regali
Milano, 7 gennaio 2020 - Gregorio?!” “Sì, Francesca.” “T’el set che regal gh’ha faa l’Alfredo, el marì de la sciora Pasetti? “ “A chi, Francesca?” “A la miè, Gregorio.” “So no. ‘Na bona cazzoeula dal Cracco?” “Te sembra on regal, Gregorio?” “Se la sciora Pasetti ghe la fa’ mai, come capita a ti, Francesca, l’è on regalon.” “Mi la cazzoeula la me pias no e l’è indigesta. Sont partida a la larga nel cuntatt de l’Alfredo. L’era per fatt capìi che a mi t’è regalà nient per La befana.” “Ma se quand t’hoo faa i auguri te set incazzada!” “I auguri hinn ona maleducazion el regal l’è altra roba.” “Te se incazzed se vun el te dis Auguri, Befana! e te gioisset se el te fa’ on regalin intanta ch’el te dis: Buona festa, Befana!” “Non solo, Gregorio, te me det de la Befana ma te me fet anca la festa.” “Magara, Francesca!” “Fa’ no el spiritos, Gregorio , per famm la festa bisogn vess in duu. “Tuscè. Te sett come tucc i donn, Francesca. Voeurìi festeggià la Befana ma guai se ve dann quell’appellativ.”
“Perché la Befana la pitturen, com’è ona veggia stria, cont la scoa in man pronta volà.“ “Ghe pocch de volà cont la scoa, incoeu, Francesca. Se te ghe l’et minga ibrida l’è forbidden, proibita.” “Gregorio, ciabbiamo la vena spiritosa?” “Ti che te l’et provada, Francesca... per volà, te mettet le ridotte?” “ Gregorio! Te set in vena de compliment?” “ Uei, Francesca, stiamo perdendo colpi sull’umorismo?” “Quel che te fet ti l’è minga umorismo. L’è sarcasmo, Gregorio. Roba che la me sarìa andada ben fina ai quarant’ann… Ma adess che ghe n’hoo on quaivun pussè…” “Squas el doppi…” “Piantala lì perché se no doman te me vedet pù.” “Benissimo Francesca, abbandono del tetto coniugale.” “No, Gregorio, abbandono del mondo. Seguirò il consiglio di Amleto” “Chi l’è? On tuo spasimante?” “Va ben, Francesca. D’ora in avanti te ciamaroo Babba Nadal. Ma ricordati che in quella veste el regal te ‘l devet fall ti a mi. Magara ona scatola de pinolett verd inscì ghe sarà pù la scusa del vess minga quand te saltaroo addoss.” “Gregorio!” “No, Francesca hoo scherzaa”.
mail: brivio.roberto@yahoo.it