Milano, 8 dicembre 2019 - Se dovessom tirà a man tutti i novità che vegnen foeura nel temp de Nadal bastaria no el giornal e forsi nanca on liber. Tucc se dann de fa’ per mett in vedrina on quaicoss che el tira l’oeucc, on’idea che la branca l’attenzion de la gent e la invida a comprà e a mangià. “ A la mattina on busecchin/Cont adrè on biccer de vin/A mezdì on capponscell/cont adrè on risottel/a la sera el panatton/cont adrè on quaicoss de bon/ … e andaremm tucc in lett a tomborlon.” Tucc gh’hann on liber de raccomandà, on profumm de ricordà, on vestì de comprà, on abbonament de regalà, ona preghiera de perorà. I giovin ‘na volta se accontentaven de pocch: on para de calzett, ona sciarpa, ona cravatta, on foulard. Adess voeuren on quajcoss che sann nanca lor, e ti e vedet in di negozi pien de barlafus, a cercà l’idea, quella che la fa’ dì al ricevente “domà ti te podevet trovà ona meraviglia come questa.”
E depoeu on brasc attorna la vita, on basin, ona strusada, e amor, gibigiana in di oeucc sbalordì dal lusor di strad, di vedrinn, de tutt on mond stravacà vers i comper. Se te vet in di mercadinn te troeuvet de tutt e te vorarisset comprà senza sparmì. E allora demm a trà. El me amis Jenky l’è on fantasist-imitador veramente original. El se limita no a fa’ i vos di artist important del passaa e del moment, ma el gh’ha la caratteristica de fa i vòs di cartoon animaa: Topolino, Paperino, el Grillo parlant, l’Orso Yogi, e tanti alter che i fioeu conossen e saluden con giòia. El fa anca la vòs de Topo Gigio inscì ben che Peppino Mazzullo l’attor che ghe l’ha dada per metà secol el se stupiress. Per inciso, hoo comincià la carriera cont el Teatro per Ragazzi all’Angelicum, e chi gh’era in compagnia? Peppino Mazzullo. 1960. E giamò el faseva la vòs del rattin pussè famos del globo, dopo Topolino. Disi globo perché l’è andà per un quai ann anca all’Ed Sullivan Show e da lì l’è stà irradià de per tutt. Jenky cont allegria l’ha fa’ on Cd cont i canzon ( 8 brani nananmò stampàa) selezionà e arrangià da Gerardo Tarallo, prodù da Roby Matano e Carlo Fontana per la Saar records. Ecco, per mi e per i fioeu questa l’è la novità. Se sii minga stuff de vardà i vedrinn, de vorè comprà el mond, adess, cont “Jenky e le sue mille voci” avii slargà la scelta. brivio.roberto@yahoo.it