Richard O'Brien e Jamie Donnelly
Milano, 12 febbraio 2019 - Ogni settimana lo sguardo di Roberto Brivio affilato in decenni di satira, esercitata come attore, scrittore e chansonnier, illuminerà angoli della Grande Milano di oggi: i suoi vizi, le sue virtù e soprattutto la sua gente, da raccontare con irriverenza e tenerezza, come sa fare lui. E in lingua madre: il dialetto milanese.
Se pò no dismentegass de on periodo ch'el podeva vess d'or e inveci l'è sta' de bronz per colpa de la deslippa subentrada perché hoo vorsù fa' on pass pussè long de la gamba. Depoeu el Refettorio, on cabaret che avevi rilevà e derbì de noeuv in via San Maurilio in di temp de la prima Spaghetteria, di Cantinn de la Luisa Ronchi, che qualificaven la zona, hann comincià a trà in pè ristorant de ona certa valenza e on teater ciamà el Colibrì, vista la grandezza ridotta, in doa el Funari presentava spettacolo de Strip Tiis ancamò prima de diventà el Giornalatt che tutti gh'èmm conossù. Disevi che depoeu el Refettorio e A3 nell'81, compresa la partecipazion de I Gufi a S. Remo, hoo miss i mann sul Teater Cristallo in via Castelbarco, de drè a la Bocconi. Mettighi i mann l'era propri l'espression giusta. El Teater 1450 post, l'era andante, el gh'aveva bisogn de on ripristino e cont amis e l'architett Cristina Merizzi l'hoo inauguraa cont ona programmazion che per Milàn l'era ona novità: debutt official cont Rocky Horror Show, on musical che vegniva da Londra, giamò cult per giovin e men giovin, ch' el gh'aveva di precedent al Cinema Messico de via Savona in doa Sam Cassani le proiettava cont el titol The Rocky Horror Picture Show e in contemporanea, su ona pedana improvvisada, attor vestì come quej de la pellicola ripeteven moviment, canzon e l'intera storia.
L'era el me second Teater, depoeu quell del Corso. Mai vist la fila de gent per comprà i bigliett come quella che gh'avevi all'apertura de la cassa. De seguit hoo fa' vegnì Le Follies Bergère, la mia compagnia de Operett, Juliette Greco' e Walter Chiari insema a Patrizia Caselli e a Grazia Maria Raimondi. Gh'hoo miss in scèna on spettacol intitolà “Scusate è tutto qui”, success dell'ann che el segnava el ritorno del Walteron depoeu el so' periodo black. Success indimenticabil. Walter, per mi semper el numer vun anca adess che el gh'è pù, el borla giò dal palch scenich. Fin di rappresentazion. Voo avanti cont la Raimondi e intitoli el spettacol “In attesa di Walter”. El torna l'ann successiv semper cont numm. Al Carcano. El pass pussè long de la gamba l'hoo faa quand hoo portà in gir per l'Italia Rocky Horror. L'era minga conossù. Su des città, vott hinn stà on Flop. Ho fa i pien al Petruzzelli de Bari, a Ravenna, e in on para de alter città, che ricordi pù, squas mezza platea. Fatto stà che hoo dovù mandà indree la compagnia in Inghilterra e lassà el teater a on'organizzazion che la diseva de laorà per Vasco, intervegnunda per fann ona discoteca. Da Disco in Disco l'hann saraa. L'alter dì passi per la via e vedi che gh'è pu nanca quella ma on supermercà. Me s'è strengiù el coeur. Propri all'ex Cristallo avevi rinsaldà l'amicizia cont Roberto Villa, fotografo a la moda per la moda, amis del Patruno in primis e poeu anca de mi e de famiglia. L'aveva preparà tutt el piano de comunicazion per el lancio del teater. Minga seguii perché pensavom, error, che bastass la grand pubblicitaa ottenuda cont la programmazion del Rocky Horror Show. L'è facil borla' denter ai sbalii quand te legget semper “esaurito”. Allora se usava no scriv “sold out”. El stess error ch'èmm faa numm Gufi, ona volta in su la cresta dell'onda, nel voeurè minga on impresari che pensass ai serad, a la RadioTV, ecc. L'autosufficienza l'è ona bellinada, per dirla a la genovesa. Hoo parlà de rafforzament dell'amicizia cont Villa perché gh'èmm continuà a frequentass senza pensà al laorà. Mi andavi in del so' studi, lu el me copiava i film de Fred Astaire, de Gene Kelly, che a quei temp eren ona rarità, e de tant in tant el me scattava ona quaj foto. El m'ha fa' on servizi fotografich per i me operett ineguagliabil e ancamò adess quand gh'hoo bisogn de ona documentazion, de fa' on manifest, usi i so' fotografii perché dato che mi e la Raimondi semm semper quej de 'na volta ( !) quand a ca' mia veden 'sti fotoquader, resten de stucch. Lee in gran fotoforma. Minga perché adess la sia diversa. Anzi, se domanden tucc come l'ha faa a toeu come compagn prima e come marì depoeu on tipo come mi che se anca l'era menzionaa come el pussè bell di Gufi, giontaven “ghe voeur pocch” e le consideraven mai come tal. Tant che hoo semper ciappaa el compliment come ona ciàllada.
Mi e Roberto Villa se semm frequentaa tanto da perdess a la fin de vista. Depoeu on po' de ann ricevi on invid a ona soa mostra de foto scattàa sul set di film de Pasolini. Ghe voo, se incontrom, grandi fest, gran foto, gran lapa come presentator. L'era là cont la direttrice di so' gallerii, Rosalba, veggia amisa mia e de Grazia Maria Raimondi, soa donna da ann. Ghe domandi se l'è la prima mostra e el me fa vedè ona sfilza de “Istituti Italiani di Cultura” giamò visità o prenotà cont el patrocinio de La Farnesina. Ovehi, l'ha pientà lì l'attività de fotografo nell'84, e l'ha allestii da allora tresent mostre-evento. Anca se la parola evento la me pias no devi constatà che a volt la sintetizza i avveniment che stann intorna a on… appunto evento: taol rotond, proiezion in salle cinematografich, in teater, conferenz in cinq continent. La cultura italiana in gir per el mond. Paga' doma' per rientrà in di spes de viagg e de soggiorno, ormai l'è on nomm internazional. Dato che Pasolini l'è sta' trattaa per ann, el fa conferenz al seguit de commedii de Dario Fo e Franca Rame. De lòr el gh'ha on repertori tra foto, discors e presentazion da fa' invidia a on Museo. Adess l'è in Serbia, a Belgrado. El spettacol rappresentaa in lingua Serba, l'è intitolaa “Coppia aperta, quasi spalancata” de Dario Fo e Franca Rame cont la direzion de Gianluca Barbadori, regista mondial. La Mostra de Roberto Villa “ Il Giullare Nobel” a l'è la risultanza de on percors ch'el va' dai ann '60 fina al “Picasso Desnudo”, l'ultima opera recitada da la coppia nel 2012 a Milàn. La Mostra la comprend foto de Non si paga Non si paga (1974), Il Fanfani rapito (1975), Il Fabulazzo osceno (1982) e alter per rivà a la data citada. Capitooo. In Italia fann i “Tributi” cont domà on attor. All'ester rappresenten i so'commedii, ghe metten visin “l'evento” patrocinaa da l'Istituto Italiano di Cultura. Semm semper indrè de on pass e el bell l'è che ghe voeurom restagh. Che pirla.