Richard Pryor e Gene Wilder mattatori di “Non guardarmi: non ti sento”
Milano, 14 maggio 2019 - El ciclo di lezion se cjamava “ Cabaret ieri, oggi…domani” eren vott, voeuna al mes, e vegniven faa in viale Lombardia 210, fondazion Luigi Clerici, a Brughee. L’A.C.U., accademia di cultura universale, l’è on’associazion che la mett insema ogni ann pussè de cent cors per le Aree: Umanistico Letteraria, Scientifica, Benessere Psico Fisica, Tecnico Artistica. Mi s’eri nell’area umanistico-letteraria e gh’avevi ona trentina de alliev interessaa al Cabaret, a la soa storia, ai so’ personagg, ai so’ canzon. Quest’ann hoo fa ona prima sperimentazion sul me Cabaret e quell di Gufi,
L’ann che ven faroo olter all’Italian el cabaret internazional, prepararoo i dispens perché i giovin che frequenten (età media 65/70) gh’àbbien on quajcoss de stampaa per ricordass quell che hann sentii. Minga tucc sann adoperà telefonin, internet, facebook, sito e consultà wikipedia, ma tutti sann legg anca se dovren i uggiaa, e quaivun el sent no perchè el voeur minga mett l’apparecchio acustico. Me sont semper dit “ma se la gent se vergogna no di uggiaa, di dentèr, di protesi ai gamb, de andà in gir cont el tutor, la pancera, i reggitett che spess tegnen su roeud de carr che ballen fina ai genoeucc, i strument smartfonich, i cuffiet per sentì in privaa senza da’ fastidi, perchè la dev vergognass a portà quii robitt che van denter i orecc’?
Hoo faa ricerch su ricerch, hoo intervistaa, interpellaa giovin e vecc, ommen, donn, prèt, laureà, meccanich, agricoltor… La risposta l’è semper stada quella: “I e metti no minga perchè gh’hoo vergogna ma perché costen tropp”. Infatti, ona coppia de quej aggeggi costa squas sesmila euro. On para de uggiaa, lent bifocal, fumèe, montadura firmada ( che la serv no) costen al massim, ses’cent euro. Per compra’ i maico te proponen i rateizzazion, de devet avè la carta de crèdit, el cont in banca per impegnass in ona rata mensil insema a la lus, al gas, al fitt, a la rata de l’auto, del divano sofà, de la lavatris che l’è ‘ndada in tilt, e anca del smartphone che fin che te l’et minga comprà te par on bene indispensabile. E parla no de cunt in Posta! Te guarden de travers. Sesmila euro! Se i to’ diottrii riven al trii e mezz te comperet i uggiaa dai cines e ti e paghet 5 euro massimo.
L’è la stessa storia de la dentera. La gent l’è abituada a fass pelà dal dentista (ghe n’è minga vun ch’el gabbia no la biemmevu, la ca’ al mar o in montagna e ch’el faga el so’ periodo de ferii almen quatter volt all’ann: Nadal, Carneval, Pasqua, Agost, e… foeura di pont). Cont i dent, però, i prezzi hinn calaa da quand in Croazia al post di scont fann regal ( ona protesi completa de operazion, viagg e soggiorno, poch men de 250 euro).
E se per la vista te fett anca di sacrifizi (senza uggiaa no patente, senza vedè la pubblicità nient acquisti, senza savè in doa te set no deambulazion e senza la noiosa television, ‘vita e gaudio’) per l’udito te ghe passet sora. Tant la miè l’è mej che te la sentet no, cont i fioeu te parlet doma’ ti, ‘el lor parer el cunta ‘pocch e nient’’, in TV e al cinema te legget el labbial, el fracass de la città el spariss e te se risparmiet el mal de coo, al ‘super’ te mettet la merchandise in del carrèll in silenzi, al mercàa te se esprimet a segn e per laorà dipend dal mestèe che te fet. Certo che stà’ a on sportel l’è difficoltos per on sord, inscì per on rappresentant, on commess, ma ‘ste set on operator ecologico, ‘ste fet el trasportador, el facchin e anca el dottor de base (basta fa’ i rezipe) te vett a mila. Se te sentet pocch basta dì “te set sord?” e dall’altra part o alzen la vòs fin che te sentet o domanden scusa e fann fumad tipo Sioux come se te fodesset davanti al tepee.
Ma, come dis la trasmission, scherz a part e tornemm all’A.R.C.U. Giovedì finissi i me vott lezion. Hoo semper faa on ora e mezza: Ottober : Anni ‘60, nasce il cabaret. November: Ann ‘64 nassen I Gufi. Dicember: 1969 il primm dislenguament. Gennar : dal ‘71 al ‘94, vita d’artista del Brivio, teater avert, spettacol, passion per l’Operetta. Febbrar: dal 1995 scola de Teater per la Region Lombardia. Marz: liber e disch. April: Present e futuro del Cab. Magg: 16 Gioedì dai 15 ai 16.30, ultima tappa: Cantom insema el repertori de I Gufi, scoltèè on quaj monologo, ridii ai story passaa in 60 ann de teater. Se depoeu ve resta on poo de temp dii un’oggiada al cors de letteratura italiana civile. Magara capitii a la lezion sul Risorgimento: la nascita de la coscienza nazional.
L’ann che vegn parlerann de la mort de ‘sta coscienza ben fissada in la ment di Alpin in raduno nazional domenega 12, in contemporanea a la festa de la Mamma. Hoo fa’ on gir per el centro. A part la distribuzion volontaria de vin brulè, gh’eren, foeura corteo, rosc de Alpin che cantaven accompagnà dalla immancabil fisarmonica: A la moda di Montagnon. Addio mia bella Addio. A mangià pocch, pocch. Bombardano Cortina. E al di là del Piave. E Cadorna manda a dire/ che si trova là sul confine/ e ha bisogno degli Alpini / per potersi avanzar. … E c’eran tre alpin. Dove sei stato mio bell’Alpino. E la bandiera dei tre colori/ è sempre stata la più bella… Inno degli Alpini. La Penna nera. Monte Canino. Numm semm Alpin. Oh Dio del cielo, se fossi ‘na rondinella/ vorrei volare/ su la mia Patria bella… Và l’Alpin.
Gh’era on grupp ch’el cantava in furlan ‘compagnà da ona ghitarra, intant che quaivun el mangiava la polenta cont i man, “Se tu vens cassù tas cretis/là che lòr mi àn soteràt/ a l’è un splàz pien di stelutis/ dal miò sang l’è stàt bagnàt/ ….resterà par me che stele/ che il miò sang al a’ nudrid/ par che lusi simpri biele/ su l’Italie, a l’infinit…!”…Quand pensi ai sentiment ver che hann ispira’ ‘sti canzon me vegn de piang per i discors sul Paes che fann incoeu a la television. Roba da discarica.