis in la conclusion: “… un'autobiografia che dimostra che con la volontà e la costanza nello studio si ottengono risultati di alto livello. Occorre essere attivi non solo negli anni giovanili ma anche negli anni “anta”, quando si raggiunge la pensione (che non basta mai, nda) e si pensa solo a riposare. In sostanza, un libretto senza la pretesa di insegnare qualcosa, ma un esempio che dal nulla si puo' ottenere molto. Basta volere…” Lu a 88, disevi, l'ha trovada. Mi a '80 ghe n'hoo ancamò vott per raggiongela, per rivàgh addoss. E quand che lu ghe n'avarà cent, mi saroo ai '92, e seguteroo a cantà “ Vorrei tanto suicidarmi” “Quando sarò morto” “Funeral show” in on spettacol memorabil intitolàa “Cronaca de ona vita… e de ona mort, domà cantada” …come el so'liber, come i me canzon cimiterial.